Баянхонгор аймагт нэр дэвшиж ялалт байгуулсан А.Адъяасүрэн гишүүнийг авлига албан тушаалын хэргээр шалгагдаж буй гэсэн мэдээлэл бий. Тодруулбал, А.Адьяасүрэн нь нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100.000 ам долларын авлига өгсөн хэргээр АТГ-т шалгагдаж, сэжигтнээр татагдаад байгаа аж. Энэ талаар УЕПГ-аас хийж буй мэдээллийг үеэр “УИХ-ын гишүүн А.Адъяасүрэнгийн хэрэг мөрдөн байцаалтын шатанд явж байна. Иймд тодорхой мэдээлэл өгөх боломжгүй” хэмээн өчигдөр мэдээлсэн. Харин энэ талаар УИХ-ын гишүүн А.Адъяасүрэн  “Миний хувьд хувийн хэвшилд ажиллаж байсан. Төрийн байгууллагын хүмүүсийн эрх мэдлийн төлөөх тэмцэл, ашиг сонирхол үргэлжилж байгаа гэж харж байна. Сонгууль дууссан юм чинь удахгүй үнэн тогтоогдох байлгүй. Одоогийн байдлаар надаас мэдүүлэг авсан зүйл байхгүй. Надад хуулийн байгууллагаас албан бичиг ирж байгаагүй” хэмээн мэдэгдэв.