Сүүлийн  өдрүүдэд “Эрдэнэт” үйлдвэрийн Ерөнхий захирал Х.Бадамсүрэн чих амар суугаа биз. Учир нь, коронавирусийн халдвар дотоодод алдагдсантай холбогдуулан бүх хүний анхаарал үүнд төвлөрч байна. Засгийн газар Х.Бадамсүрэнд хариуцлага тооцох нь битгий хэл өмнөх ажлаа хүчрэхгүй шахам ажиллаж байна. Гэхдээ Төрийн өмчит үйлдвэрийн мөнгөөр охиныхоо сургалтын төлбөр болох 100 гаруй сая төгрөгийг төлсөн гэх “Эрдэнэт” үйлдвэрийн захирал Х.Бадамсүрэнгийн хэргийг ингээд өнгөрөөж болохгүй. 

Тус үйлдвэрийн Шилэн дансны мэдээллээр Х.Бадамсүрэн нь хувийн орон сууцаа тохижуулсан, хагас тэрбумын үнэтэй автомашин, мөнгөн аяга, массажны сандал, уран зураг худалдаж авсан гээд тэрбум, тэрбумаар тоологдох хөрөнгийг хувьдаа хэрэглэсэн нь ил болоод байгаа. Энэхүү хууль бус үйлдэлдээ Монголын ард түмнээс, уучлал гуйхын оронд өөрийгөө магтуулсан нийтлэл захиалгаар бичүүлж, нэр бүхий өдөр тутмын сонинуудад нийтлүүлээд авсан. 

Түүнчлэн “Эрдэнэт” үйлдвэрийн мөнгийг Х.Бадамсүрэн захирал нь ганцаараа хувьдаа ашигладаггүй нь Шилэн дансны мэдээллээр ил болсон. Тухайлбал, Тамгын газрын дарга Д.Баярболд, Тэргүүлэх менежер Н.Энхбаатар нар “Эрдэнэт” үйлдвэрийн мөнгөөр сар бүр өндөр үнэтэй орон сууцны түрээсээ төлүүлдэг баримт байна. Ингэхдээ сар бүр 6-12 сая төгрөгийг БЭЛНЭЭР авч байсан нь анхаарал татаж байгаа юм. 

Хамгийн сүүлд “Эрдэнэт” үйлдвэрийнхэн согтууруулах ундаа худалдаж авах тендер зарлагдсан нь асуудал дагуулаад байсан билээ. Төрийн өмчит үйлдвэрийн мөнгийг ийн дур зоргоороо үрэн таран хийж байгаа энэ мэт үйлдлийг ингээд өнгөрөөж болох уу, Ерөнхий сайд аа. Хэдийгээр цар тахлын халдвар нэмэгдэж, Засгийн газар завгүй ажиллаж байгаа ч улс орны эдийн засаг, мөнгө төгрөгтэй холбоотой энэ мэт хууль бус үйлдлүүдэд цаг тухайд нь хариуцлага тооцох ёстой.