Улаанбаатар хотод болсон Засгийн газар хоорондын комиссын хуралдаанаар гурван орны хамтарсан “Сибирийн хүч-2” байгалийн хийн хоолойн Монголын хэсэг буюу "Союз Восток” хэсгийн бүтээн байгуулалтын ажлыг 2024 оны эхээр эхлэхээр ярилцжээ. Зөвхөн үүгээр ч зогсохгүй саяхан Францтай ураны салбарт хамтран ажиллах гэрээ байгуулаад байгаа Монголд ОХУ-ын талаас атомын цахилгаан станц барих санал тавьсан байна.

                  Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлийг хөрвүүлэн хүргэдэг. Тэгвэл энэ удаагийн дугаартаа Монгол, ОХУ-ын Засгийн хоорондын комиссын хуралдаан болон байгалийн хийн хоолойн талаар “Reuters”, “TASS” агентлагийн нийтлэлийн хөрвүүлэн хүргэж байна.

-МОНГОЛЫН ТАЛЫН “СОЮЗ ВОСТОК” ХИЙН ХООЛОЙН ХЭСГИЙГ 2024 ОНЫ ЭХЭЭР БАРЬЖ ЭХЭЛНЭ ГЭВ-

Монгол Улс болон ОХУ-ын Засгийн газар хоорондын комиссын хуралдаан Улаанбаатар хотод болов. Комиссын хуралдаанд Монголын талыг төлөөлж, Ерөнхий сайд Л.Оюун-Эрдэнэ, ОХУ-ын Шадар сайд Виктория Абрамченко нар оролцож, хэд хэдэн асуудлыг онцолж ярилцжээ.

                        Хоёр Засгийн газар хоорондын комиссын хурлаар онцолсон сэдвүүдийн нэг нь “Сибирийн хүч-2” байгалийн хийн хоолойн бүтээн байгуулалт. Оросын хойд нутгаас Монголоор дамжин Хятад руу жилд 50 тэрбум гаруй шоо метр байгалийн хий нийлүүлэх “Сибирийн хүч-2”-ийг барих талаар ОХУ-ын талаас олон жилийн турш Монголын талтай ярилцаж байгаа. Харин өнгөрсөн жил дэлбэрэлтийн улмаас эвдэрсэн “Норд урсгал-1” хоолойтой бараг тэнцэхүйц хэмжээтэй “Сибирийн хүч-2” хийн хоолой гурван талд сайн яригдаж байгаа бөгөөд Улаанбаатарт болсон уулзалтын дараа ОХУ-ын Шадар сайд Виктория Абрамченко “Монголын талын хийн хоолойн зураг төслийн баримт бичгийг ирэх орны эхний улиралд баталж, бүтээн байгуулалтыг нь эхлэх төлөвтэй байгаа” талаар мэдээлсэн байна.

Украинтай дайтаж байгаатай холбоотойгоор ОХУ эрчим хүчний экспортоо Европоос Ази руу чиглүүлж байгаа. Одоогоор ОХУ “Сибирийн хүч-1” хоолойг ашиглан БНХАУ руу тогтмол хий олборлож байгаа бөгөөд 2025 он гэхэд тус улс руу нийлүүлэх хийгээ 38 тэрбум шоо метрт хүргэх зорилт тавиад байгаа юм.

-ОХУ-ЫН ТАЛААС МОНГОЛД АТОМЫН ЦАХИЛГААН СТАНЦ БАЙГУУЛАХ САНАЛ ТАВЬЖЭЭ-

Оросын төрийн хэвлэл “TASS” агентлагаар ОХУ-ын талаас Монголд атомын цахилгаан станц байгуулах санал тавьсан талаар мэдээлжээ. Ердөө сар хүрэхгүй хугацааны өмнө Францын төрийн өмчит “Орано” групптэй ураны салбарт хамтран ажиллах гэрээ байгуулаад байгаа Монголд атомын цахилгаан станц байгуулах санал нь том завшаан болж байж ч мэднэ. Мөн энэ талаар ОХУ-ын Шадар сайд В.Абрамченко “Монголд бага оврын атомын цахилгаан станц байгуулах төслийг томоор харж байгаа” хэмээн мэдэгдсэн байна. Парисын хэлэлцээрт цөмийн эрчим хүч бага нүүрстөрөгч ялгаруулдаг гэж үзсэн байдаг бөгөөд Францтай ураны салбарт хамтран ажиллах Монголд атомын цахилгаан станцтай болох нь дахин шат ахисан үйлдэл болох юм.

-ОХУ, МОНГОЛ ХУДАЛДААГАА НӨХӨРСӨГ БУС ОРНЫ ВАЛЮТААР ХИЙХЭЭС ТАТГАЛЗАЖ, ХӨДӨӨ АЖ АХУЙН ЗЭРЭГ БАРААГ ТАТВАРГҮЙ ИМПОРТЛОХООР БОЛОВ-

Монгол, ОХУ-ын Засгийн газар хоорондын комиссын хуралдаанаар хоёр орны худалдаа, эдийн засгийн хамтын ажиллагаа, эрчим хүч, хөдөө аж ахуй, зам тээврийн дэд бүтэц, боловсрол болон бусал салбарын хамтын ажиллагааны хэд хэдэн асуудлыг чухалчилж, ярилцсанаас хоёр орон хөдөө аж ахуйн зэрэг хэд хэдэн бүтээгдэхүүнийг татваргүй импортлохоор тохиролцсон байна. Мөн уулзалтаас гарсан чухал шийдвэрүүдийн нэг нь хоёр орон худалдаагаа найрсаг бус орны мөнгөн тэмдэгтээр хийхээс татгалзсан саналд нэгдсэн талаар Оросын төрийн хэвлэл “TASS” агентлаг мэдээлжээ.

                     Тухайлбал, бүс нутгийн хэмжээнд худалдааны урсгал нэмэгдэж байгаа бөгөөд үүнтэй холбоотойгоор энэ онд ОХУ-ын малын тэжээлийн нөөц 2.5 дахин их, үр тарианы нөөц долоо дахин нэмэгдсэн гэнэ. Хоёр орны худалдааны дийлэнх нь шатахуун, шатах материалын худалдаа байдаг бөгөөд ОХУ Монголын нийт нефтийн бүтээгдэхүүний 80 гаруй хувийг бүрдүүлдэг. Үүнийг ч ОХУ-ын Шадар сайд Виктория Абрамченко “Монгол бол ОХУ-ын сайн түнш” гэж тодорхойлсон бөгөөд хоёр орны Засгийн газар хоорондын комиссын хуралдаанаар дээрх төрлийн бараа бүтээгдэхүүний худалдаагаа нөхөрсөг бус орны валютаар хийхээс татгалзахад санал нэгдсэн байна. 2023 онд ОХУ-ын үндэсний мөнгөн тэмдэгтийн худалдааны эргэлт өнгөрсөн оныхоосоо хоёр дахин өссөн үзүүлэлт гарсан. Тэгвэл эрчим хүч, шатахуун зэрэг бүтээгдэхүүн худалдан авдаг Монгол Оросын мөнгөн тэмдэгтээр худалдааг нь хийж эхэлбэл бүс нутгийн хэмжээнд рублийн ханш чангарах төлөвтэй байгаа юм.

Ташрамд дурдахад, 2022 онд ОХУ, Монголын худалдааны эрэлт 42 орчим хувиар нэмэгдэж, 2.6 тэрбум ам.долларт хүрсэн байдаг. Тэгвэл энэ оны эцэс гэхэд хоёр орны худалдааны эрэлт түүхэн дээд хэмжээндээ хүрч, гурван тэрбум гаруй ам.долларт хүрэх төлөвтэй байгаа юм байна.