Төрөөд удаагүй эмэгтэйг коронавирусийн халдвар авсан хэмээн нярай хүүхэдтэй нь ХӨСҮТ рүү тусгаарлахаар авч явахдаа халаад, нимгэн өмд, углааштай нь машинд суулган хүний эрхийг ноцтой зөрчсөн үйлдэл гаргасан нь Улсын онцгой комиссын дарга Я.Содбаатарыг огцроход хүргэв. Амаржаад удаагүй эмэгтэй дор хаяж сарын хугацаанд гам барих ёстой.

Гэтэл өвлийн хүйтэнд халаад, углааштай нь хүйтэн машинд суулгаж, амны хаалт ч үгүй аманд нь дэр бариулаад гаргасан үйлдэл бол манай эрүүл мэндийн салбар хэр цэвдэг, харгис болсныг тодорхой харуулсан явдал билээ. Энэ үйлдэлд салбарын сайд Т.Мөнхсайхан мөн хариуцлага хүлээж огцрох хүсэлтээ Ерөнхий сайдад өчигдөр өгөв. Тэр “Миний хариуцаж байгаа асуудал биш ч хариуцлага хүлээгээд огцорч байна” гэх мэдэгдэл хийв. Тэднийг огцруулахаар олон зуун иргэн коронавирусийн халдварыг үл тоон төв талбайд жагсаж, эрх нь зөрчигдсөн эх хүү хоёр болон бусад иргэний өмнөөс дуу хоолойгоо нэгтгэлээ.

Жагсаал үр дүнгээ өгч, Засгийн газар оройжин хуралдсаны эцэст Я.Содбаатар, Т.Мөнхсайхан нарыг УОК-оос “явуулах” шийдвэр гаргасан байх. Хөшигний ард Ерөнхий сайд У.Хүрэлсүх багагүй бухимдсан сурагтай. Түүнд Шадар сайд Я.Содбаатарыг явуулах амаргүй байгаа аж. Учир нь Шадар сайд "Эрдэнэт" үйлдвэрээс эхлээд Монголын томоохон төслүүдийг шалгах Ажлын хэсгийг хариуцаж байгаа. Гэтэл нөгөө талд Эрүүл мэндийн сайд Т.Мөнхсайханыг огцруулахгүй гэх “цахим жагсаал” өрнөж эхэллээ.

Тэдний огцрох хүсэлтийг Ерөнхий сайд У.Хүрэлсүх эцэслэн шийднэ. Хэрвээ тэр хүсвэл олон нийтийн хүсэлтийг хүлээн авч, Эрүүл мэндийн сайдыг аваад үлдэх биз. Харин хэн нэгэнд хариуцлага тооцож, бухимдсан иргэдийн “галыг” намжаахгүй бол нөхцөл байдал өөр рүү нь эргэж, түүний удирдаж байгаа Засгийн газар унаж мэдэхээр байгаа. Тиймээс Ерөнхий сайд У.Хүрэлсүх Шадар сайд Я.Содбаатарыг явуулах нь ойлгомжтой байна.

Тэгэхээр цар тахал, хөл хорионы энэ хүнд үед Улсын Онцгой комиссын дараагийн дарга хэн байх вэ гэдэг асуудал Төрийн ордонд аль хэдийн яригдаад эхэлжээ. Хэд хэдэн хүний нэр Шадар сайдад яригдаж байгаагийн хамгийн магадлал өндөртэй нь УИХ-ын гишүүн асан, Ерөнхий сайдын ахлах зөвлөх Ж.Энхбаяр байгаа аж. Түүнчлэн хотын дарга асан, УИХ-ын гишүүн С.Амарсайхан, Гадаад харилцааны сайдаар ажиллаж байсан Д.Цогтбаатар нарын нэр яригдаж байгаа ч хуулиараа Засгийн газарт давхар дээлтэй дөрвөн гишүүн л байж болох заалттай. Тэгэхээр С.Амарсайхан нарын гишүүд Шадар сайдын албыг хаших боломжгүй бөгөөд гаднаас томилох нь тодорхой байна.