Ерөнхийлөгч асан Ц.Элбэгдорж дахиад АТГ-д дуудагджээ. Энэ тухайгаа энэ сарын 3-нд өөрийн твиттер хуудаснаа жиргэсэн байна. Түүнийг үүнээс өмнө өнгөрсөн хоёрдугаар сард АТГ-д дуудаж байсан юм.  Тэрбээр “Зангиагаа засаад, гутлаа тослоод очно” гэдгээ мэдэгдэж байв. Харин энэ удаад тэр маскаа зүүгээд АТГ-д очжээ. Хөл хорионы энэ үед АТГ Ерөнхийлөгч асан Ц.Элбэгдоржийг яаран дуудах ямар шалтгаан байв. 

Сүүлийн үед Ерөнхийлөгч асан Ц.Элбэгдорж “Ерөнхийлөгч улс төрийн хоригдол хэмээн нэрлэгдээд буй 14 хүнд уучлал үзүүлэх ёстой” хэмээн ярьж, бичиж ард түмний анхаарлыг өөртөө татахыг оролдох болсон. Ерөнхийлөгч Х.Баттулгад хандан “Бүрэн эрхийнхээ хүрээнд улс төрийн хоригдол болох 14 хүнд уучлал үзүүл” хэмээн бичиж байсан. Өчигдөрхөн “Арван дөрөв” хэмээх нийтлэлдээ Ерөнхий сайд асан М.Энхсайхан, С.Баяр тэргүүтэй хүмүүсийг Монголын төр хэлмэгдүүлж байгаа тухай бичиж, олон нийтэд хүргээд буй. Мөн “Баттулга аа, Монголд хэрэгтэй бол чиний “Арван тав” болоход би бэлэн шүү” гэсэн нь Ерөнхийлөгч асан Ц.Элбэгдоржид битүүхэн айдас байгааг, одоо шалгагдаж байгаа асуудал нь нэлээд хүндэрч болзошгүй байгааг илэрхийлж байж мэднэ. 

 Ерөнхийлөгч асан Ц.Элбэгдорж дахиад АТГ-д дуудагджээ

      Учир нь, түүнийг Ерөнхий сайд асан М.Энхсайханы хэрэгт холбогдуулан АТГ-аас өмнө нь удаа дараа шалгаж байсан. Харин өнөөдөр М.Энхсайхан 4.6 жилийн хорих ялаа шоронд эдэлж байгаа. М.Энхсайханыг Тавантолгой төслийн хөрөнгө оруулагчийг шалгаруулах явцад нөлөөлж, албан тушаал эрх мэдлээ урвуулан ашиглан зарим компанид эдийн засгийн давуу эрх мэдэл олгож, гэм буруутай байна хэмээн дүгнэсэн. Эл хэрэгт Ерөнхийлөгч асан Ц.Элбэгдоржийг буруутгаж байсан. Тэрбээр тухайн үед “Ц.Элбэгдорж, М.Энхсайхан нарыг Тавантолгой ордыг Хятадын компанид 100 жилээр үнэгүй өгөх гэж байсан” хэмээгээд  хэргийн баримт болох 170 гаруй хуудас материалыг Прокурорын газарт өөрийн биеэр хүлээлгэн өгч байсан түүхтэй. Уг баримтыг үндэслэн шалгасны дүнд Ерөнхий сайд асан М.Энхсайхан ял авчихаад байгаа бол дараагийн хүн нь Ерөнхийлөгч асан Ц.Элбэгдорж байх магадлал өндөр. 

     Тиймээс Ц.Элбэгдорж “Ардчилсан оронд улс төрийн хоригдол байх учиргүй” хэмээн олон нийтэд сануулж, арван дөрвөн хүнийг цагаатгах ёстой гэсэн байр суурийг тууштайгаар илэрхийлж байж болох. Үүний цаана өөрийгөө ч гэсэн улс төрийн хоригдол болох ёсгүй гэсэн агуулгыг нягт шигтгээд байгаагаас харвал түүнтэй холбоотой хэрэг удахгүй прокурорт шилжих бололтой.