Ерөнхий сайд Л.Оюун-Эрдэнэ өнгөрсөн амралтын өдрүүдэд Дархан, Сэлэнгэ зэрэг Төвийн бүсийн аймгуудаар Засгийн газрын тайлангаа танилцуулж, иргэдийн саналыг сонсоод ирсэн. Мэдээж намын даргын хувьд орон нутгаар тойрч, тойргуудаа эргэж, иргэдийн байр байдлыг танадаад ирсэн нь тодорхой. Өнгөрсөн удаад Баруун бүсийн аймгуудаар цахилгаан станцуудыг нь нээж, иргэдтэй уулзаад ирсэн.

   Тэгвэл энэ удаад Дархан, Эрдэнэтийн иргэдтэй уулзах үеэрээ ирэх намрын улс төрийн дүр зургийг тодорхойлж, байр байдлаа танилцуулаад ирсэн. Өөрөөр хэлбэл, ирэх намар сонгуулийн өмнөх улс төрийн үйл ажиллагаанууд эрчимжиж, унтаа улс төр сэрэх юм байна. Тэр дундаа Засгийн газраас эхлүүлсэн “5ш” ажиллагаа хэсэгтэй эрчимжиж, улс төрийнхөн дунд дууиан дэгдэх нь тодорхой болов. Ингэхдээ “Шувуу” ажиллагааны хүрээнд Ерөнхий сайд Л.Оюун-Эрдэнэ Д.Эрдэнэбилэгийг онилж, дайчлан авч ирэх ажил дээрээ ч нэлээд хүч зарцуулах нь тодорхой болов.

   Энэ талаар тэрбээр Дархан-Уул аймагт хийсэн уулзалтын үеэрээ “Удахгүй авлигачид их орилно. Ч.Сайханбилэг, Д.Эрдэнэбилэг гараад зугтчихсан. Удахгүй тэднийг олно, авч ирнэ. Эндээс санхүүжүүлж байгаа хүмүүсийг таслан зогсооно. Цаг хугацаа тэдний эсрэг зогсож байгаа” хэмээн мэдэгдсэн. Анхнаасаа Л.Оюун-Эрдэнийн улс төрд танигдахдаа барьж авсан сэдэв нь Д.Эрдэнэбилэг. Эрдэнэтийн 49 хувьтай холбоотой асуудлаас эхлээд түүнийг Монголын улс төрийг удирддаг гол эзэн хэмээн “Шударга тав” бүлэглэлийг байгуулан жагсаж байхаас л мэдэгдэж байлаа. Тодруулбал, түүнийг дан ганц уул уурхайн том төслүүдээс хувь эзэмшээд зогсохгүй МАНАН-г санхүүжүүлэгч, гол толгойлогч хэмээж ирсэн удаатай. М.Энхболдын бүлэглэлтэй тэмцэж, Төв талбайд жагсаж байхдаа ч тэр мөн л энэ тухай дурдаж байсан. Энэ удаагийн сонгууль угтсан орон нутгийн уулзалтуудаараа ч тэр энэ асуудлаа орхигдуулсангүй.

      Тэрбээр энэ талаар 2022 онд МҮОНРТ-д өгсөн ярилцлагадаа мөн онцлож байлаа. Тодруулбал, Ерөнхий сайд Л.Оюун-Эрдэнэ "Д.Эрдэнэбилэг гэдэг хүн төрд гомдож байна гэдэг асуулт, хариулт бол ямар ч логикгүй. Д.Эрдэнэбилэг өөрөө төр байсан. Өөрийн шүүгчтэй. Шулуухан хэлэхэд, Д.Эрдэнэбилэг тухайн үеийн Ерөнхий сайд, УИХ-ын дарга, Ерөнхий шүүгч, Ерөнхий прокурор, ТЕГ-ын дарга, Монголбанкны Ерөнхийлөгч болон Хөгжлийн банкны бүх удирдлагыг өөрөө томилсон. Д.Эрдэнэбилэг гэдэг хүн хууль бусаар Худалдаа хөгжлийн банк, "Эрдэнэт" үйлдвэр, Дархан, Хөтөл, Бор-Өндөр, Багануурыг авсандаа гомддог л биш юм бол төрд гомдох эрхтэй хүн биш гэж бодож байна" хэмээн дурдаж байсан удаатай.

      Тэгвэл Дархан-Уул аймагт очих үеэрээ тэрбээр “Яагаад бид Дубайн гэрээг цуцлаж, Хөтөлийг хурааж авах болов. Дарханы Төмөрлөгийн үйлдвэрийн концессыг цуцлав. Яагаад гэвэл манайд болж байгаа бүх асуудлын 93 хувь нь уул уурхайтай холбоотой. Уул уурхайн эзэд бол банкны эзэд. Тийм учраас манай нийт хөрөнгийг уул уурхайн хэдхэн компаниуд барьдаг. Энэ хүмүүс зарим тохиолдолд хоёр намыг хоёуланг нь худалдаад авчихдаг. Эдгээр хүн заримдаа шүүхийг томилчих явдал байна. 1.5 жилээр Засгийн газар солигдоод байснаас аль ч намын үед хүмүүс нь солигдоогүй. Аль ч нам засагласан энэ хүмүүс л ард байна. Үүнийг МАНАН тогтолцоо гээд байгаа юм” хэмээн дахин зарлав.

    Ерөнхий сайд Л.Оюун-Эрдэнийн ирэх жилийн сонгууль угтан барьж авсан гол сэдэв МАНАН, мафи тэр дундаа Д.Эрдэнэбилэгийг нухчин дарах ажиллагааг идэвхжүүлэх бололтой.

Ёстой л хорхойтой араандаа зууна гэдэг шиг өөрөө тэмцэж дийлэхгүй бол Төв талбайд ард түмэнтэй жагсаж байгаад ч хамаагүй дарж авна гэдгээ тэр мэдэгдэв.

      Ирэх намрын улс төрийн дуулиан Д.Эрдэнэбилэг рүү чиглэж, МАНАН-г тойрсон асуудлууд ийн дахин сөхөгдөх нь тодорхой болов. Нэг ёсондоо ирэх намар нүүрстэй холбоотой асуудлууд намжмал байдалтай болж мэдэх нь. Нүүрсний дуулианыг дарах гол сэдэв нь Д.Эрдэнэбилэгтэй холбоотой асуудлууд ч байхыг үгүйсгэхгүй юм. Өнгөрсөн долоо хоногт “Нүүрсний” гэх тодотголтой хэргийн шүүх хурлын урьдчилсан хэлэлцүүлэг болж өнгөрөхөд есөн са ам нээгээгүй Б.Ганхуяг анх удаа олон нийтэд нүүрсний дуулиантай холбоотой асуудлаар мэдүүлэг өгсөн. Ингэхдээ тэрбээр “76-уулаа хүрээд ир, тойрч суугаад яръя. Та нар манайг энд хориод өөрсдөө төртэйгөө үлдэж болохгүй” хэмээн шүүхийн танхимаас том бас чанга дуугарав. Түүгээр ч зогсохгүй ХЭҮК-т Л.Оюун-Эрдэнэд хандаж, гомдол хүргүүлсэн.

      Ингээд харахаар нүүрсний дуулианыхан Л.Оюун-Эрдэнэ рүү хариу цохилт явуулж эхэлсэн нь энэ бололтой. Хариу цохилтын дуулианыг дарах хэд хэдэн асуудлаар  нийгэмд сенсац дэгдээсэн. Цаашлаад ямар арга хэмжээ авч эхлэх нь ч тодорхой болов.

     Нэг ёсондоо Л.Оюун-Эрдэнийн багийнхан Д.Эрдэнэбилэгтэй эхлүүлсэн “дайн”-аа дахин шинээр эхлүүлж, олны анхаарлыг энэ зүгт хандуулж, дуулиан дэгдээх кампанит ажилдаа орсон бололтой. Өөрөөр хэлбэл, ирэх намар Төв талбайд жагссан ард түмэн Л.Оюун-Эрдэнээс нүүрсний хулгайн асуудлаар хариу нэхэх нь тодорхой. Түүний хариултыг бэлдэж байгаа хамгийн том хариулт нь МАНАН-д барьцаалагдсан шүүх буюу Д.Эрдэнэбилэгийг тойрсон дуулиан байх нь.