Монгол Улсын Гавьяат тамирчин, сагсан бөмбөгч Ц.Шаравжамц гэх “өндөр эр”-ийг мэдэхгүй хүн тун ховор биз ээ. Тэрбээр сагсан бөмбөгийн замналаараа Монголын сагсан бөмбөгийн ертөнцийн спортынхны хэллэгээр бол “мангас” нь билээ. Харин орчин цагийн сагсан бөмбөгийн спортод түүний хүүхдүүд “гялалзаж” байгаагаас энэ цаг үед хамгийн тод нь Ш.Энхийн-Од болоод байна.

          2019 оны зургадугаар сард Монгол Улсын нийслэл Улаанбаатар хотод зохион байгуулсан 18 хүртэлх насны сагсан бөмбөгийн 3х3 төрлийн ДАШТ-д оролцож, “Мэргэн бууч” буюу хамгийн өндөр оноо авсан тамирчнаар шалгарсан нь түүнийг яггүй нэгэн болохыг анх таниулж байлаа. Тухайн үед хилийн цаадах, далайн чинад дахь сагсан бөмбөгийн ертөнцийн үе тэнгийн “дайснууд”-тайгаа өрсөлдөж, тэргүүлсэн хэрэг л дээ.

-ТЭР АГУУ МӨРӨӨДӨЛТЭЙ-

          Тэгвэл тэр хоёрхон хоногийн өмнө дахин, гэхдээ урьд өмнөхөөсөө ч илүү тод, дэлхийн талбарт “гялалзлаа”. Америкийн үндэсний сагсан бөмбөгийн холбооны гурван удаагийн аварга Дэнни Гриний зохион байгуулж байгаа “The Battle: Summer Showcase” тэмцээнд тэрбээр оролцож, 2024 оны драфтаар мэргэжлийн холбооны тамирчин болохоор зэхэж буй хамгийн алдартай сагсан бөмбөгч болох ЛеБрон Жеймсийн хүү Бронни Жеймстэй учраа таарч, ялалт байгуулсан билээ. Бүр цаашлаад Ш.Энхийн-Одын "Midwest" баг тойргоор тоглосон тоглолтууддаа бүгдэд нь ялалт байгуулж, тоглолт бүрд голлох үүрэг гүйцэтгэснийг дэлхий дахин харлаа.

          Ш.Энхийн-Од өсвөрийн сагсан бөмбөгийн УАШТ-д найман удаа түрүүлж, дөрвөн мөнгө, нэг хүрэл медаль хүртэж, долоо удаагийн “Шилдэг тоглогч”-оор нэрлэгдсэн. Үүнийхээ зэрэгцээ “Монголын хамгийн анхны NBA-гийн тамирчин болох бол миний мөрөөдөл” хэмээн тэрбээр цаг үргэлж үзэгч, хөгжөөн дэмжигчдэдээ сануулж ирсэн. Энэ мөрөөдөл нь өдгөө их холын хүсэл биш болжээ.

          Гаднын сагсан бөмбөгийн тойм бичдэг томоохон агентлагаас Ш.Энхийн-Одыг ирэх 2024 оны Америкийн үндэсний сагсан бөмбөгийн холбооны драфтад оролцох шилдэг тоглогчдын нэгээр нэрлээд байгаа. Энэ үеэр Ш.Энхийн-Од гаднын нэгэн хэвлэлд өгсөн ярилцлагадаа “Энэ хүртэл явахад шантарч, бууж өгөхийг хүсэх үе зөндөө байсан. Гэхдээ би багаасаа л шартай хүүхэд байсан болохоор бүхнээ дайчилж, ялахыг хүсдэг” гэсэн удаатай.

Түүний мөрөөдөл агуу. Гэхдээ тэр мөрөөдөлдөө хүрэх хүртлээ гялалзсаар, тэмүүлсээр, “ниссээр”, бүхнээс дээгүүр дүүлэн “ниссээр” л байх болно.