Монголын Хуульчдын холбооны Ерөнхийлөгч есдүгээр сарын 07-ны өдрийн 187 дугаар тушаалаар 40 хуульчийн гишүүнчлэлийн эрх болон хуульчийн мэргэжлийн үйл ажиллагаа эрхлэх зөвшөөрлийг хүчингүй болгожээ.

Хуульчийн эрх зүйн байдлын тухай хуулийн 26 дугаар зүйлийн 26.3 болон Монголын Хуульчдын холбооны дүрэмд зааснаар тус холбооны гишүүн, хуульчид сар бүр гишүүний татварыг тогтмол төлөх үүрэг хүлээдэг. Энэ удаад гурав ба түүнээс дээш сараар татвар төлөөгүй хуульчдийн үйл ажиллагааны эрхийг цуцалсан.

Цаашид гурван сараас дээш хугацаанд татвараа төлөөгүй гишүүдийн хуульчийн мэргэжлийн үйл ажиллагаа эрхлэх зөвшөөрлийг хүчингүй болгох, хуульчдын нэгдсэн бүртгэлээс хасах шийдвэр гаргах ажлыг шат дараатайгаар зохион байгуулна. Гишүүний үүргийн зөрчилтэй хуульчдыг зөрчлөө арилгахыг Монголын Хуульдын холбооноос анхаарууллаа.