• Өнөөдөр 2024-07-24

ТЭД БИДНИЙ ТУХАЙ: Монголын малчид өвс, тэжээл, юу ч үгүй зудын аюултай нүүр тулах нь

2023-11-22,   417

Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлүүдийг хөрвүүлэн хүргэдэг. Тэгвэл энэ удаагийн дугаартаа Берлинд төвтэй “BNE Intellinews” сайтын бичсэн нийтлэлийг хөрвүүлэн хүргэж байна.

-МОНГОЛЫН 13 АЙМАГ ЗУДЫН ЭРСДЭЛТЭЙ БАЙНА-

Монголын тал нутагт ган гачгийн дараах хахир хүйтэн өвөл ирж, малчин өрхүүд амь үлдэхийн тулд тэмцэж байна. Өвлийн эрс тэс уур амьсгалыг Монголд зуд гэж нэрлэдэг бөгөөд тал нутгийн нүүдэлчдийн хувьд зудын аюул маш аймшигтай байгалийн үзэгдлүүдийн нэг. Хур тунадас бага орсон зуны дараа их цас орж, эрс хүйтэрсний улмаас бэлчээрийн талбай хүрэлцэхгүй болж, мал сүрэг үгүй болж байна. Хүүхдийг ивээх сангаас Монгол малчин өрхүүдэд малын өвс, тэжээлээс эхлээд эрүүл мэндийн тусламж, үйлчилгээ, хэрэгсэл хэрэгтэй байгааг онцлон мэдээлжээ.

                        Монгол Улсад 1940-2015 он хүртэл 10 жил хоёр орчим удаа болдог байсан зуд цаг уурын өөрчлөлттэй холбоотойгоор өсөн нэмэгдэж, бараг жил бүр болох болжээ. Одоогийн байдлаар Монгол Улсын 21 аймгийн 13-т нь зудын эрсдэлтэй байгаа юм байна. Холбогдох байгууллагын мэдээллээр өнгөрсөн өвлийн улиралд Монголд температур хасах 40 хэм хүрч хүйтэрсэн бөгөөд зуд болж, бэлчээрийн талбайгүй болсноос мал сүргийн өвс, тэжээл хомстож, үй олноороо өлдөж үхэх болсон аж.

 

Албан мэдээллээр Монголд таван хошуу малаа маллаж, орлого олж амьдардаг 200 мянга гаруй өрх байдаг. Хүүхдийг ивээх сангаас зуд болсон нутагт байгаа 213 мянган хүн, түүний дотор 80 мянга гаруй хүүхдэд хүмүүнлэгийн тусламж шаардлагатай байгаа бөгөөд “Зудын үед тав хүртэлх насны хүүхдүүд хоол, хүнсний дутагдалд орох, амьсгалын замын өвчин, бэртэл гэмтэл авах эрсдэл өндөр байхад асран хамгаалагчид нь анхаарал халамж тавьж, эрүүл мэндийн тусламж үйлчилгээ авч чадахгүй байна” хэмээн онцолжээ.

Цаг уурын мэргэжилтнүүд Монгол Улсад зудын давтамж ойртож байгааг уур амьсгалын өөрчлөлт, хямралтай холбоотой гэж үзжээ. Сүүлийн жилүүдэд тус орны агаарын температур дэлхийн дунджаас хоёр дахин нэмэгдэж, хур тунадасны хэмжээ буурсан үзүүлэлттэй байгаа аж. Хур тунадас бага орж, хэмжээ нь буурсан нь зудын давтамж ойртож байгаагийн шалтгаан гэнэ.

Хүүхдийг ивээн сангаас Монголын Завхан аймгийн Их-Уул сумын иргэн 39 настай Дэлгэрбатынхаас сурвалжилга бэлтгэж, түүний эхнэр, гурван хүүхэд хэрхэн амьдарч, ямар хэцүү нөхцөл байдалтай байгааг хүмүүст хүргэсэн. Тус сурвалжилгад малчин Дэлгэрбат “Намайг бага байхад уур амьсгал тэс өөр байсан. Яг энэ цагаар цас хэдийнэ айлж, хавар болдог байлаа. Одоо бол зун нь хэт халуун, өвөлдөө хүйтэн, өвс, ургамал бага ургаж байна” хэмээн онцлон ярьжээ.

                          Өөр нэгэн жишээ дурдъя. ОХУ, Монголын хилийн бүс орчмын нэг тосгонд амьдардаг есөн настай Мягмарсүрэн “Энэ жил цас их орж, мал өвдөж, үрэгдсэн. Миний хайртай малын минь нэг Оргио гэдэг ямаа үхсэн. Уг нь Оргио намайг энхрийлж, гарнаас талх, чихэр иддэг байсан. Түмэн сүргийн дундаас намайг таниад гүйхээрээ ирдэг байсан сан. Одоо тэднийгээ үхэж, үгүй болж байгааг харах үнэхээр гунигтай байна” гэжээ.

 


ТЭД БИДНИЙ ТУХАЙ: Монголын малчид өвс, тэжээл, юу ч үгүй зудын аюултай нүүр тулах нь
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188