• Өнөөдөр 2025-11-02

УЛААН ОРООЛТНЫ ЦААДАХ УЛС ТӨР БУЮУ МАН-ЫН ДАРГЫН “ШИНЭ” ХАМТРАГЧ

2023-01-17,   1725

      “Нүүрсний 17”-гийн нэгээр нэрлэгдсэн Х.Баттулга харьд одож, хэд хоног нийгмээрээ “Хилийн хориг тавьчихгүй, толгойг нь илсээр тавиад явуулчихлаа, тэр ирэхээсээ өнгөрсөн” гэж халаглах, харамсахын завсар байлаа. ЭЗХ-ийн сайд Ч.Хүрэлбаатар хүртэл “Эс хэллүү, би. Тэр зугтчихлаа” гэж “хашхичиж” байв. Сингапурт очсон сураг дуулдаж, сошиал таамгууд хөвөрч байтал тэр буцаж ирэв. Ирэхдээ улаан ороолттой ирлээ. Хүзүүндээ тохсон улаан ороолтоороо тэр улс төрд хэнтэй хамтрагч болоод буцаж ирснээ “битүүхэн” зарлав. Өөрөөр бол, Х.Баттулга улс төрийн “шинэ” хамтрагчаараа “улаан”-ы талын удирдагч Л.Оюун-Эрдэнийг “сонгожээ”. Тайзан дээр тэр бүр өөрөө гараад байдаггүй Х.Баттулга “С.Баярцогт” гэх сэдвийг биечлэн барьж авсан нь Л.Оюун-эрдэнэтэй хамтрагч болсных нь баталгаа болов. "Нүүрсний хулгайч" гэж зарлагдсан, зарласан хоёрын зам мөр нийлнэ гэдэг нь төр гэх тогоо дотроо шатаж буйн тод илрэл.  
 
У.ХҮРЭЛСҮХИЙГ ХАЯСАН БА ХАЯГДСАН ХОЁРЫН ХОРШИЛ
 
     Хоёр жил гаруйхны өмнөх улс төрд У.Хүрэлсүх хэн хэнтэй нь хамтрагч байлаа. У.Хүрэлсүх, Л.Оюун-Эрдэнэ хоёр салж хагацашгүй сайн ах дүүс, У.Хүрэлсүх, Х.Баттулга хоёр сайдаж мууддаг ч сайн андууд байсан. У.Хүрэлсүх, Л.Оюун-Эрдэнэ хоёрын ах дүүгийн хоршил аль эртнийх. Ахын хувиар, өөртэйгөө ижилсүүлж хурандаа цол өгөхөөс бусдаар хажуугаасаа салгалгүй авч явсан. Ерөнхий сайд болсныхоо дараа Засгийн газрынхаа “гал тогоо”-г хариуцуулсан, Ерөнхийлөгч болохоор явахдаа Ерөнхий сайдын суудлаа даатгаж үлдээсэн, Ардын намынхаа арслантай тамгыг түүнд итгэж “өвлүүлсэн” гэх мэтээр ахын “хайр”-ыг харамгүй зориулсан. Гэвч Л.Оюун-Эрдэнэ Ерөнхий сайд, намын дарга болсноосоо нэг их удалгүй У.Хүрэлсүхээс нүүр буруулж, “тэрэг”-ээ эвдэж эхэлсэн. Салж хагацашгүй мэт байсан ах дүүгийн харилцаанд ан цав суусанд “атаман” зантай ахынх нь, “адгуу” зантай дүүгийнх нь, ер нь хэн хэнийх нь буруу байсан гэлцдэг. Хамгийн сүүлд л гэхэд, “Нүүрсний хулгай”-н хэрэг гал дээр тос нэмж, ярилцаж ойлголцох бүү хэл, яс махандаа тулцгаасан гэх яриа ч гарсан. 
 
     У.Хүрэлсүх, Б.Баатар хоёрын сонгуулийн үеэр ил гардаг, бусад үед сошиалд хадгалаастай байдаг утасны ярианы нэг бичлэг бий. Тэр бичлэгт У.Хүрэлсүх, Б.Баатар хоёр Х.Баттулгыг Ерөнхийлөгчийн сэнтийд “сойж”, улмаар амжилттай “түрүүлгэсэн” тухайгаа ихэд бахдалтай ярьцгааж буй нь бичигдэж үлдсэн байдаг. Хожим нь, У.Хүрэлсүх Ерөнхий сайдын хувиар, Х.Баттулга Ерөнхийлөгчийн хувиар тун сайн хамтарч, утасны бичлэг улс төрийн “эвлүүлэг” байгаагүйг баталсан. Даанч, дөрвөн жил гаруйн хамтралын эцэст, У.Хүрэлсүх Ерөнхий сайдын суудлаас өөрийн хүсэлтээр огцрохдоо “Миний итгэж, найдаж, хамтарч явсан Х.Баттулга ард түмнийг үймээн самуун турхирч, жагсаал цуглааныг санхүүжүүлж, өдөөн турхирах боллоо. Ерөнхийлөгчид Үндсэн хуулийн дагуу хариуцлага тооцох ёстой гэж үзэж байна” хэмээж, Х.Баттулгыг хаяж буйгаа зарласан. Ингээд ч болоогүй, У.Хүрэлсүхийн явуулгаар Үндсэн хуулийн цэц Х.Баттулгыг дахин нэр дэвших эрхгүй болгож шийдвэрлэснээр тэдний хамтрал албан ёсоор эцэс болсон. 
 
     Тэгвэл У.Хүрэлсүхийг хаясан ба хаягдсан хоёр эцэст нь хамтрахаар болжээ. Х.Баттулгын Төрийн тэргүүний сэнтийгээс буумагц нь Л.Оюун-Эрдэнэ дэргэдээ зөвлөхөөрөө авсан. Одоо харин хамтрагчаараа авч байгаа аж. Л.Оюун-Эрдэнэ, Х.Баттулга хоёрын хэн хэн нь улс төрд У.Хүрэлсүх гэх нэг “дайсан”-тай. У.Хүрэлсүх Л.Оюун-Эрдэнийг өөрийг нь хаяж, өр рүү нь өшиглөсөнд өширхөж, өөд нар үзүүлэхгүй хавчиж, хамтрагчдыг нь булааж байгаа учраас тэр Х.Нямбаатараас өөр ханьгүй, ганцаардаж байгаа. Х.Баттулгын хувьд ч хамтрагчтай болж, хамгаалалтад орохгүй бол хууль хяналтынханд ачигдахад бэлэн байгаа. Тиймдээ ч тэд тус тусдаа “байлдвал” хэн хэнийх нь хүч хүрэхгүйг мэдэж хамтрах замыг сонгожээ. 
 
       Харин хамтралынхаа эхлэл болгож У.Хүрэлсүхийн Ардчилсан намын даргын суудалд “сойж” буй С.Баярцогтыг барьж авлаа. С.Баярцогтыг унагавал У.Хүрэлсүхийн Ардын намыг Ардчилсан намтай хамт атгах алсын амбиц хамт унана. Энэ нь У.Хүрэлсүхийг дарж авах Л.Оюун-Эрдэнийн хүслийг, Ардчилсан намыг авах Х.Баттулгын зорилгыг, чухамдаа аль алиныг нь биелүүлнэ. Тиймдээ ч Х.Баттулга өөрөө Үндсэн хуулийн цэцийн үүдэнд очиж, "10 жилийн хорих ялтай С.Баярцогт алга урвуулахын төдийд цагаатгагдаж, тэгээд болоогүй "Би эрх баригч намтай тохирчихсон" гэж томроод, Ардчилсан намын даргад нэр дэвших гээд яваа асуудлыг шалгуулна" гэж ярьж явна. Үндсэн хуулийн цэц өөрийг нь Ерөнхийлөгчид дахин нэр дэвшүүлэхгүй байх шийдвэр гаргаж байхад ч Х.Баттулга өөрөө биечлэн тус байгууллагын үүдэнд хэвлэлийн хурал хийж байгаагүйг сануулах нь зүйтэй байх. 
 
Ингэж харвал, Х.Баттулга, Л.Оюун-Эрдэнэ хоёр хэн хэндээ ашигтайгаар, хамгийн гол нь У.Хүрэлсүх гэх нэг “дайсан”-ыхаа эсрэг хамтрахаар болсон нь илэрхий харагдаж байгаа юм. 
 

УЛААН ОРООЛТНЫ ЦААДАХ УЛС ТӨР БУЮУ МАН-ЫН ДАРГЫН “ШИНЭ” ХАМТРАГЧ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2023-01-17 10:59:54
    Бас нэг хүн: Таамаг төдий юу болохыг хэн мэдлээ хууль гэж байдаг бол өөрөөр эргэж мэдэх
  • Сэтгэгдэл үлдээсэн: 2023-01-17 07:43:49
    зочин: ene 2 neeh hol yavahgui eee.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2025 © Зохиогчийн эрх хуулиар хамгаалагдсан. Мэдээлэл хуулбарлах хориотой.