"Бүс ба зам" санаачилгын 10 жилийн ойг тохиолдуулан тус олон улсын хамтын ажиллагааны гурав дахь дээд хэмжээний уулзалтыг БНХАУ-ын талаас зохион байгуулж байна. Дээд хэмжээний уулзалтад БНХАУ-ын дарга Ши Жиньпинээс гадна ОХУ-ын Ерөнхийлөгч Владимир Путин, Монгол Улсын Ерөнхийлөгч У.Хүрэлсүх нар оролцож байгаа бөгөөд хурлын үеэр гурван орны удирдагчид зөвхөн "Бүс ба зам" төдийгүй эдийн засгийн бүс бий болгох, хийн хоолойн төслөө хурдан гүйцэтгэх талаар ярилцсан гэнэ.

                         Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлийг хөрвүүлэн хүргэдэг. Тэгвэл энэ удаагийн дугаартаа Монгол Улсын Ерөнхийлөгч У.Хүрэлсүхийн оролцож байгаа "Бүс ба зам" санаачилгын дээд хэмжээний уулзалтын үеэр юу болж өрнөсөн, яригдсан талаарх "East Asia" сайтын нийтлэлийг хөрвүүлэн хүргэж байна.

-В.ПУТИН, У.ХҮРЭЛСҮХ НАРЫН УУЛЗАЛТ-

Арванхоёрдугаар сарын хүйтний эрч чангарсан үеэр монголчуудад авлига, хээл хахуулийг эсэргүүцэн төв талбай дээрээ жагсаж байлаа. ОХУ, БНХАУ-ын дунд хэцүүхэн суудаг Монголд эсэргүүцлийн жагсаал эрчээ авсан нь Азийн ардчилал сүйрэх гэж байгаа юм шиг харагдаж байлаа. Гэсэн ч тийм зүйл болоогүй. Эсрэгээрээ монголчуудын хийсэн жагсаал голоо олсон, чухал байсныг 2023 он гарснаас хойш Монголд айлчилсан Францын Ерөнхийлөгч Эммануэль Макрон, Польшийн Ерөнхийлөгч Анжей Дуда, Германы Гадаад хэргийн сайд Аннален Баербок тэргүүтэй улстөрч харуулж байна.

                       Гурван сая гаруй хүн амтай Монгол Улс дээр дурдсан орнуудтай стратегийн ач холбогдолгүй ч уул уурхайн нүүрс, зэс зэрэг чухал ашигт малтмалаар баялаг. Тэр дундаа сүүлийн жилүүдэд цөмийн эрчим хүчдээ түлхүү анхаарах болсон Францад шаардлагатай уранаар баялаг аж. Энэ ч утгаараа Францын Ерөнхийлөгч Монголд айлчлахдаа суурийг нь тавьсан ураны асуудлыг Монголын төрийн тэргүүн эцэслэхээр саяхан Парис хотод айлчилж, хэлэлцээ хийн хамтын ажиллагааны баримт бичигт гарын үсэг зураад ирсэн.

                       Тэгвэл Францыг зорьж олон сая ам.долларын гэрээ байгуулсан Монголын Ерөнхийлөгч У.Хүрэлсүхийн нүүдэл ингээд зогссонгүй. Тэрбээр Бээжинд болж байгаа "Бүс ба зам" санаачилгын дээд хэмжээний уулзалтад өөрийн биеэр оролцож, БНХАУ, ОХУ-ын төрийн тэргүүнтэй хэд хэдэн зүйл дээр санал нийлж тохирсон гэх. Худалдаа, аж үйлдвэр, уул уурхайн экспорт нь бараг 100 хувь хоёр хөршөөсөө хамааралтай байдаг Монгол Улс сүүлийн жилүүдэд шинэ түнш хайх болсон. Гэхдээ "Бүс ба зам"-ын дээд хэмжээний уулзалтаар Монголын төрийн тэргүүн ОХУ-ын Ерөнхийлөгчөөс эх орондоо айлчлахыг урьжээ. Цаашлаад "Сибирийн хүч-2" хийн хоолойн төслийг хурдан бүтээхийн тулд ОХУ-ын талаас Монголд айлчлахыг үгүйсгэхгүй бөгөөд уулзалтынхаа үеэр хоёр орны худалдааны салбарыг нэмэгдүүлэх тухайд амлалт өгсөн гэнэ.

 -БАЙГАЛИЙН ХИЙН ХООЛОЙН ТӨСӨЛ БА ӨВӨРМОНГОЛД БАЙГУУЛАХ ХУДАЛДААНЫ БҮС-

ОХУ, БНХАУ-ын хооронд байгалийн хий дамжуулах “Сибирийн хүч-2” хоолойг Монгол Улсын нутгаар дамжуулан барих ажил эхэлсэн. Жилд ойролцоогоор 50 тэрбум шоо метр хий тээвэрлэх хүчин чадалтай тус хоолой нь ОХУ байгалийн хийгээ БНХАУ, бусад Азийн орон руу чиглэх нийлүүлэлтээ нэмж, Зүүн хойд Азийн эрчим хүчний аюулгүй байдлын динамикийг өөрчлөх чухал ач холбогдолтой төсөл. Тэгвэл уг төсөл хэрэгжсэнээр Монгол Улсад бодит үр өгөөж өгч, хоёр автокрам хөршийн дунд “хавчуулагдсан” гэдгээрээ гаднынханд танигдсан тус улсад чухал нөлөө үзүүлэх юм.

Монголын талын эцсийн зорилго нь “Сибирийн хүч-2” хоолойг улсаараа дайруулж, хийн дамжуулалтаас тодорхой хэмжээний орлого олж, худалдан авагч болох. Тус улсын хувьд хийн дийлэнх хувийг ОХУ-аас авдаг бөгөөд шинэ өөрчлөлтийн төлөө Монголын Засгийн газар Москва, Бээжинтэй ирээдүйн төслүүд дээр хамтран ажиллахад бэлэн байгаагаа илэрхийлжээ.

Монгол Улсын эдийн засаг нүүрсний экспортоос хамааралтай. Харин үүнийгээ өөрчилж, БНХАУ, ОХУ-ыг оролцуулаад Азийн бусад оронтой хамтарч, эдийн засгаа төрөлжүүлэхийг эрмэлзэж байна. Автократ хоёр орны дунд хавчуулагдсан Монгол Улс ОХУ, Украины дайны туршид төвийг сахисан байр сууриа хадгалахыг хичээсэн. Энэ ч үйл явдал зарим талаараа далайд гарцгүй Монголд сөргөөр нөлөөлж, Украинаас ОХУ-аар дамжин Монголд хүрдэг байсан импортын бараа тасарсан нь дотоодод үнийн өсөлт газар авахад хүргэсэн.

                     Тэгвэл Бээжинд болж байгаа "Бүс ба зам"-ын дээд хэмжээний уулзалтын үеэр ОХУ, БНХАУ, Монголын төрийн тэргүүн нарын дунд байгалийн хийн хоолойн ажлыг түргэвчлэх, түргэвчлэх тусмаа Монголд ашигтай байж болох урсгал, эдийн засаг, худалдааны бүс бий болгох талаар ярьсан гэнэ. Тухайлбал, Бээжингийн талаас Өвөрмонголын нутагт шинээр томоохон хэмжээний аж ахуй, худалдааны бүс байгуулахаар зэхэж буй бөгөөд тус бүсээр дамжуулан ОХУ, Монголтой худалдаа, наймааны "цонх"-оо сэлгэх боломжтой болж байгаа юм байна.