ХАЙРЫН НАЙРУУЛАГЧ

2024-05-18, 1494

Хайрын тухай, дурлалт хосуудын тухай олон өнгөөр тэр дэлгэн үзүүлдэг найруулагч юм байна. Одоо бол УДЭТ-ын тайзнаа түүүний найруулсан "Анна Каренина" жүжиг тоглогдож буй. Хайрынхаа төлөө амь амьдрал бүхнээ өгсөн Анна. Төрийн шагналт, Соёлын гавьяат зүтгэлтэн Дармын Батбаяр зохиолчийн "Хайрыг хайрла" жүжгийг ч Хүүхэд, залуучуудын тайзнаа дэглэн тавьсан. Багахан тэр зохиолыг баялаг болгон орчин цагийн залуусын дүр төрх, байр байдалд тун ойртуулан хүргэсэн байна лээ. Энэ хавар Н.Наранбаатар найруулагч гурван ч бүтээл ийн найруулсан юм байна шүү. Гурав дахь нь "Мөрөөдлийн театр"-ын уран бүтээлчид тоглоод буй "Тод хувцастай эмэгтэй" жүжиг. Эх хүний үр хүүхдийнхээ төлөө юугаа ч хийхээс буцахгүй агуу хайрыг харуулсан нэгэн хувилбар.

Ингээд харахаар тэр хайрыг, сэтгэлийг, хүн хоорондын нандин харилцааг өөрийнхөөрөө нарийн торгон мэдэрч найруулдаг найруулагч юм. Тун товчоор хайрын найруулагч гэж хэлж болмоор. "Хүн нэг л хэрэгцээгээр дутна. Тэр бол хайр" гэж тэр өөрөө ч хэлсэн. 2000 онд “Бооцоо” жүжгээр найруулагчийн гараагаа эхэлсэн байдаг.

Түүнээс хойш “Надаар тоглосон хайр”, “Жаргах гэж дурладаг уу”, “Дурлахыг хориглоно”, “Чи минийх”, “Шөнө амталсан нулимс”, “Нүцгэн дурлал”, “Хайрын виз”, “Нууц амраг чинь болъё”, “Галзуу дурлалт”, “Төлөөс”, “Нэргүй од”, “Надад өгөөгүй хайр”, “Парисийн дарь эхийн сүм”, “Би эр хүнд хайртай”, “Тэнгэрийн хүү”, “Цэцэрлэгт учирсан хоёр”, “Гамлет”, “Тэр чинь би”, “Ромео Жульетта”, “Бүсгүйн зурвас”, “Анна Каренина” зэрэг 40 гаруй жүжгийг найруулан тавьсан байна.

Төдийлөн зохиолыг нь цаасан хэлбэрээр нь уншаагүй үзэгчид театрт очиж жүжиг үзээд л хайрын олон хувилбар, хүн хүнээ уучилж өршөөх сэтгэл, эмэгтэй хүний сэтгэлийн дотоод мөн чанарт нэвтэрч, тэдгээрийг залуу, идэр насны галтай энэ найруулагч хэрхэн үзүүлснийг мэдэж, мэдэрсэн болов уу. Түүний нэг онцлог нь драмын урлагийн хамгийн уналттай үед ид залуухан мэргэжилтэн болон очиж байсан үе. Энэ үед Г.Эрдэнэбилэг, С.Болд-Эрдэнэ, Г.Амгаланбаатар, Н.Наранбаатар тэргүүтэй уран бүтээлчид орж хүсэл мөрөөдөл дүүрэн бүтээл туурвилаа эхлүүлсэн нь эргэн сэргэх гол хөшүүрэг болсон гэдэг. Тэд хамтран "Драмын дөрөв" хэмээх хамтлаг байгуулан дуулж байсныг ч үзэгчид андахгүй билээ. Н.Наранбаатар найруулагч 2016, 2017 онд Үндэсний их баяр наадмын ерөнхий найруулагчаар ажилласан.

2004 онд “Гэгээн муза I” наадмын шилдэг залуу уран бүтээлч шагнал, 2005 онд Г.Доржсамбуугийн нэрэмжит “Арслан” шагналын шилдэг найруулагч шагналыг хүртсэн. Тэрбээр “Театр бол эмчилгээний газар. Эмнэлэгт хүн биеэ оношлуулж, эмчлүүлдэг бол театрт ирээд сэтгэлээ засаж эмчлүүлдэг гэж би боддог. Өнөө цагт мэдлэгтэй, боловсролтой, чадвартай хүн олон байгаа ч сэтгэлтэй хүн цөөн байгаа мэт санагдах болсон. Хүний оюуны цангааг тайлж, соёлын боловсролыг түгээж, зөв суурьтай болгоно гэдэг их хариуцлагатай ажил” гэж ярьсан байдаг. Үнэхээр өөрийн тархи, оюунаас нэрж гаргасан бүтээлээрээ үзэгчдийн оюун санаа, зүрх сэтгэлийн цангааг тайлах их үүргийг тэр хүлээдэг. Хүлээсэн үүргээ нэр төртэй ч гүйцэтгэдэг. Аливааг угаас нь, үндсээс нь ойлгон ухаардаг, төнхөн эрдэг чанар түүнийг бусад найруулагчаас онцгой байлгадаг болов уу гэмээр. Тухайлбал, жүжигт хэлэх цаад гол санааг, мөн чанарыг, гол дүрийн энэлэл, шаналал, эрэл, хайлтыг бүрэн дүүрэн дэлгэдэг нь үзэгчийн хувьд найруулсан жүжиг бүрээс нь олж хардаг.

Ингэж найруулахаас гадна тэр бас тайз, дэлгэцийн дүрүүдтэй. Тайзнаа "Эрдэмтний яриа" жүжгийн Дорж, "Унаган хайр" жүжгийн Зохиолч, "Муурын байшин" жүжгийн Торой болон Минжийн дүр, "Талын баатар" -ын Пунцаг, "Эмч нар" -ын Нанзад, "Хар санаа, хайр сэтгэл” жүжгийн Фердинанд, “Саран хөхөө”-гийн номч түшмэл Дарма, “Атга нөж”-ийн Жамуха, “Харц хатан”-ы Ёндон зэрэг олон сайхан дүрийг чадварлаг бүтээсэн. Тэр театрынхаа тухай "Би бол театраа том газар очих гээд зорьж яваа асар том хөлөг онгоц гэж боддог. Заримдаа далайд шуурга болно, хөлөг онгоц дайвалзана, хогоо сэгсэрч хаяна. Тогтуухан өдөр хөвнө. Хааяа хамаг хүчээрээ хурдална. Хамгийн гол нь хөдөлгөөн. Энэ хөлөг онгоц тасралтгүй явж, хэзээ ч зогсдоггүй" хэмээжээ. Үүнтэй адил тэр ч мөн өөрөө театрын тасралтгүй явж, хэзээ ч зогсдоггүй том хөлөг онгоц юм байна.

ХАЙРЫН НАЙРУУЛАГЧ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид