ЦОНХООР ХАРСАН ТЭР ЭМЭГТЭЙ ХААЛГА НЭЭГЭЭД ОРООД ИРСЭН…

Д. Бямбасүрэн:
Соёл урлаг

2026-04-02, 632

ТЕАТР

-“Цонхоор харсан хүн” моно жүжигт тоглосон-

Урлаг хэмээх байшингийн цонхоор харж байсан тэр эмэгтэй хаалга нээн инээмсэглэн орж ирээд, дотор нь амьдарч хэдийнэ олон сайхан дүрийн эзэн болсон билээ. Энэ бүхэн түүний анхны уран бүтээлийн нэг болох Д.Урианхайн “Цонхоор харсан хүн” моно жүжгээс үүдэлтэй гэдэг. Найруулагч Б.Баатар агсны урилгаар жүжигт тоглоно, түүнээс санал ирнэ гэдэг гарцаагүй онцгой нэгэнд л оногдох хувь байх. Тэгээд болоогүй моно жүжиг гэдэг уран бүтээлчээс хэд дахин илүү чадвар, сэтгэл, ажиллагаа шаарддаг учир хэрийн хүн бүтээгээд байхгүй. Гагцхүү Одноог энэ бүтээлээр өөрийгөө бүрэн нээн харуулж чадна гэдгийг найруулагч мэдсэн учраас л түүнд урилга илгээсэн биз ээ.

-Үүнээс урьд-

Соёл урлагийн их сургуулийн оюутан охинд өөрийгөө хөгжүүлж, таниулахад чухал сургалт болдог байсан нь “3.27”, “Гэгээн муза” наадам. Тиймдээ ч тэр урлагийн сургуулийн оюутнуудын дунд болдог “3.27” наадамд Марша Норманы “Тавтай нойрсоорой, ээж ээ” жүжгээр оролцож, шагнал хүртсэн байдаг. Энэ тухай “Х-ТҮЦ продакшны нэрэмжит шагнал хүртсэн минь миний театрын жүжигчин болох хүслийг улам оргилуулсан” хэмээж.

-“Ардын элч” киноны Ариунаа хэмээгдсэн-

"Сургуулиа төгсөөд, театрт шалгалт өгөөд гарч явтал “Хөөе, “Ардын элч”-ийн Ариунаа” гээд дууддаг юм байна. Эргээд хартал, театрын Б.Баатар найруулагч зогсож байна. Тэрбээр “Чамайг хүмүүс тэгж хэлж байгаагүй юу. Би чамайг харна аа, хэдийнэ тоо болохыг чинь” гэж хэлээд, яваад өгсөн" гэж тэр анх театрт орсон тухай яриандаа онцлон дурсдаг.

-Тайзнаа-

Театрын тайзнаа “Алтан түлхүүр”-ийн Буратиногоор эхэлж, “Яаж амьдрах вэ”-гийн Кира, ”Сарны цагаан хус”-ын шоронгийн бүсгүй, “Эцсийн зогсоол зөвхөн чи” –гийн Сильвия, “Буруугүй буруутан”-ны Навчаа, “Хэлж зүрхлээгүй хайр”-ын Жавхаа, “Би эндээс явахгүй”жүжгийн Сэрчмаа зэрэг бүтээлийн гол болон туслах дүрийг бүтээсэн байна. Драмын театрт түүний өнгөрүүлсэн 13 жил энэ.

ДЭЛГЭЦ

-“Фантастик”-ийн Одноо-

“Фантастик” продакшны бүтээл “Аз жаргалын шок” киноны нөхрийнхөө биед ордог багш эмэгтэйн дүрийг нь үзэгчид санаж байгаа байх. Цаашлаад тус продакшны “Том толгойтын романс”, “37-р Точка”, "Буруу өрөг" гээд олон бүтээлд гар нийлсэн. Цөм Одноог илэрхийлсэн оновчтой дүрүүд."Фантастик" бол түүний уран бүтээлийн салшгүй "нөхөд". Найруулагч Б.Тамиртай нэг үеийн уран бүтээлчид бөгөөд үеэлүүд. Энэ ч утгаар ойлголцож ажиллахад илүү амар байдаг гэдгийг тэр хэвлэлд өгсөн ярилцлагадаа онцолж байв.

Түүнээс гадна "Хайр эргэсэн хавар", "247 градус", "Хүсэл", "Өнөр бүл өнөө цагт", "Намайг хайрла", "Нинжин сэтгэл", "Солонго, Үүл", "Фукуокт нэг удаа", "Гурав дахь цохилт", "Гарц" зэрэг кинонд гол болон туслах дүрийг чадварлаг бүтээсэн. Тэр дундаа “Гэрлэн дохио”-гийн ааштай ч ажил хэрэгч эхнэрийн дүр, “Насан туршдаа"-гийн дурлалт эмэгтэй, "Гурав дахь цохилт"-ын гэнэн итгэмтгий бүсгүйн дүр нь үзэгчдэд тод байдаг аа.

-Продюсераар ажиллаж, гол дүрд нь тоглосон анхны бүтээл "Солонго, Үүл"-

Одноогийн “OI” энтертайнментийн залуустай хамтран “Дона” энтертайнментийг байгуулан продюсераар нь ажилласан анхны бүтээл нь “Солонго Үүл”. Үүгээрээ тэр уран бүтээлчийнхээ хувьд дотроо бодож явдаг нэгэн мөрөөдлөө биелүүлж, өөрийн санаачилсан, дуу хоолойгоо хүргэх бүтээл хийж чадсан. Тэгэхээр Одноог театрын тайзнаас эсвэл аль нэг киноны дүрээр нь мэдэх үзэгчид арай өөрөөр эл уран бүтээлээс харсан болов уу. Дараа нь тэр “OI” энтертайнментийн залуусын хийсэн “No Rules-2” кинонд бүхнийг өөрийн хүслээр хийдэг хотын даргын охин, айлын амьдралыг үймүүлдэг шийдсэн эмэгтэйн дүрд ажилласан байдаг.

-Гэрэлмаа мөрдөгч-

“Гарц” киноны Гэрэлмаа мөрдөгчийг санаж байгаа байх, үзэгчид. Гэрэлмаа мөрдөгч нэг хором ч шантрахгүйгээр ажилласны хүчинд гэмт хэрэг, хууль бус бүхний үүр уурхай болсон “DH” группыг буулган авч, Буянтогтох ерөнхийлөгчийг шоронд суулгадаг ч түүний тэмцэл бүрэн дуусаагүй. Гол тулалдагч болох Содоо аавыг нь торны цаана хорьж, өөрийг нь үхээд босоход нөлөөлсөн мөрдөгч, мөн ах, дүүст өс санаж, хөдөлж эхэлдэг. Мөрдөгчдийн баг араас нь мөшгөж эхлэх тусам тэр ах, дүүс, ар гэрийнхэнд нь хохирол учруулж, тэднийг нэг нэгээр нь хөнөөхөөр "онилно". Мөрдөгчдөд ганц Содоо ч биш Филиппин дэх тэдний ар тал ч мөн анхаарлаа хандуулах гол хүмүүс. Үндсээр нь л таслахгүй бол урган нахиалчихаад аюул тарьж мэдэх энэ сүлжээ хүмүүсийг хуулийн хариуцлага хүлээлгэж, улс орноо жаахан ч болов "цэвэрлэж" авах, хүүхдүүдийнхээ ирээдүйг гэрэл гэгээтэй, айх айдасгүй байлгах том мөрөөдөл Гэрэлмаа мөрдөгчийнх. Гэсэн ч санаан зоргоор дийлдэх амаргүй хүмүүс. Юу ч хийж мэдэх, хэнийг нь ч хайрлахгүйгээр амийг нь авах, аминаасаа илүү хайртай охин, нөхөр хоёрыг нь ч эрсдэлд оруулж мэдэхээр хүмүүстэй тэмцэнэ. Ийм зэвүүн, мөнхүү няхуур, эр зоригтой эмэгтэй мөрдөгчийн дүрийг Б.Одончимэг жүжигчинг бүтээнэ гэж Б.Саруулбуян найруулагч бодсон нь зөв болсон.

Сүүлд харин тэр “Тамгагүй төр” жүжгийн Цэцэр хатны дүрээр үзэгчидтэйгээ уулзаж, дараа нь Б.Тамир найруулагчийн ээлжит бүтээл “Тусгаар тогтнол” кинонд тоглосон. Одоо харин “Намайг дагуулаад яваач” гэх цоо шинэ жүжгийн продюсераар ажиллаж, гол дүрд нь тоглохоор бэлдэж байна.

ЦОНХООР ХАРСАН ТЭР ЭМЭГТЭЙ ХААЛГА НЭЭГЭЭД ОРООД ИРСЭН…

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.