• Өнөөдөр 2021-04-18

СОНГИНОХАЙРХАН ДҮҮРГИЙН ЗАСАГ ДАРГА Н.АЛТАНШАГАЙ ТА алдрай үрсийн аминд ч хүрч мэдэх тоглоомын талбайнуудаа хэзээ янзлах вэ

2021-04-07,   374

         Одоогоос гурван жилийн өмнө хөл бөмбөгийн талбайн төмөр унаж, талбайд тоглож байсан тавдугаар ангийн хүү амиа алдсан харамсалтай хэрэг гарч байв. Өнгөрсөн оны тавдугаар сарын 3-нд Чингэлтэй дүүргийн XVII хорооны нутаг дэвсгэрт байрлах тоглоомын талбайд тоглож байсан есөн настай охины дээрээс төмөр гулсуур мөн л  унаж, уушгиа тайруулахад хүрсэн. Мөн 2020 оны есдүгээр сард Баянзүрх дүүргийн XIV хороонд байрлах “Цагаан хуаран” хотхоны тоглоомын талбайд тоглож байсан зургаан настай охины дээрээс бэхэлгээгүй гулсуур унаж, баруун гараа хугалж, зөөлөн эдийн гэмтэл авсан зэрэг хамгийн аюулгүй тоглох газраа хүүхдүүд аюулд өртсөн тохиолдол удаа дараа гарч байв. Урин цаг ирж буй энэ үед гадаа тоглох хүүхдийн тоо эрс нэмэгддэг. Хэдий цар тахлын нөхцөл байдлаас шалтгаалж гадаа тоглох хүүхдийн тоо өмнөх жилүүдээс цөөн байгаа ч хүүхдийн тоглоомын талбайн аюулгүй байдлыг хангах ёстой. Тиймээс бид хүүхдийн тоглоомын талбайн аюулгүй байдлыг хэрхэн хангасан эсэхийг цувралаар сурвалжлан хүргэж буй.

          Бид өмнөх дугаартаа Баянзүрх дүүргийн тоглоомын талбайнууд хүүхдүүдэд ямар аюул заналхийлж байгааг сурвалжлан харуулсан. Тэгвэл энэ удаад Сонгинохайрхан дүүргийн хүүхдийн тоглоомын талбайнууд аюулгүй байж чадаж байгаа эсэхийг сурвалжиллаа.

СХД XVII хороо 120 дугаар байр:

-Уг байрны дэргэдэх талбай дээр шувууны толгойн хэлбэртэй тоглоом байх аж. Тус тоглоом нь дээд хэсэгтээ маш том хагарч, хог шороогоор дүүрчээ. Энэ тоглоом хүүхдүүдийн гар, хөлийг эсгэж мэдэх аюултай харагдана.

СХД XXIX хороо 131 дүгээр байр:

-131 дүгээр байрны гаднах гулсуурын хуванцар шатны доод суурь боолтнууд нь бүгд унажээ. Мөн шатны хэсэгтээ том хагарсан харагдана. Хүүхдүүдийн тоглох дуртай гулгуур  нь хэзээ мөдгүй нурах шахсан байгаа нь том аюул.

СХД VIII хороо наймдугаар байр:

-Тус байрны гаднах тоглоомын талбайн төв цамхагийн хоёр багананы суурь боолтнууд унаж, салхины аясаар хоёр тийш ганхах аж. Хэзээ мөдгүй унах шахсан энэ цамхаг хүүхдүүдийг дарж мэдэх нь.

СХД XIX хороо тавдугаар байр:

-V байрны гаднах тоглоомын талбайн савлуур хүүхэд гэмтээхэд бэлэн болжээ. Тус савлуурны тавцанг модоор хийж, гинжээр холбосон байх бөгөөд аажимдаа модон тавцан нь элэгдэж, хэзээ мөдгүй сэтрэх дөхжээ.  Дунд ангийн хүүхэд суугаад хэд хүчтэй савлуурдахад нь сэтэрч мэдэхээр болж.

СХД XIX хороо 55Б байр:

-55Б байрны гаднах талбайн хатуу цементээр бүрхэгдсэн ба эргэдэг тавцан нь ирмэгээ тойрч хугарсан байв.

СХД XVIII хороо 35 дугаар байр:

-Уг байрны гаднах талбайн гулсуур дамжих шат салсан харагдана. Мөн тус шатны доор байрлах хүүхдийн жижиг савлуур нь гагнаасаараа салж, унжсан байдалтай байв.

СХД XVIII хороо долдугаар байр:

-VII байрны гадна тоглоомын талбайн гулсуур бэхэлгээгүй болжээ. Хоёр, гурван хүүхэд зэрэг гулгавал хажуу тийш унахад бэлэн болсон байна. Мөн дугуйн төхөөрөмж нь эвдэрч, эргэхээ больжээ.

СХД XVIII хороо “Болор” цэцэрлэг:

-Тус цэцэрлэгийн зүүн талд байрлах модон гулсуур бэхэлгээ нь нэлээд муудсан бололтой хазайсан байх бөгөөд хүчтэй салхи гарахад л хоёр тийш найгах аж.

СХД XVII хороо 33 байр:

-Уг байрны гаднах талбайн гулсуур нь дээд болон доод хоёр хэсэгтээ хагарчээ. Мөн гулсуурны хажуу хэсгийн хамгаалах хаалтны зарим боолтнууд нь хаягдаж унжсан байдалтай байв.


СОНГИНОХАЙРХАН ДҮҮРГИЙН ЗАСАГ ДАРГА Н.АЛТАНШАГАЙ ТА алдрай үрсийн аминд ч хүрч мэдэх тоглоомын талбайнуудаа хэзээ янзлах вэ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтггэгдэл үлдээсэн: 2021-04-07 17:42:54
    бодол: Мөнгө өгвөл л байлгүй
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, XI хороолол, 14193-Их тойруу 43, "N tower" V давхар 501-2 тоот
7713-1414