Одоогоос 16 жилийн өмнө, 2008 оны долдугаар сарын 1-ний өдөр түмэн нь төр рүүгээ чулуу нүүлгэж, хариуд нь төр нь түмэн рүүгээ онь шагайж, гох дарсан. Төр, түмэн хоёрын эл “цуст тулгаралт”-аар таван иргэн амиа алдаж, бас олон арван хүн эмнэлэг рүү, бас хорих руу хүргэгдсэн түүхтэй. Тэгвэл “Долдугаар сарын 1”-ний үймээнээр амиа таван иргэний ар гэрийнхэн ЦЕГ-т гомдол гаргажээ. Тодруулбал, тэд “Долдугаар сарын 1”-ний үймээний хэргийг сэргээн шалгаж, жагсаалыг эхлүүлсэн, үймээн болтол нь дэвэргэсэн, өдөөн турхирсан буруутнуудыг олж тогтоож, хариуцлага тооцож, 16 жил хурж, хуримтлагдсан гомдлыг нь тайлж өгөхийг хүсэж, ийнхүү ЦЕГ-т гомдол гаргажээ. Гомдлын дагуу ЦЕГ-аас хэрэг бүртгэлийн хэрэг нээж, “Долдугаар сарын 1”-ний хэргийг сэргээн шалгаж эхэлсэн байна.
Эх сурвалжийн мэдээлснээр, хохирогчдын ар гэрийнхний гомдлын дагуу “Долдугаар сарын 1”-ний үймээний гол зохион байгуулагч, өдөөн турхирагчаар оролцсон Ж.Батзандан, О.Магнай, “Буян”-гийн Жагаа нарыг ЦЕГ-аас шалгаж эхэлсэн гэнэ. Түүхийг нэхэн санавал, 2018 оны зургадугаар сарын 30-нд УИХ-ын тав дахь удаагийн сонгууль явагдаж, МАХН 41, АН 29, бусад намууд дөрвөн суудал авсан. Маргааш нь буюу 2008 оны долдугаар сарын 1-ний өглөө БНН-ын дарга Б.Жаргалсайхан буюу “Буян” Жагаа, Иргэний хөдөлгөөний Ж.Батзандан, О.Магнай нар “МАХН-ынхан сонгууль луйвардсан” хэмээн хатгаж, ятгасан хэвлэлийн хурлууд хийж, иргэдийг төв талбайд цуглуулсан. Улмаар “Буян” Жагаа, Ж.Батзандан, О.Магнай нар төв талбайд жагсагчдыг МАХН-ын төв байр буюу одоогийн Тусгаар тогтнолын ордон руу дагуулан авч явсан. Ингэснээр МАХН-ын төв байрны гадаа цагдаа болон жагсагчдын хооронд мөргөлдөөн гарч, МАХН-ын байр шатаж, эцэст нь дөрвөн иргэн буудуулж, нэг иргэн шатаж амиа алдсан. Тухайн үед “Буян”-гийн Жагаа, Ж.Батзандан, О.Магнай нарыг жагсаал зохион байгуулсан, иргэдийг өдөөн турхирч, үймээн самуунд уруу татсан гэж үзэж Ганц худагт цагдан хорьсон боловч жил ч бололгүй батлан даалтад гаргаж, удалгүй Ц.Элбэгдорж Өршөөлийн хуульд хамруулж хэрэгсэхгүй болгосон байдаг.
Сонирхуулахад, “Долдугаар сарын 1”-ний үймээний хохирогчдын ар гэрийнхэн эл хэргийг сэргээн шалгуулахаар хууль хяналтынханд хандаж буй нь анхных биш юм. Тодруулбал, “Долдугаар сарын 1”-ний үймээнээс дөрвөн жилийн дараа буюу 2012 онд хохирогчдын ар гэрийнхэн Ж.Батзандан, О.Магнай, “Буян” Жагаа нарын хэргийг сэргээн шалгуулах хүсэлт гаргаж байсан ч тухайн үеийн Ерөнхий прокурор Д.Дорлигжав “Ж.Батзандан, О.Магнай нарын хэргийг сэргээх шалгах хууль зүйн үндэслэлгүй” гэж эрс няцааж, буцаасан байдаг.
Ж.БАТЗАНДАН, О.МАГНАЙ, “БУЯН”-ГИЙН ЖАГАА НАРЫГ “ДОЛДУГААР САРЫН 1”-НИЙ ҮЙМЭЭНИЙ БУРУУТНААР ШАЛГАЖ ЭХЭЛСЭН ГЭВ ҮҮ |
|