Хакүхо М.Даваажаргалын Миягино дэвжээний сүмоч Хокүсэйхо А.Даваанинж хаврын башёг өнжихөөр болсон мэдэгдэлтэй зэрэгцэн түүнийг дэвжээнийхээ бөхчүүдийг дээрэлхэж, хүчирхийлдэг тухай мэдээлэл гарсантай холбоотойгоор Хокүсэйхо болон түүний багш Хакүход хариуцлага хүлээлгэж, Миягино дэвжээг хаах хүртэл асуудал яригдаж байгаа. Тэгвэл Японы мэргэжлийн сүмогийн 69 дэх их аварга Хакүхо М.Даваажаргалыг “хөөдөж”, монголчуудын сүмогийн спортод хөл тавих гүүр болж байсан Миягино дэвжээг хаах эсэх дээр нь тулгаад байгаа Хокүсэйхо А.Даваанинж гэж хэн болохыг танилцуулж байна.

-ХОКҮСЭЙХО А.ДАВААНИНЖ ГЭЖ ХЭН БЭ-

А.Даваанинж 2001 оны арваннэгдүгээр сарын 12-нд Улаанбаатар хотод төрсөн бөгөөд таван нас хүртлээ Монголд амьдарч байгаад гэр бүлийн хамт Япон руу нүүжээ. Улмаар бага сургуулиасаа эхлэн Японд суралцах болсон А.Даваанинжийн сүмо сонирхож, хичээллэх болсон шалтгаан нь Хакүхо М.Даваажаргал гэнэ. Тодруулбал, А.Даваанинж зургаан настай байхдаа гэр бүлийн хамт Монгол руу явж байгаад Сөүлийн нисэх онгоцны буудал дээр тухайн үед Ёкозүна байсан М.Даваажаргалтай таарчээ. Зургаан настай А.Даваанинж Ёкозүна М.Даваажаргалтай ярилцаж, дурсгалын зураг татуулсан нь түүнийг сүмогийн спортод хөл тавих эхлэл болсон байна. Улмаар А.Даваанинж бага сургуулийн сурагч байхаасаа сүмогийн спортоор хичээллэж эхэлсэн ч сургуулилалт нь хэт хатуу, ширүүн гэсэн шалтгааны улмаас хэсэг завсарлаад байж. Харин Сөүлийн нисэх онгоцны буудал дээр таарч байсан тухайн үеийн Ёкозүна М.Даваажаргал А.Даваанинжтэй холбогдож, зөвлөгөө өгснөөр үргэлжлүүлэн сүмогийн спортоороо хичээллэх болсон гэнэ. Бага наснаасаа эхлэн сүмогоор хичээллэсэн А.Даваанинж ахлах сургуульдаа тэмцээн, уралдаанд орж, хэд хэдэн ахлах сургуулийн томоохон сүмогийн тэмцээнд түрүүлсэн бөгөөд сургуулиа төгссөний дараа албан ёсоор Миягино дэвжээнд орж, өөрийг нь сүмод хөтөлсөн Хакүхо М.Даваажаргалын шавь болсон аж. Хокүсэйхо А.Даваанинж Япон Улсын иргэншилтэй.

Тэрбээр мэргэжлийн сүмогийн замналаа 2020 оны гуравдугаар сард эхлүүлсэн байдаг. Цар тахлын улмаас үзэгчгүй болсон эхний барилдаанууддаа украин сүмоч Шиши, Сэкивакэ агсан Такаторикигийн хоёр дахь хүү, Охогийн төрсөн ах Хозан Такамори нартай хийсэн байдаг. Миягино дэвжээнд орсон цагаасаа ирээдүйтэй сүмоч гэгдэж байсан хоёр метр өндөр, 180 кг орчим жинтэй А.Даваанинж мэргэжлийн сүмогийн эхний гурван тэмцээнийхээ 21 барилдаанд нэг ч уналгүй бүгдэд нь ялалт байгуулж, зиндаа тус бүр аварга болсон байна. Жонокүчигээс макүшита хүртэлх бүх төрөлд аварга болсноор Точиазүма буюу Таманой оякатагаас хойших анхны сүмоч болжээ. Ийн зиндаа бүрд амжилт үзүүлж байсан А.Даваанинж “Хакүхогийн адил 21 насандаа Ёкозүна болохыг хүсэж байна” хэмээн орон нутгийн хэвлэлд ярьж байсан аж.

Харин одоо дэлхийн хэдэн сая сүмо сонирхогчийн анхаарлын төвд ороод байгаа Хокүсэйхо А.Даваанинжийн асуудал хоёрдугаар сарын сүүлчээр дэгдсэн. Тухайлбал, Хокүсэйхо А.Даваанинжийг тойрсон асуудлын тухай мэдээлэл гарахаас өмнө буюу өнгөрсөн сарын дундуур Миягино дэвжээнээс мэдэгдэл хийж, түүнийг хаврын башёд оролцох боломжгүй болсон талаар мэдээлсэн. Харин тус мэдэгдлээс хойш Хокүсэйхо дэвжээний бөхчүүдээ дээрэлхэж, хүчирхийлдэг байсан тухай мэдээлэл гарч эхэлсэн бөгөөд эхэндээ сүмо сонирхогчид хэвлэлийн дайралт гэж үзэж байсан ч Хокүсэйхо өөрөө мэдэгдэл хийн уучлалт хүсэж, зодог тайлах болсноо мэдэгдсэн. Шалгалтаар Хокүсэйхо А.Даваанинж нь дэвжээнийхээ залуу бөхчүүдийг удаа дараа зодож, хүчирхийлдэг, шүүрний ишээр нүүр, нуруу, бөгс, эмзэг эрхтэн рүү цохидог, угаалгын өрөөнд түгжиж, цавуу, шавж устгадаг бодис цацдаг байсан нь тогтоогдсон байна. Мөн уг асуудалтай холбоотойгоор Сүмогийн холбооноос Хокзсэйхог зодог тайлуулж, багш Хакүхо М.Даваажаргалыг нь шавиа удирдан чиглүүлж чадаагүй гэх үндэслэлээр буруутгаж, цалинг нь хасаж, хоёр зиндаа бууруулан хариуцлага ногдуулсан. Түүнчлэн Сүмогийн холбооноос Миягино дэвжээг хаах эсэх асуудлаар хэлэлцэж, санал хураалтаар хаах үр дүнд хүрээд байгаа бөгөөд Исэгахамагаас гаргасан тус саналыг Сүмогийн холбоо хүлээн авбал Миягино дэвжээ албан ёсоор хаагдах юм байна.