Онц шаардлагатай, онцгой нөхцөлд иргэдээ хэрхэх талаар тусгай төлөвлөгөө, тактикгүй, олиггүй УОК-т монголчууд гомдож байна. Тэдэнд зөвхөн бүртгэж авсан хэдэн иргэнээ хонь, мал шиг онгоцны бүхээгт ачиж ирээд, хаана ч хамаагүй 21 хоног тусгаарлаж, мөнгө нэхэхээс өөр шидтэй зүйл алга. “Хар” толгойнд нь тусгаарлалтын 21 хоногийн хугацаа, төлбөр, төрөөс авах дэмжлэг, иргэдээс үзүүлэх хандив тусламжаас өөр бодогдох зүйлгүй харгис УОК-оос иргэд айж байна. Сандал дээр тухалж, хэдэн бичиг цаас нааш, цааш нь хөдөлгөж, иргэдээс ирсэн гомдол, мэдээллийг хэрхэн устгаж, үгүй хийх талаар толгойгоо гашилгаж суухаар бусад орноос суралцаач. 

 

  Тусгаарлалт нэртэй “шоронд” хоригдох хугацаандаа хэчнээн хүн хайртай дотны хүнээ холын хол үдэх юм бэ. Харийн оронд хорт хавдар гэх үхэлтэй таван сар нүүр тулж, бяцхан охиноо ганц удаа элгэндээ тэврэх гэж, үнсэх гэж амь тэмцэж ирсэн Б.Мөнхтуяа бүсгүй охинтойгоо уулзаж чадалгүй бурхны оронд заларсан. Тэр охинтойгоо уулзах гэж, тэнхэлгүй биедээ томдсон тусгаарлалтын хувцас өмсөж, шилэн хананы цаана сүүлчийн уулзалтаа хийсэн.Түүнийг яагаад охинтой нь эртхэн уулзуулж болоогүй юм бэ. Ийм зайлшгүй, үхэл, амьдрал тулсан, онцгой нөхцөлд ямар арга хэмжээ авч, яах ёстой, иргэнээ ямар боломж, нөхцлөөр хангах тухай нэг ч төлөвлөгөө, боловсруулсан баримт бичиг УОК-ийнхонд алга.

 

УОК-ын энэ харгислал ганцхан энэ бүсгүйгээр ч төгссөнгүй. Үхэлтэй амь тэмцэж, охиноо тусгаарлалтын хугацаагаа дуусгаад ирэхэд амьд байхын тулд хоёр халбага зутангаар амь зогоож байсан аав охинтойгоо уулзаж чадалгүй насан эцэс болжээ. Түүний охин Улаанбаатар зочид буудлын өрөөнөөс уйлан байж “Аавтайгаа салах ёс гүйцэтгэхийг минь зөвшөөрөөд өгөөч” хэмээн ярилаа. Тэр үрээ, аавыгаа гээд өөрийнхөө хамгийн нандин бүхнийг тусгаарлалтын байранд байхдаа алдчихлаа. Яагаад коронавирусын шинжилгээ нь удаа дараа сөрөг гарсан, 14 хоног тусгаарласан хүний хүслийг гүйцээж болоогүй юм бэ. Яагаад тусгаарлалтын хувцсыг нь өмсгөөд 10 минут аавтай нь уулзуулж болоогүй юм бэ. Яагаад хүчин мөхөс иргэддээ хүн чанаргүй хандаж байгаа юм бэ. Тусгаарлалтын төлбөрөө нэхсэн шигээ тусгаарлалтад байгаа иргэдийнхээ эрхийг, зайлшгүй шалтгаануудад хариуцлагатай, хүнлэг хандаж яагаад болдоггүй юм бэ.

 

Дэлхий нийтээрээ онцгой дэглэм, нөхцөлд ажиллаж буй энэ үед Монгол Улсыг хариуцаж буй УОК-ынхонд “КОВИД-19”-ийн үед ажиллах төлөвлөгөө, тактик,  цагийн байдалд тохируулах менежмент алга. Тиймээс онцгой нөхцөлд ажиллах чадваргүй, хүнээ гэсэн сэтгэлгүй УОК-ын удирдлагуудыг татан буулгая, Ерөнхийлөгч өө, Ерөнхий сайд аа.