Монгол Ардын намынхан Монголын томоохон үйлдвэрүүдийг “Шалгана, шударга ёс тогтооно, төрийн мөнгийг идэж, уусан хүмүүстэй хариуцлага тооцно, шахааг таслан зогсооно” хэмээн “том амалж”, сүр дуулиантайгаар ажлаа эхлүүлдэг ч тэгэсхийгээд чимээгүй болдог дэг тогтжээ. Үүний нэг жишээ нь, “Эрдэнэт үйлдвэр”. 

Засгийн газар тус үйлдвэрт “Онц байдал тогтооно” гэдгээ мэдэгдэж, Ажлын хэсгийн ахлагчаар ЗГХЭГ-ын даргаар ажиллаж байсан Л.Оюун-Эрдэнийг томилсон билээ. Харин өнгөрсөн намар Ерөнхий сайд асан У.Хүрэлсүх “Эрдэнэт үйлдвэр”-ийг шалгах Ажлын хэсгийн ахлагчаа сольж, Шадар сайд асан Я.Содбаатарт даалгав. Ингээд Шилэн хочит Б.Цогтгэрэл “Эрдэнэт үйлдвэр”-ийн захирал Х.Бадамсүрэнг “харлуулах” ажиллагааг зохион байгуулсан байдаг. Тэрбээр тус үйлдвэрийн шилэн дансны мэдээллийг олон нийтэд дэлгэсэн билээ. Харин үйлдвэрийн дарга Х.Бадамсүрэн Засгийн газраас “шидсэн чулуун”-д бүдэрч, хувьдаа завшсан хөрөнгө, мөнгөө олон нийтэд дэлгүүлсэн юм. 

Тухайлбал, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн үйлдвэрийн мөнгөөр охиныхоо сургалтын төлбөр болох 100 гаруй сая төгрөгийг төлүүлсэн, хувийн орон сууцаа тохижуулсан, хагас тэрбумын үнэтэй автомашин, мөнгөн аяга, массажны сандал, уран зураг худалдаж авсан гээд хэдэн тэрбумаар тоологдох хөрөнгийг хувьдаа завшсан нь ил болоод байгаа. Мөн алтан чимэглэл бүхий брэндийн тавилга худалдаж авсан гэх баримт ч ил болсон билээ. 

Түүнчлэн “Эрдэнэт” үйлдвэрийн мөнгийг Х.Бадамсүрэн захирал нь ганцаараа хувьдаа ашигладаггүй нь Шилэн дансны мэдээллээр ил болсон. Тухайлбал, Тамгын газрын дарга Д.Баярболд, Тэргүүлэх менежер Н.Энхбаатар нар “Эрдэнэт” үйлдвэрийн мөнгөөр сар бүр өндөр үнэтэй орон сууцны түрээсээ төлүүлдэг баримт байна. Ингэхдээ сар бүр 6-12 сая төгрөгийг бэлнээр авч байсан нь анхаарал татаж байсан юм. 

Энэ мэт “Идэж, уусан хэргийг шалга” хэмээн ЗГХЭГ-ын дарга асан Л.Оюун-Эрдэнийг явуулсан ч тэр хэдэн сарын дараа “Эрдэнэт үйлдвэр”-ийн захирал Х.Бадамсүрэнг цээжээрээ хамгаалаад өнгөрч байсан билээ. Тэрбээр “Эрдэнэт үйлдвэр” ашигтай ажилласандаа бардаад тансагласан зүйл байгаа, сануулга өгсөн” хэмээн ичих ч үгүй хэлээд сууж байсан. 

Харин МАН-ынхан “Эрдэнэт үйлдвэр”-ийн захирал Х.Бадамсүрэнг тал, талаас нь шахаанд оруулж байж, 650 тэрбум төгрөгийг гаргуулж чадсан байдаг. Тус мөнгөөр Монгол Улсын бүх айл өрхийн цахилгаан, дулаан, тогны мөнгийг тэгэлнэ хэмээн Ерөнхий сайд асан У.Хүрэлсүх мэдэгдэж байв. Үүнээс хойш “Эрдэнэт үйлдвэр”-ийн захирал Х.Бадамсүрэнг “баалах” ажил нэг ёсондоо зогссон юм. Шилэн хочит Б.Цогтгэрэл ч “Эрдэнэт үйлдвэр” гэсэн үг амнаасаа унагахаа больсон билээ. 

Харин өдгөө У.Хүрэлсүхийн Засгийн газар бүрэлдэхүүнээрээ огцорч, тус үйлдвэрийг шалгах ажиллагаа ч бүр намжив бололтой. Одоо У.Хүрэлсүхийн оронд Л.Оюун-Эрдэнэ Ерөнхий сайд болох гэж байна. Олны өмнө Х.Бадамсүрэнг өмөөрч байсан хүн “Эрдэнэт үйлдвэр”-ийг шалгах нь юу л бол. Харин он гарснаас хойш АТГ болон ТЕГ, ЦЕГ-ын хамтарсан баг “Эрдэнэт үйлдвэр”-т шалгалт хийсэн гэх мэдээлэл бий.  Энэ үеэр “Эрдэнэт үйлдвэр”-ийн хөрөнгөөр худалдаж авсан, 47 мянган еврогийн үнэтэй алтан чимэглэл бүхий тавилгыг нууцаар зөөж байгаад хамгаалалтын цагдаа нарт баригдсан гэх албан бус мэдээлэл ч байгаа юм.

Хэрвээ хууль хүчний байгууллагаас Х.Бадамсүрэн тэргүүтэй “Эрдэнэт үйлдвэр”-ийн удирдлагуудыг шалгаж байгаа нь үнэн бол шалгалтын дүнг олон нийт тэсэн ядан хүлээж байгааг сануулъя.