“Эрдэнэт” үйлдвэрийн Ерөнхий захирал Х.Бадамсүрэнгийн тансаглал хэрээс хэтэрч байгаа талаар өмнө нь мэдээлж байсан. Тухайлбал, Х.Бадамсүрэн нь охиныхоо сургалтын төлбөр болох 100 гаруй сая төгрөгийг үйлдвэрийн мөнгөөр төлсөн баримт ил болсон. Мөн хувийн орон сууцаа тохижуулсан, тансаг зэрэглэлийн тавилга худалдаж авсан, хагас тэрбум төгрөгөөр автомашин худалдан авах тендер зарласан гэх зэрэг олон баримт бий. Гэтэл өнөөдрийг хүртэл түүнд хариуцлага тооцож чадахгүй байгаа юм. Үйлдвэрийн хөрөнгийг хувийн хэрэглээндээ ашигласан гэх дуулиан намжаагүй байхад бас нэгэн баримт ил болсон байна. 

Тодруулбал, “Эрдэнэт” үйлдвэр 47.360 евро буюу өнөөдрийн Хаанбанкны ханшаар 160.194.252.80 төгрөгөөр Италийн алдарт MINOTTI LUIGI & BENIGNO брэндийн алтан ширээ, шүүгээ худалдан авчээ. Уг худалдан авалтыг 2019 оны арваннэгдүгээр сард хийсэн бөгөөд Шилэн дансанд оруулаагүй байжээ.  Тэдний худалдан авсан тавилга нь алтан чимэглэл бүхий гэсэн тайлбарыг худалдан авах гэрээнд нь тусгасан байна.