Мөнгөний бодлогын хүүг нэг нэгжээр бууруулж 8 хувьд хүргэлээ
2020-09-15,   36

Мөнгөний бодлогын хүүг манай улс хамгийн сүүлд өнгөрсөн дөрөвдүгээр сард нэг нэгжээр бууруулж есөн хувьд хүргэсэн. Тэгвэл Монголбанкны Мөнгөний бодлогын хороо өчигдөр хуралдаж бодлогын хүүг нэг хувиар бууруулж 8.0 хувьд хүргэх, урт хугацаат репо санхүүжилтийг зах зээлд гаргах шийдвэр гаргалаа. Одоогийн зах зээл дээрх репо санхүүжилт нь 14 хоногийн хугацаатай бол шинээр гаргаж байгаа нь хоёр жилийн хугацаатай байх юм байна. Монголбанкны дэд ерөнхийлөгч Г.Энхтайван “Цар тахлын үед дэлхийн төв банкууд зах зээл дээр урт хугацаатай санхүүжилтийн хэрэгслийг гаргаж, түүгээрээ дамжуулан цар тахлын үед ашгиж байгаа эдийн засгийг дэмжих бодлого барьж байна. Монголбанк ч мөн энэ хэрэгслийг хугацаа алдалгүй зах зээлд нэвтрүүлэх нь зүйтэй гэж үзсэн. Энэ хүрээнд арилжааны банкууд дээр байгаа сайн зээлийг үнэт цаасжуулах ба үнэт цаасжуулсан портфолиог Монголбанк худалдан авч, тэр мөнгөө бодлогын хүүн дээр нэмэх нь 0.5 хувийн хүүтэйгээр эргүүлэн арилжааны банкуудад урт хугацаатай санхүүжилт олгох юм. Ингэснээр арилжааны банкууд хэрэглэгчдэд сарын нэг хувиас хэтрүүлэхгүйгээр зээл олгох боломжтой болно гэж үзэж байна” гэв. Өөрөөр хэлбэл, анх удаа зах зээлд нэвтрүүлж буй урт хугацаатай репо санхүүжилтийн үр дүнд хүү буурах нөхцөл бүрдэх юм байна.

Монголбанкны Нөөцийн удирдлага, санхүүгийн зах зээлийн газрын захирал А.Энхжин “Арилжааны банкуудын уул уурхайн бус экспортын салбарын аж ахуйн нэгж байгууллага болон жижиг дунд үйлдвэрлэл эрхлэгчдэд олгосон хэвийн зээлийг багцлан үнэт цаасжуулах замаар хоёр хүртэлх жилийн хугацаатай санхүүжилт олгоно. Банкууд өөрсдийн ашиг буюу бидний тооцоолж байгаагаар гурав орчим хувийн хүү нэмээд уул уурхайн бус экспортын салбар болон жижиг дунд үйлдвэрлэл эрхлэгчдэд 11.5 хувийн хүүтэй зээл олгох боломж бүрдэнэ гэж үзэж байгаа” гэв. Репо санхүүжилт хийх үйл ажиллагааг ирэх дөрөвдүгээр сард багтааж эхлүүлэх юм байна.

Цар тахлын нөлөөгөөр манай улсын эдийн засаг 2020 эхний хагаст 9.7 хувиар агшсан нь сүүлийн 20 гаруй жилийн хугацаанд тохиолдоогүй огцом уналт болсон. Эдийн засагт тодорхой бус байдал нэмэгдэж, гадаад болон дотоод эдийн засгийн идэвхжил суларч байгаа өнөөгийн нөхцөлд мөнгөний бодлогын хүүг бууруулснаар дотоод эрэлтийг тодорхой хэмжээнд дэмжих, эдийн засгийн идэвхжил сэргэх үед зээлийн хүүний харьцангуй таатай нөхцөлийг бий болгоход тодорхой хэмжээний дэмжлэг болох юм.


Мөнгөний бодлогын хүүг нэг нэгжээр бууруулж 8 хувьд хүргэлээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, XI хороолол, 14193-Их тойруу 43, "N tower" V давхар 501-2 тоот
7713-1414
ergelt.mn@gmail.com