“Эрдэнэт” үйлдвэрийн Ерөнхий захирал Х.Бадамсүрэн Монгол Ардын нам тэр дундаа Ерөнхий сайд Ц.Хүрэлсүхтэй үндсэндээ том тохироо хийчихжээ. “Эрдэнэт үйлдвэр”-ээс 650 тэрбум төгрөг гаргаж, Монгол Улсын бүх өрхийн дулаан, цахилгаан, хогны мөнгийг тэглэсэн нь цагаа олсон шийдвэр ч цаана нь Ерөнхийлөгчийн сонгуулийг угтсан улс төрийн тохироо явж байгаа гэдгийг эх сурвалжууд хэлж байгаа юм.  

      Энд онцлох ёстой нэг чухал зүйл нь “Эрдэнэт” үйлдвэрийн Шилэн дансны мэдээллийг олон нийтэд дэлгэсэн нь Шилэн Цогоогийн эр зоригтойдоо хийсэн үйлдэл биш байж. Учир нь, Ерөнхий сайд өнгөрсөн есдүгээр сард “Эрдэнэт” үйлдвэрийг Засгийн газрын Хэрэг эрхлэх газрын дарга Л.Оюун-Эрдэнээс салгаж, Шадар сайд Я.Содбаатарын “мэдэлд” шилжүүлсэн. Тодруулбал, Засгийн газрын хуралдаанаар тус үйлдвэрийг шалгах Ажлын хэсгийн ахлагчаар ажиллаж байсан Л.Оюун-Эрдэнийг чөлөөлж, оронд нь Я.Содбаатар томилогдсон. Үүнтэй зэрэгцэн Шилэн Цогоо “Шилэн данс” ухах ажлаа ч эхлүүлсэн байдаг. Өөрөөр хэлбэл, “Эрдэнэт” үйлдвэрийн даргыг солих кампанит ажил Л.Оюун-Эрдэнийг тус үйлдвэрийг шалгах Ажлын хэсгийн ахлагчаас буусан өдрөөс эхэлсэн гэж болно. Энэ ажил амжилттай хэрэгждэгийн даваан дээр “КОВИД-19” цар тахал дотоодод алдсан тухай мэдээлэл гарч, бүх нийтийн хөл хорио тогтоосон юм. 

Гэхдээ Ерөнхий сайд У.Хүрэлсүх яагаад Л.Оюун-Эрдэнээс “Эрдэнэт” үйлдвэрийг салгах болов гэдэг нь сонирхол татаж байгаа биз. Тэгвэл МАН ирэх Ерөнхийлөгчийн сонгууль төдийгүй “Эрдэнэт” үйлдвэрийн асуудлаар дотроо хоёр хуваагдаад байсан билээ. 

-Л.ОЮУН-ЭРДЭНЭ Х.БАДАМСҮРЭН НАРТ ЦАР ТАХАЛ “ТЭНГЭРИЙН УМДАГ” БОЛОВ БОЛОЛТОЙ-

       Ерөнхий сайд өөрийн нутгийн “сайн дүү” гэгдэх Л.Оюун-Эрдэнэд “Эрдэнэт” үйлдвэрийг шалгах үүрэг өгсөн ч тун удалгүй тэд нэг баг болчихоод эвгүйдвэл Ерөнхий сайдад нуруугаа харуулчих гээд байсан гэх мэдээлэл бий. Иймд Я.Содбаатар У.Хүрэлсүхийн даалгавараар тус үйлдвэрт шалгалтын шинэ ажиллагаа эхлүүлж, эхний дүгнэлтээ гаргасан нь Л.Оюун-Эрдэнийнхээс илт зөрүүтэй байсныг эх сурвалжууд одоо ч онцолж байгаа. Ийм учраас Л.Оюун-Эрдэнээс “Эрдэнэт” үйлдвэрийг салгах эхний алхам нь Х.Бадамсүрэнг зохион байгуулалттайгаар, цэвэрхэн зайлуулах байв. Гэтэл цар тахал Л.Оюун-Эрдэнэд төдийгүй Х.Бадамсүрэнд боломж олгож, эрх мэдлийг нь буцаан өгсөн нь өчигдөр тодорхой боллоо. Өөрөөр хэлбэл, хөл хорионы үеэр Л.Оюун-Эрдэнэ У.Хүрэлсүх нар эвлэрч, Х.Бадамсүрэнгээр оролдох шаардлагагүй болтол нь тохироо хийсэн бололтой. Уг нь ердөө сар гаруйн өмнө Х.Бадамсүрэнг унагаах хангалттай шалтгаан, баримт олон нийтэд дэлгэгдсэн. Тодруулбал, Х.Бадамсүрэнгийн хагас тэрбум төгрөгөөр орон сууцаа тохижуулсан, тийм хэмжээний мөнгөөр автомашин худалдаж авсан, согтууруулах ундаа худалдан авах тендер зарласан зэрэг төрийн мөнгөнөөс “идэж, уусан”, олон баримтыг энд дурдаад илүүц биз.

     Гэтэл улсын мөнгө идсэн хэмээн Х.Бадамсүрэнд албан тушаалаас нь буулгаж, хатуу хариуцлага тооцох нь битгий хэл “Амжилтандаа бардсандаа тансагласан зүйл байгаа. Засгийн газраас хоёр удаа сануулсан” хэмээн “цээжээрээ хамгаалаад” өнгөрч байна.  Өөрөөр хэлбэл, “Эрдэнэт үйлдвэр” энэ онд нэг их наяд төгрөг давсан татвар улсад төлсөн учраас Х.Бадамсүрэн болон тус үйлдвэрийн удирдлагууд тансаглаж болно гэдгийг Л.Оюун-Эрдэнэ тэргүүтэй төрийн томчууд “хүлээн зөвшөөрч” байна гэсэн үг. Түүний “Эрдэнэт үйлдвэр”-т “шударга ёс тогтооно” хэмээх удаа дараагийн мэдэгдэл бодит байдал дээр ингэж хэрэгжиж байна. Нэг ёсондоо Х.Бадамсүрэнгийн хэрээс хэтэрсэн тансаглалын баримтууд “Эрдэнэт” үйлдвэрийг МАН-ын бүлэглэлд бүр мөсөн өгөх шалтаг болчих шиг боллоо. Ингэснээр МАН, тэр дундаа Ерөнхий сайд У.Хүрэлсүхийн анхнаасаа хүсэж байсан Ерөнхийлөгчийн сонгууль бүрэн утгаараа “эхлэв” бололтой.