33 настай эрэгтэй Б, 35 настай эрэгтэй У гэх этгээдүүд цахим сүлжээнд “Хөдөө орон нутгийн иргэдэд туслалцаа үзүүлнэ” гэх зар байршуулж, нас барсны хуурамч бичиг баримт үйлдэн орон нутгийн иргэдийг хотоос гаргасан хэргийн талаар бид ЦЕГ-ийн Хэвлэл мэдээллийн төвийн ахлах мэргэжилтэн М.Мөнхшүрээс тодруулан хүргэсэн. Тэгвэл уг гэмт хэргийг үйлдсэн Б, У гэгч этгээдүүдээс ямар шалтгааны улмаас залилан хийсэн тухай тодрууллаа.

-Ямар шалтгааны улмаас энэ гэмт хэргийг үйлдэх болсон бэ?

У: Санамсаргүй гэх юм уу, сайн мэдэхгүй, ойлгохгүй байна.

-Нийт хэчнээн хуурамч бичиг баримт үйлдсэн бэ?

У: Би компьютер дээр хийх юмнуудыг л хийсэн. Буяны бичгээр замын хөдөлгөөнд оролцуулж байгааг харсан. Өөр бусад шалтгаантай жолоочид хөдөлгөөнд оролцохгүй. Буяныг бичгийг харж байгаад компьютер дээрээ хийсэн. Манай найз зүрхний өвчтэй, эмнэлэгт үзүүлэх шаардлагатай, явж чаддагүй. Тэгээд л “хийчихье” гээд хуурамч бичиг баримт үйлдсэн. Цаашаа юу болсныг би сайн мэдэхгүй байна.

-Нас барсны гэрчилгээг иргэдэд зарахдаа мөнгийг нь яаж авдаг вэ?

У: Би тэр мөнгө төгрөгийг мэдэхгүй. Зүгээр л компьютер дээрээ  юм хийдэг. Хөлс надад байхгүй.

Б: 150 мянган төгрөг авдаг.

-Бичиг баримт хуурамчаар үйлдвэл эрүүгийн хуулиар хариуцлага хүлээнэ. Энэ талаарх ойлголт, мэдлэг байсан уу?

Б: Байхгүй.

Автомашиндаа 10 хонож байна, хорт хавдартай энд ирээд орцонд гурав хонож байна, харьж чадахгүй байна гэсэн ихэвчлэн үр хүүхдээ орон нутагтаа орхисон иргэд холбогдсон

-Таны хувьд яллагдагчаар шалгагдаж байх хугацаандаа дахин залилах гэмт хэрэг үйлджээ. Ямар шалтгааны улмаас энэ төрлийн гэмт хэргийг дахин үйлдэх болсон бэ?

Б: Хийсэн үйлдэлдээ харамсч байна. Хүмүүст тусалъя гээд мэдэхгүйгээсээ болоод буруу юм хийсэн байна. Манай найз компьютер ийм юм хийж өгөөд, би тэрүүгээр нь замын хөдөлгөөнд саадгүй оролцож байсан. Автомашиндаа 10 хонож байна, хорт хавдартай энд ирээд орцонд гурав хонож байна, харьж чадахгүй байна гэсэн ихэвчлэн үр хүүхдээ орон нутагтаа орхисон иргэд холбогдсон. Тэр хүмүүст тусалъя гэж бодсон. Тийм шалтгаантай хүмүүст 12 ширхэгийг өгсөн.

-Аль аймгийн иргэдэд хуурамч бичиг баримт зарж, хотоос гаргасан бэ?  

Б: Дорнод, Хэнтий, Ховд аймгийн 30 орчим хүн холбогдсоноос 12 хүнд 150 мянгаар бичиг баримт гаргаж өгсөн.