Эрүүл мэндийн сайд С.ЭНХБОЛД удирдагч уу, улс төрийн шахааны хүн үү

Б. Бадралмаа:
Улс төр

2021-02-28, 1553

-Тэр салбарынхаа бодлого, үйл ажиллагааг хэрхэн зөв тодорхойлж, яаж удирдахаас өмнөх сайдын араас хугацаанаасаа өмнө явах уу, эсвэл санасан, төлөвлөсөн ажлаа хийх үү гэдэг нь шалтгаална-

У.Хүрэлсүхийн Засгийн газар огцроход төрийн өндөр дээд албанд томилогдож, улс төрийн карьераа нэмэх гэсэн олон хүн “Эрүүл мэндийн сайд болно” гэх бор шувуу нисгэж, цахим орчинд хэрүүлийн алим шидэж байсан. Харин нийтийн дунд үүссэн энэ маргааныг бут цохиж, Ерөнхий сайд Л.Оюун-Эрдэнэ танхимын сайдаараа олонд танигдаагүй “битүү морь” сойсон нь Улсын хоёрдугаар төв эмнэлгийн захирал С.Энхболд байв. Түүнийг ажлаа хүлээж авахаас нь эхлээд л “Улс төрд карьер хөөж орж ирээгүй хээгүй, гүндүүгүй эр хүн байна” гэх магтаал мэр сэр явж, олон нийт шинэ сайдад ам сайтай байгаа. Гэхдээ Монгол Улсын эрүүл мэндийн салбарыг хээгүй, гүндүүгүй удирдаж болохгүй. Харин ч бүр сайн менежментээр, хариуцлагатай удирдах ёстойг өмнөх сайдын жишээ тодоор харуулсныг санах хэрэгтэй. Угтаа бол Монгол Улсын Засгийн газар хариуцлага хүлээж, танхимаараа огцорсон нь эрүүл мэндийн салбарынхны хариуцлагагүй үйлдэл, алдаа дутагдалтай салшгүй холбоотой гэдгийг Эрүүл мэндийн сайд хэн хүнээс илүү мэдэж байх учиртай.

Эрүүл мэндийн салбарт тасралтгүй 17 жил ажиллаж, гаднын улсад өндөр боловсрол эзэмшсэн гэх урт намтартай шинэ сайд ажлаа хүлээж аваад сар орчмын хугацаа өнгөрлөө. С.Энхболд сайдын тухайд Улсын нэг болон хоёрдугаар төв эмнэлэгт удирдах албан тушаал хашиж байхдаа хийж, хэрэгжүүлж ирсэн ажлаар нь салбарынхан нь нэлээд үнэлдэг тул ямар нэг эсэргүүцэлтэй тулгараагүй ажлаа эхлүүлсэн давуу талтай. Улсын Хоёрдугаар Төв эмнэлэгт ерөнхий захирлаар томилогдсон даруйдаа Сайд нарын Хоёрдугаар эмнэлгийг, Улсын Хоёрдугаар Төв эмнэлэг болгон эмнэлгийн үйл ажиллагааг улам өргөжүүлсэн хэмээн түүнийг салбарынхан нь онцолдог. Түүнчлэн хөхний хоргүй хавдрыг соруулж авах аргыг улсдаа нэвтрүүлсэн, хэт таргалалтын эсрэг дурангийн мэс заслын эмчилгээ нутагшуулсан, Монголд анх удаа гуяны гадна булчингаар хэл орлуулан суулгах мэс заслыг амжилттай хийдэг болсон нь С.Энхболдын цөөнгүй жилийн хичээл зүтгэл хэмээн үнэлдэг.

Үүний дээр Улсын Хоёрдугаар төв эмнэлгийн дэргэд 50 ортой хүүхдийн эмнэлэг шинээр ашиглалтад оруулж, Монголдоо хавдрыг хянах боломжтой MRI аппарат нэвтрүүлсэн зэрэг онцлох ажлууд түүний нэр дээр цол мэт дагалддаг.

Гэвч бүхэл бүтэн улсын эрүүл мэндийн салбарыг хүнд цаг үед зөв зохион байгуулалтаар удирдана гэдэг тийм ч амар биш гэдгийг түүнд сануулах нь зүйтэй. Эрүүл мэндийн салбарт олон жил ужгирсан эрүүл бус тогтолцоо байдаг гэдгийг Т.Мөнхсайхан сайд суудлаасаа буухдаа, өмнө нь ч сануулсан. Тэрбээр “Эрүүл мэндийн салбарт олон жил ажилласан хүмүүс нь ажил хийлгэдэггүй юм байна” хэмээн хатуухан шүүмжилсэн удаатай. Ийн түүний дотнын найз нь салбарынхаа сайн мууг илчлээд сайдын суудлаа хүлээлгэн өгсөн. Тиймээс л С.Энхболд энэ бүх ужигрсан тогтолцоог халж, эрүүл мэндийн салбарт шинэ салхи оруулж чадах уу гэх хүлээлт байна.

Хэвлэлд өгсөн ярилцлагадаа тэрбээр салбартаа хийх эхний ажлаа “Эрүүл мэндийн байгууллагуудад гүйцэтгэлд суурилсан санхүүжилт нэвтрүүлэх” хэмээн тодорхойлсон байна. Цаашлаад эрүүл мэндийн бүх үйлчилгээг цахим хэлбэрт шилжүүлж, хөрөнгө оруулалт нэмэх, чанартай тоног төхөөрөмжөөр ханган нийлүүлэх шаардлага байгааг онцолжээ.

Ямартай ч С.Энхболдыг Эрүүл мэндийн сайдаар томилогдоод удаагүй байхтай зэрэгцэн коронавирусийн эсрэг вакцин орж ирлээ. Хэдий өмнөх Засгийн газрын үед эхлүүлж, бэлэн болгосон ажил ч С.Энхболд хүлээн авч, иргэдээ вакцинд хамруулах ажлыг зохион байгуулсан гэдгээрээ өндөр оноо авах нь гарцаагүй.

Гэхдээ тэр салбарынхаа бодлого, үйл ажиллагааг цар тахалтай энэ хүнд хэцүү цагт хэрхэн зөв тодорхойлж, яаж удирдахаас өмнөх сайдын араас хугацаанаасаа өмнө явах уу, эсвэл үлдэж санасан, төлөвлөсөн ажлаа хийх үү гэдэг нь шалтгаална. Тиймээс түүнийг хэр зөв нүүдэл, холч бодлого хэрэгжүүлэхийг харах л үлдлээ.

Эрүүл мэндийн сайд С.ЭНХБОЛД удирдагч уу, улс төрийн шахааны хүн үү

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2021-02-24 13:44:10

иргэн: хувийн эмлэгүүдийг цэгцлэх хэрэгтэй.улсын эмлэгт ажилдаг нэртэй ч хувийн эмнэлэгтээ ихэнх цагаа гаргадаг бол хувиийн секторт нь ажиллуулах хэрэгтэй