Өнгөрсөн сарын сүүлчээр Москва хотод зохион байгуулсан аюулгүй байдлын асуудлаарх гурван талт хэлэлцээрийн үеэр ОХУ, БНХАУ Монголын “гуравдагч хөрш”-ийн бодлогод оролцохгүйгээ мэдэгдэж, НҮБ-ын Аюулгүйн зөвлөл, ШХАБ-д элсэхэд дэмжлэг үзүүлнэ гэжээ.

Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлийг хөрвүүлэн хүргэдэг. Тэгвэл энэ удаагийн дугаартаа “Xinhua” агентлаг, “China Daily” сонины бичсэн тоймыг хөрвүүлэн хүргэж байна.

                             Өнгөрсөн есдүгээр сарын 19-нд ОХУ-ын нийслэл Москва хотод аюулгүй байдлаар асуудлаар Монгол, ОХУ, БНХАУ гурван талт хэлэлцээ зохион байгуулжээ. Гурван талт хэлэлцээрт Монгол Улсыг төлөөлж Үндэсний аюулгүй байдлын зөвлөлийн нарийн бичгийн дарга Ж.Энхбаяр, ОХУ-ын Үндэсний аюулгүй байдлын зөвлөлийн нарийн бичгийн дарга Николай Патрушев, БНХАУ-ын Гадаад харилцааны сайд Ван И нар оролцсон байна. Бүс нутгийн хувьд Орос, Монгол, Хятад гурав гадаад худалдаа, наймааны сүлжээ бий болгосон нэгнийхээ байнгын түнш төдийгүй “найрсаг” хөршүүд гэж болно. Тэгвэл өнгөрсөн хэдэн жилд үүсээд байгаа шинэ нөхцөл байдалтай холбоотойгоор гурван талын хамтын ажиллагааг тэлж, нэгнийхээ газарзүйн давуу тал, ашиг сонирхолдоо нийцүүлэх шаардлага гарсан нь “Сибирийн хүч-2” тив дамнасан байгалийн хийн хоолойн төсөл. Уг хийн хоолойн төслийг ч гурван орны хэлэлцээрээс маш онцгойд хүлээн авч, хэлэлцсэн бөгөөд хэлэлцээрт яригдсан зарим асуудал нийтэд ил болоогүй байгаа юм.

ХЭН ЮУ ХЭЛЭВ:

Монгол, ОХУ, БНХАУ-ын гурван талт хэлэлцээрийн үеэр гурван талын төлөөлөгч олон нийтэд мэдээлэл өгөх үедээ,

Монголын Үндэсний аюулгүй байдлын зөвлөлийн нарийн бичгийн дарга Ж.Энхбаяр “ОХУ, БНХАУ-тай сайн хөршийн найрсаг харилцаагаа хөгжүүлэх нь Монгол Улсын гадаад бодлогын тэргүүлэх чиглэл. Монгол Улс нэг туйлт байдлын эсрэг байдаг бөгөөд хоёр хөрштэйгөө улс төрийн итгэлцлийг тууштай бэхжүүлж, бүс нутгийн хамтын ажиллагааны загвар болох гурван талт хамтын ажиллагааг бий болгохыг зорьж байна”,

ОХУ-ын Үндэсний аюулгүй байдлын зөвлөлийн нарийн бичгийн дарга Николай Патрушев “Гурван тал олон улсын болон бүс нутгийн асуудлууд дээр ижил байр суурьтай байдаг. Түүнчлэн өнгөт хувьсгал гарахаас сэргийлж, гаднын хөндлөнгийн оролцоог хамт эсэргүүцэх болно. Олон туйлт тогтолцоог баримтлан тэгш, шударга олон улсын дэг журам байгуулна”,

                              БНХАУ-ын Гадаад хэргийн сайд Ван И “Зүүн хойд Ази бол дэлхийн хамгийн динамик бүс нутгуудын нэг бөгөөд дэлхийн аюулгүй байдлын халуун цэг төвлөрдөг газар. Энд хөгжлийн чухал боломжууд бий” гэсэн байна.

Гурван талт хэлэлцээрт оролцсон орнуудаас БНХАУ хамтын ажиллагаагаа гүнзгийрүүлэх, бүс нутгийн хөгжил, тогтвортой байдлыг дэмжих уриалга гаргаж байгаа нь “Сибирийн хүч-2” байгалийн хийн хоолойн төслийн ажлыг түргэсгэх агуулгатай харагдаж байгаа бөгөөд Монгол, ОХУ-ын төлөөлөгчид азнасан, нэгнийгээ “тандсан” байдалтай оролцсон гэж болох юм.

-ГУРВАН ТАЛ БҮС НУТАГТ ШИНЭ ГЕОПОЛИТИКИЙН ОРЧИН ҮҮСГЭНЭ-

Монгол, ОХУ, БНХАУ өнгөрсөн сард болсон гурван талт хэлэлцээрээс өмнө 2015 онд гурван талын дээд хэмжээний уулзалт хийж байв. Харин энэ удаагийн хурал 2015 оны үеийн дээд хэмжээний уулзалтаас тэс өөр уур амьсгалтай байсан бөгөөд гурван талт хэлэлцээрийн дараа БНХАУ-ын Гадаад хэргийн сайд Ван И Монголын Үндэсний аюулгүй байдлын зөвлөлийн нарийн бичгийн дарга Ж.Энхбаярыг Хятадад айлчлахыг урьсан байгаа юм. Хэрэв Ван Игийн урилгаар Ж.Энхбаяр БНХАУ-д айлчилбал гурван талт хэлэлцээ зөвхөн гурван орны асуудлаас гадна Төвөд, Шинжаан зэрэг бүс нутгийг хамруулж болохуйц байна.

ТАЙЛБАР: "Сибирийн хүч-2" хийн хоолойн төсөл

Мөн Москвад болсон гурван талт хэлэлцээрийн дараа Монгол Улс нэгэн чухал шийдвэр танилцуулсан нь Монгол Улсын Ерөнхийлөгчийн албан ёсны цахим хуудсаар дамжуулан “Үндэсний аюулгүй байдлын үзэл баримтлалын 60 гаруй хувийг өөрчлөх, шинэчлэх шаардлагатай”-г мэдэгдсэн байгаа юм. Гэсэн ч ойрын хугацаанд бүс нутгийн асуудал намжихааргүй байгаа учир үндэсний аюулгүй байдлын үзэл баримтлалаа өөрчлөх хуулийн төслийг яаран Монгол Улсын Их хуралд өргөн барихгүй болов уу.

                                Монгол Улс өнгөрсөн хэдэн жилийн турш НҮБ-ын Аюулгүйн зөвлөлд элсэх, тэр дундаа Аюулгүйн зөвлөлийн байнгын гишүүнээр нэгдэх сонирхолтой байгаа. Тэгвэл Монголын НҮБ-ын Аюулгүйн зөвлөлд элсэх ажлыг ОХУ, БНХАУ-ын талаас бүрэн дэмжиж, зөвхөн Аюулгүйн зөвлөл ч бус ШХАБ-д элсүүлэхээр дэмжинэ гэдгээ гурван талт хэлэлцээрээр мэдэгдээд байгаа юм байна. Хэрэв БНХАУ, ОХУ-тай хамтран тив дамнасан “Сибирийн хүч-2” байгалийн хийн хоолойн төсөл хэрэгжүүлж байгаа Монгол Улс санасандаа хүрч, НҮБ-ын Аюулгүйн зөвлөл, ШХАБ-д элсэж чадвал гурван орон хамтран бүс нутагт шинэ геополитикийн орчин бүрдүүлнэ. Гурван талын шинэ геополитикийн орчинд Хойд Солонгос, Өмнөд Солонгос, Япон, Казахстан зэрэг түнш хамтарч болзошгүй байгаа бөгөөд Улаанбаатарын хувьд нэн ач холбогдолтой болж байгаа юм.