Үе үеийн Засгийн газарт “үзэгдэл” болохыг хүсдэг, үеийнхнээсээ юу ч хийгээд хамаагүй онцгойрохыг оролддог, үзэл бодол нь тэрслүү мэт хэрнээ үнэндээ зүгээр л ялгарахын тулд “өвчигнөдөг” хэн нэгэн байдаг. Тэгвэл энэ Засгийн газрын тэр төлөөлөл нь УИХ-ын гишүүн Б.Энхбаяр юм биш байгаа.
Түүний амнаас МАН-ын гишүүн биш юм шиг л МАН-ын үзэл баримтлал, мөрийн хөтөлбөр, бусад нь үг дуугүй аялдан дагалдаж буй юм бүхнийг сөрсөн, эсэргүүцсэн, эгдүүцсэн үгс байнга унана.
Жишээ нь, Шүүхийн тухай хуулиар Шүүхийн ерөнхий зөвлөл болон Сахилгын хорооны шүүгч бус гишүүдийг УИХ томилохоор заасан нь Үндсэн хууль зөрчсөн гэж дүгнэлтийг цэц Дунд суудлын хуралдаанаасаа гаргасан. Гэвч уг дүгнэлтийг УИХ хүлээн авахаас татгалзсан юм. Харин өнгөрсөн сарын 25-нд Их суудлын хуралдаанаар Монгол Улсын Ерөнхийлөгчийн хүсэлтийг хүлээн авснаар өмнөх дүгнэлт болон уг дүгнэлтийг хүлээн авахаас татгалзсан УИХ-ын тогтоолыг тус тус хүчингүй болгох шийдвэр гаргасан. Үүнийг харж суусан Б.Энхбаяр “Шүүхийн хуулийн асуудлаар эцсийн шийдвэр гаргахдаа Үндсэн хуулийн Цэцийн их суудал өнөөдөр Үндсэн хууль, Цэцийн процессийн хуулийн заалтуудыг илтэд зөрчсөн гэж үзэж байна. Үндсэн хуульд зааснаар Цэцийн их суудлаар УИХ-ын тогтоолын үндэслэлийг хянадаг. Гэтэл тэр ажлаа огт хийгээгүй, хэлэлцээгүй. Тэгсэн атлаа УИХ-ын тогтоолыг хүчингүй болчихсон” гэсэн юм.
Мөн Коронавируст халдвар (КОВИД-19)-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийг 2021 он дуустал сунгахаар нэмэлт, өөрчлөлт оруулах тухай хуулийн төслийг Шадар сайд С.Амарсайхан өргөн барих үеэр УИХ-ын гишүүн Б.Энхбаяр "Ковидын хуулийн үйлчлэлийг сунгахыг дэмжихгүй байна. Ковидын хууль үйлчилж байх хугацаанд Засгийн газар эрх мэдлээр дутаагүй. Засгийн газар болон иргэдийн хооронд итгэлцэл байж энэ цар тахлыг ялна. Гэтэл иргэдийн итгэлийг алдаад байна. Эрүүл мэндийн даатгалын мөнгийг захиран зарцуулах асуудлыг оруулж ирсэн байна. Энэ хэрхэвч байж болохгүй. Эрүүл мэндийн даатгалын сангийн хөрөнгийг өөр өвчнөөр өвдсөн хүмүүст зарцуулахгүй юм уу. Иргэдийн ирээдүйд хадгалуулсан мөнгийг зарцуулж болохгүй. Төрдөө итгэж хадгалуулж байгаа мөнгө шүү дээ. Даатгалын мөнгийг нь зарцуулах гэж байгааг иргэд зөвшөөрч байгаа юм уу. Иргэдээс асуухгүй юм уу. Хуулиасаа давсан журам гаргаж болох уу Засгийн газар. Цар тахлын үед Улсын онцгой комисс шийдвэр гаргах үйл ажиллагаандаа Хүний эрхийн үндэсний комиссыг ч оролцуулахгүй, хянуулахгүй байгаа. Ковидын хуулийг сунгахад миний санаа зовж байгаа зүйл бол төр өөрөө ковидоос аюултай цар тахал болж хувирсан байж магадгүй. Цар тахлын үед хүний эрх маш ихээр зөрчигдөж байна. Ковидын хуулиар төрийн албанд ямар ч шалгалтгүйгээр хүмүүсээ томилсон. Ковидоор шалтгаалан хүмүүсээ төрийн албанд томилж болсон. Үүнийг таслан зогсоох цаг нь болсон" гэсэн билээ.
Ковидын хуулийг сунгахад миний санаа зовж байгаа зүйл бол төр өөрөө ковидоос аюултай цар тахал болж хувирсан байж магадгүй
Түүнчлэн УИХ-ын гишүүүн, Хууль зүй, дотоодын хэргийн сайд Х.Нямбаатарыг Боксын холбооны ерөнхийлөгчөөр 100 хувийн саналаар сонгосон хурлын дараа Монгол Улсын гавьяат тамирчин Э.Цэндбаатар бусдад зодуулсан асуудлын цуврал бичлэгүүдийн дараа тэрбээр “Энэ асуудал бүр драма цаашаа боллоо шүү. Цагдаа, мөрдөх алба, прокурор энэ мэт илтэд гэмт хэргийн шинжтэй, нотлох бичлэгтэй асуудал дээр шалгаж ч чадахгүй, сайд даргаасаа “чиглэл” харж, хараат, мэргэжлийн биш, дарга сайдынхаа аясыг хардагаа түмэн олондоо илчилж буйдаа ичээч ээ” хэмээн бичжээ.
Мөн өнөө цагийн МАН-ын нөлөө бүхий, алсаас удирдагч улстөрчийн нэг Ц.Нямдоржтой тэрбээр байнга үг сөргөж явдаг ба нэгэнтээ "Э.Бат-үүл Ц.Нямдоржийг “хорт могой” гэнэ лээ. Би үүнтэй санал нийлэхгүй. Могой ганц толгойтой, ганц биетэй. Тэр олон гартай, олон ч хөлтэй. “Хуулийн хулгайтай тэмцэнэ” гэсэн сонгуулийн уриа дэвшүүлж, миний бие зүгээр ч нэг УИХ-д нэр дэвшээгүй. Ямар ч хувь хүн хуулийн хийдэл, системд хулгай хийх боломжгүй, тийм эрүүл бөгөөд ил тод, тийм хяналттай бөгөөд хариуцлагатай ажиллах эрх зүйн орчинг бий болгохыг зорьж хууль тогтоогч болъё гэж шийдсэн. Эхлээд Шүүхийн шинэтгэлийг барьж авсан. Энэ бол дөнгөж эхлэл. Цаашаа Прокурор, мөрдөх болон гүйцэтгэх албаны эрх зүйн орчин цогцоороо сайжирч байж урагшилна. Хувьдаа шударга ёсыг өмчилж, хуулийн дээр гарч, хууль бол би гэх хүртлээ даварч хөлжсөн Нямдоржтонгуудыг зайлуулах цаг болсон. Парламентат ёс энэхүү тэмцлийн гол хүч болно гэдэгт итгэлтэй байна. Намын ард нуугдаж мөнгө угаадаг мангасуудтай тэмцэнэ" гэж байсан удаатай.
Хувьдаа шударга ёсыг өмчилж, хуулийн дээр гарч, хууль бол би гэх хүртлээ даварч хөлжсөн Нямдоржтонгуудыг зайлуулах цаг болсон
Ингээд зогсохгүй тун саяхан С.Зориг агсны амь насыг хөнөөсөн гэгдэж буй Т.Чимгээ телевизийн ярилцлагад орсны дараа тэрбээр “Одоо С.Зоригийн алуурчдын хэргийг захиалагчдын хэрэгтэй нэгтгэн шалгана гэж Хууль зүйн сайд мэдэгдсэн. Энэ бол илэрсэн алуурчдыг “илрээгүй” захиалагчаар бамбайлж хэргийг юу ч биш болгох, алуурчдын хэргийг шүүх рүү явуулахгүй “тогтоон барих” технологи мөнөөсөө мөн. Хараад л байгаа” хэмээн твиттерт жиргэсэн юм. Үүнийх нь хариуд ХЗДХ-ийн сайд Х.Нямбаатар “Хүн сайд дарга болох хүсэлтэй байж болно. Гэхдээ ингэж гүтгэж дайрч болохгүй. ХЗДХ мөрдөн шалгах ажиллагаа явуулдаггүй. Эцэс сүүлдээ дээрх хэргийг миний бие илрүүлэхгүй тогтоон барьж байгаа гэдэг мессэжийг нийгэмд өгч шүүхээс гэм буруугүйд тооцогдсон хүмүүсийг алуурчин гэж зарлах нь Их хурлын гишүүний бүрэн эрхэд байхгүй гэдгийг хэлье" хэмээсэн юм. Гэсэн ч Б.Энхбаяр "Чимгээ, Содномдаржаа нарыг Улсын дээд шүүхээс гэм буруугүй гэсэн шийдвэр гаргаагүй. “Дахиад шалгаад ир” гэж нэмэлт мөрдөн байцаалтад буцаасан бөгөөд яллагдагч (ял сонссон сэжигтэн) статустай байгаа. Шүүхийн урдуур орж харин "шийдвэр" гаргадаг улстөрчид манайд байгаа нь бол үнэн" хэмээн хариу бариад авсан.
Зориуд дурдсан дээрх жишээнүүд бол УИХ-ын гишүүн Б.Энхбаярын намын гишүүн байлаа гээд намынхаа дүрэм, журамд үг дуугүй захирагддаг нэгэн биш гэдгийг тодорхой харуулна. Бүр илүү тодруулбал, түүнд бурууг илчилж, булхайг илчлэхэд Ерөнхийлөгч, Ерөнхий сайд, Шадар сайд, Үндсэн хуулийн цэц, ХЗДХ-ийн сайд гээд хэнбугай ч байсан падгүй. Өөрөөр хэлбэл, тэр энэ Засгийн газарт сөрөг хүчин, МАН доторх АН болоод цөөнгүй сарыг үдлээ. Гол нь нийтлэлийн эхэнд дурдсан шиг ялгарахын тулд л “өвчигнөдөг”, онцгойрохын төлөө л шүүмжилдэг, поп нэгэн биш байгаасай.
Түүнд бурууг илчилж, булхайг илчлэхэд Ерөнхийлөгч, Ерөнхий сайд, Шадар сайд, Үндсэн хуулийн цэц, ХЗДХ-ийн сайд гээд хэнбугай ч байсан падгүй
НАМДАА ЭСЭРГҮҮ, МОНГОЛЧУУДДАА ТЭРСЛҮҮ ГИШҮҮН |
|
2025-04-03 16:52:18
2025-04-03 16:31:04
2025-04-03 16:01:28
2025-04-03 15:49:04
2025-04-03 15:22:07
2025-04-03 15:12:37
2025-04-03 14:59:31
2025-04-03 14:59:20
2025-04-03 14:19:22
2025-04-03 14:03:52
2025-04-03 13:54:07
2025-04-03 13:51:21
2025-04-03 13:29:01
2025-04-03 13:14:04
2025-04-03 13:01:09
2025-04-03 12:55:41
2025-04-03 12:00:00
2025-04-03 11:05:55
2025-04-03 10:36:15
2025-04-03 10:13:40
2025-04-03 09:28:52
2025-04-03 09:14:33
2025-04-03 08:36:23
2025-04-03 08:30:01
2025-04-03 07:00:00
2025-04-03 07:00:00
2025-04-03 07:00:00
2025-04-03 07:00:00
2025-04-03 07:00:00
2025-04-03 07:00:00
2025-04-03 07:00:00
2025-04-03 06:00:00
2025-04-03 06:00:00
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц |
7509-1188 |