Хүний хүсэл мөрөөдөлд хязгаар гэж үгүй. Мөрөөдөл, хүсэл тэмүүлэлдээ хөтлөгдөн чөлөөт бөхийн спортоор хичээллэж яваа эгэл, даруухан, хөдөлмөр охинтой ярилцлаа. Тэрбээр Зэвсэгт хүчний “Алдар” спорт хороонд Монгол Улсын гавьяат дасгалжуулагч Ц.Хосбаяр, гавьяат тамирчин Г.Мандахнаран, гавьяат тамирчин Б.Одончимэг багш нарын удирдлага доор чөлөөт бөхийн спортоор хичээллэж байна.

-Миний дүү өөрийгөө танилцуулахгүй юу. Аль сургуулийн хэддүгээр ангид сурдаг вэ?

         -Намайг Гэрэлийн Соёлмаа гэдэг. 2005 онд Хэнтий аймгийн Өлзийт суманд төрсөн. Одоо 17 настай. Аав, ээж, эгчтэйгээ амьдардаг. Хан-Уул дүүргийн долдугаар дунд сургуулийн 12-ын “Б” ангийн сурагч.

-Эмэгтэй хүүхэд байж чөлөөт бөхийн спортыг яагаад сонгох болов.Чөлөөт бөхийн чухам юу нь чиний сонирхлыг татав. Бөхийн спортоор хичээллээд хэдэн жил болж байгаа вэ?

          -Багаасаа л барилдах дуртай байсан.  Бага байхдаа аавтайгаа  их барилддаг байлаа. Тэгээд сумынхаа тэмцээнд орж түрүүлээд аймгийн аварга шалгаруулах тэмцээнд орсон. Тэр аймгийн аваргаас медаль авч тэрнээс хойш чөлөөт бөхөөр тогтмол хичээллэх болсон. Чөлөөт бөхөд хөл, гар, цээж гээд биеийн бүх хэсэг рүү довтолж болдог. Чөлөөт бөх  их сонирхолтой спорт. Тамирчдаас хурд, хүч, авхаалж самбаа, уян хатан чанар шаарддаг нь  их сонирхол татсан. Би чөлөөт бөхөөр хичээллээд долоон жил болж байгаа.

-Ээж нь чамайг чөлөөт бөхөөр хичээллэж эхлэхэд хэр дуртай байв. Аав, ээж хоёр нь спортоор хичээллэж байсан болов уу?

         -Ээж, аавын адил намайг дэмжсэн. Намайг чөлөөт бөхийн спортыг сонгосонд маш их  дуртай байсан. Манай гэрийхэн аав, ээж, ах, эгч нар маш сайн дэмжиж тусалдаг. Манай аав барилдах сонирхолтой хүн байгаа юм. Манай үеэл эгч ОУХМ Ц.Намуунцэцэг чөлөөт бөхийн спортоор хичээллэдэг. Мөн манай хамаатан дэлхийн аваргын мөнгөн медальт Б.Хулан эгч байгаа юм. Энэ хоёр эгч шигээ сайн тамирчин болохын төлөө хичээж зүтгэнэ.

-Өдөрт хэдэн цагийн бэлтгэл хийдэг вэ. Ядрана биз. Шантрах, мохох тохиолдол гарч байсан уу?

            -Өдөрт 2-3 цаг, зарим үед  5-7 цагийн бэлтгэл хийдэг. Дуртай, сонирхолтой спортоороо хичээллэж байгаа болохоор нээх ядраад байдаггүй. Шантраж байгаагүй. Харин ч би эсрэгээр бэлтгэл хийж байхдаа аз жаргалыг мэдэрдэг. Гэхдээ чөлөөт бөхийн бэлтгэл асар хүнд. Тууштай үнэнчээр хичээллэсэн хүнийг чөлөөт бөхийн дэвжээ хэзээ нэгэн цагт заавал түшдэг гэдгийн  сайн ойлгосон.

-Анхны тэмцээн , анхны медаль хүртсэн үеэ дурсахгүй юу?

          -Анх 2016 онд  чөлөөт бөхөөр хичээллэж эхэлсэн. Анхны тэмцээн Хэнтий аймгийн аварга шалгаруулах тэмцээн байсан л даа. Тэр үед би 11 настай жаахан охин байв.  Аймгийн аваргаас мөнгөн медаль хүртээд хязгааргүй их баярласан. Тэр мөнгөн медаль надад урам, дэм, итгэл найдварыг бэлэглэсэн гэж хэлж болно.

-Амжилтуудаасаа дурдвал?

         - 2016 онд  Хэнтий аймгийн өсвөр үеийн чөлөөт бөхийн аварга шалгаруулах тэмцээний 34 кг-ын жинд барилдаж мөнгө медаль. Харин 2017, 2018 онд 38 кг-ын жинд  аймгийн аваргаас алтан медаль, 2020, 2021, 2022 онд 43 кг-ын жинд аймгийн аваргаас алтан медаль авч байлаа.

       2021 онд өсвөр үеийн улсын аварга шалгаруулах тэмцээний 49 кг-ын жинд барилдаж мөнгөн медаль, 2022 онд “U17” насны улсын аваргаас алтан медаль, 2022 онд “U20”-ын улсын аваргаас хүрэл медаль хүртсэн.

-Хамгийн баяртай ялалт болон харамсалттай ялагдал гэвэл?

         -2022 онд улсын аварга шалгаруулах тэмцээний 49 кг-ын жингийн алтан медалийн төлөө барилдан, ялалт авч байх байсан үе гоё байсан. Харин “U17” Ази тивийн аварга шалгаруулах тэмцээнээс медаль авч чадалгүй ялагдсан нь харамсалтай санагддаг.

-Анхны болон одоо бэлтгэл ,сургуулиалт хийлгэж байгаа багшийнхаа талаар ярихгүй юу?

        -Анх Хэнтий аймгийн Өлзийт сумын биеийн тамирын Доржпүрэв багшийн удирдлагаар 2016 онд бэлтгэл хийж байгаад аймгийн төв рүү явсан.  Аймагт 2017 онд очоод  Амарбат багштай нэг жил бэлтгэл хийсэн. Түүний дараа 2018 онд Улаанбаатар хотод шилжин ирээд  Зэвсэгт хүчний “Алдар” спорт хорооны Монгол Улсын гавьяат дасгалжуулагч Ц.Хосбаяр, гавьяат тамирчин Б.Одончимэг, гавьяат тамирчин Г.Мандахнаран багш нарт шавиар орж одоо хүртэл бэлтгэл сургуулилалтаа хийж байгаа. “Алдар” спорт хорооныхоо гурван багшийнхаа зөвлөгөөг сонсож, үг үйлдэл бүхнээс нь суралцаж явна  .Энэ дашрамд “гурван гавьяат багшдаа маш их баярлалаа, хайртай шүү” гэдгийг хэлмээр байна. Та гурвынхаа итгэлийг алдахгүй ээ. Би улам бүр хичээж бэлтгэлээ хийх болно.

- Чөлөөт бөхийн спортоор хичээллэснээр чамд ямар эерэг зан чанар төлөвшсөн гэж чи боддог вэ?

        -Би чөлөөт бөхөөр хичээллэснээр бие даасан, үүрэг хариуцлагатай, тэвчээр хатуужилтай болсон. Мөн цагийн менежментэй, бусдыг хүндлэж хайрлах ухаанд суралцаж байна. Ер нь чөлөөт бөх  зөв боловсон харилцаатай, эелдэг төлөв даруу, үүрэг, хариуцлагыг ухамсарладаг байх гээд л маш их эерэг зан чанарыг бидэнд суулгаж өгдөг спорт.

-“Алдар” спорт хороонд дэлхий аварга хоёр эмэгтэй тамирчин бий. Мөн тив дэлхийн медальтай олон тамирчин байгаа.Тэднээс их зүйл сурч байна уу?

          -Өө тэгэлгүй яахав. Аварга эгч нараас  сурах юм их байгаа. Одоо суралцаад явж л байна. Цаашид ч үргэлжлүүлээд суралцсаар байх болно.

-Чи бүжигчин, гимнастикийн тамирчин шиг л уяхан, туяахан харагдах юм. Чөлөөт бөхийн тамирчин болоод хүч чадалтай болж байгаа нь чамд мэдрэгдэж байна уу?

           -Аан бага жинд барилдаг болохоор тэгж харагддаг байж магадгүй  Чөлөөт бөхийн спорт нь тэсвэр тэвчээр, уян хатан байдлыг хослуулдаг спорт,  байнгын бэлтгэл сургуулилалт хийдэг болохоор хүч чадал нэмэгдэж байгаа.

-Чөлөөт бөхөөр хичээллэсний цаашдын зорилго

          -Мэдээж спортоор хичээллэж байгаа хүн бүрийн хүсэл, мөрөөдлийн ноён оргил  бол олимп, дэлхий аварга шалгаруулах тэмцээн. Монгол Улсынхаа төрийн далбааг тив дэлхий, олимпын тэнгэрт мандуулж, төрийн дууллаа эгшиглүүлэх зорилгойтой. Олимпод түрүүлэх зорилготойдоо.