..."Төрийн ордноор дүүрэн төөрсөн гишүүд байна" гэж сонгуулийн дараахан ам уралдан ярьцгааж байсан. Зарим нь тэднийг "Өрөөгөө яаж олцгооно доо" гэж хүртэл дооглож байлаа. Харин тэр цагаас хойш буюу шинэ парламент бий болоод гурван сар хэдийнэ өнгөрчээ. Монголын ард түмэн олон гишүүнтэй болсныхоо хэргийг, шинэ залуу гишүүдийнхээ нэмэрийг ээлжит бус чуулганы эхний өдрүүдээс хүртэж эхэллээ хэмээн зарим нь ам сайтай байна. Энэ долоо хоногт УИХ-ын ээлжит бус чуулганаар Төсвийн тухай хуульд өөрчлөлт оруулах тухай  хууль хэлэлцэхээр байгаа. Өнгөрсөн хэд хоногийн хугацаанд УИХ-ын гишүүд шинэ, хуучин гэлтгүй бие биеийхээ, салбар салбарынхаа болж бүтэхгүйг шүүмжилж, бодит байдал, тоо, жишээ яриулж байгаа нь сайшаалтай харагдсан. Зарим нь ч үнэндээ юу ярихаа мэдэхгүй, юуны тухай хэлэлцэж байгааг ойлгохгүй нэгэндээ загнуулах нь энүүхэнд. УИХ-ын гишүүдийн ярьсан зарим марзан үг, үйлдлийг жишээ болгон хүргэе.

ЗАХЫН СУМДЫГ ЦӨӨЛЖ, НЭГТГЭХИЙГ ЗОРЬЖ БУЙ Н.БАТСҮМБЭРЭЛ

 УИХ-ын гишүүдээс сумдыг цөөлөх туйлын хүсэлтэй нэг хүн байгаа нь Н.Батсүмбэрэл. Тэрбээр чуулганы хуралдааны үеэр “Засгийн газрын үйл ажиллагааны хөтөлбөрийг дэмжиж байгаа. Үйл ажиллагааны хөтөлбөр ирэх дөрвөн жилийн бодлогын гол баримт бичиг байна. Тэр дундаа бүсчилсэн хөгжлийн асуудлыг нэлээд дэмжиж байгаа. 2024 оны УИХ-ын 67 дугаар тогтоолоор Монгол Улсын Бүсчилсэн хөгжлийн үзэл баримтлал батлагдсан байна. Үүнийг сайтар хөгжүүлэх шаардлага байна. Энэ жилийн УИХ-ын сонгууль зургаан бүс түшиглэж хийгдлээ. Бүсчилсэн хөгжлийн үзэл баримтлалын хүрээнд бүс болж буй аймгуудын аль нь төв нь байх вэ гэдгийг эдийн засгийн болон хүн амын нягтаршил, байгалын хүчин зүйлийг тооцоолж оруулах нь зүйтэй байна. Цаашлаад, сумдыг хооронд нь нэгтгэх, заримыг нь  нэгтгэх зах хязгаар сумдыг цөөлж, нэгтгэж загварчилах шаардлагатай. Үүнийг Засгийн газрын төлөвлөгөөнд оруулах нь зүйтэй гэж үзэж байна” гэв. Харин Г.Тэмүүлэн гишүүн Төсвийн тогтвортой байдлын тухай хуульд нэмэлт өөрчлөлт оруулах тухай хуулийн төслийг хууль санаачлагчид эргүүлэн татах горимын санал УИХ-аар дэмжигдсэн. Энэхүү саналыг Төсвийн байнгын хороо дэмжээгүй. Тиймээс Г.Тэмүүжин гишүүний горимын саналаар Төсвийн тогтвортой байдлын тухай хуулийг хууль санаачлагчид буцаахаар болсон.

ТӨХӨӨРӨМЖӨӨ АЖИЛЛУУЛЖ ЧАДАХГҮЙ САНАЛ ХУРААЛТААС ХОЦОРДОГ С.БЯМБАЦОГТ

  Тухайн үед С.Бямбацогт сайд төхөөрөмж ажилласангүй хэмээн мэлзэж, саналыг хүчингүй болгох горимын санал гаргаж байсан. Олон гишүүнтай парламентийн давуу тал гарлаа хэмээн иргэд үзэж буй. Харин МАН-ын бүлэг уг асуудлаар байр сууриа нэгтгэх шаардлагатай хэмээн энэ сарын 26-ны 10:00 цаг хүртэл завсарлага авсан. Мөн тухайн өдрөө МАН-ын Бүлгийн дарга Л.Мөнхбаатар “Төсвийн тогтвортой байдлын тухай хуулийг бүлгээрээ хэлэлцэх шаардлагатай хэмээн УИХ-ын даргаас нэмэлт нэг хоногийн завсарлага авсан.

 УИХ-ЫН ГИШҮҮН С.ЦЭНГҮҮН: СУМЫН ТӨВД СОЁЛЫГ ТӨВ ХЭРЭГГҮЙ 

 Мөн сумын төвд соёлын төвөөс илүүтэйгээр цахилгаан эрчим хүч чухал байна хэмээн залуу гишүүн С.Цэнгүүн байр сууриа илэрхийлсэн. Тэрбээр "100 тэрбумаар 24 суманд соёлын төв барих шаардлагагүй. Урсгал зардал дунд шаардлагагүй олон зардал байна" гэсэнд Б.Жавхлан сайд "Та Улаанбаатар хотод төрж, өсөөгүй юм шиг байна. Соёлын төв бол сумын ард түмний цугладаг ганц газар байдаг" хэмээн С.Цэнгүүнийг дийлэв.

ТӨРИЙН АЖЛЫГ ХУВИАСАА САНХҮҮЖҮҮЛСЭН ГЭЖ ТОМРОХ Ч.НОМИН

  Соёл, спорт, аялал жуулчлал, залуучуудын сайд Ч.Номин өөрийн хамаарал бүхий "Тэрэлж" зочид буудалдаа Азийн улс төрийн намуудын эмэгтэйчүүдийн жигүүрийн наймдугаар хуралдааныг хувиасаа санхүүжүүлж, зохион байгуулсан гэх мэдээлэл сүүлийн хэд хоног олон нийтийг бухимдуулсан.  Тэрбээр өөрийн цахим хуудастаа "Азийн улс өрийн намуудын эмэгтэйчүүдийн уулзалтыг хувиасаа санхүүжүүлсэн. Та бүхэн санаагаа чилээх хэрэггүй" хэмээн тайлбар хийсэн байдаг. Тодруулбал, "Миний бие тус байгууллагын Эмэгтэйчүүдийн жигүүрийн тэргүүнээр өнгөрсөн онд сонгогдон ажиллаж байгаа бөгөөд өнгөрөгч 19-ний өдөр Улаанбаатар хотноо зохион байгуулагдсан Эмэгтэйчүүдийн жигүүрийн наймдугаар хуралдааныг төрийн ажил бус улс төрийн ажлын хүрээнд өөрийн хариуцсан үүргийн дагуу зохион байгуулсан. Эмэгтэйчүүдийн жигүүрийн наймдугаар хуралдаан нь сайн дурын үндсэн дээр, олон улсын байгууллагын санхүүжилт, хувийн санхүүжилт болон ТББ-ын хандив тусламжаар хийгдсэн. Энэхүү арга хэмжээтэй холбогдуулан Тэрэлж зочид буудалд болсон үйл ажиллагаанд зориулан төсвөөс ямар нэгэн санхүүжилт гараагүй болно" хэмээн баярхаж, АТГ-т шалгуулах эсэх дээрээ тулаад байгаа. 

ЛАЙВААР БАРАА ЗАРЖ, ЁС ЗҮЙН ХОРООНООС САНУУЛГА АВСАН АНХНЫ ГИШҮҮН М.НАРАНТУЯА-НАРА

    УИХ-ын М.Нарантуяа-Нарад хариуцлага тооцуулах тухай хүсэлтийг УИХ-ын Тамгын газраас Ёс зүй, дэгийн байнгын хороонд хүргүүлсэн. М.Нарантуяа-Нара "Би анхнаасаа УИХ-ын гишүүн болж төрөөгүй, надад энэ талын туршлага одоохондоо алга. Жишээ нь, УИХ-ын гишүүн гадаад руу явахдаа яах вэ гэдгийг би мэдээгүй байсан. Шинэ гишүүдэд энэ талын сургалт ороход би өвчтэй байсан учраас сууж чадаагүй юм. Гишүүн болохоос өмнө 10 гаруй жилийн хугацаанд би олон түмний нүдэн дээр амьдарч байгаа. Шагнал, шийтгэл нь ямар байдаг вэ гэдгийг сайн мэднэ. Гэхдээ надад хууль дүрэм зөрчсөн бус харилцаа хандлагын асуудал байгаа. Би давхар ажил эрхлээд давхар орлого олсон явдал байхгүй. Алдаагаа ухамсарлаж байгаа” гэсэн юм.