- ТЭР УЛСААР НЬ ШАТАХУУНЫ ХОМСДОЛД ОРУУЛСАН ДЭНДҮҮ ХАРИУЦЛАГАГҮЙ БАЙДЛЫНХАА ХАРИУЦЛАГЫГ ӨӨРТӨӨ БУС, САЛБАРЫН ХЭДЭН МЭРГЭЖИЛТЭНДЭЭ ТООЦООД ӨНГӨРӨХ БОЛОЛТОЙ -

        Хэрвээ би Г.Ёндон сайдын оронд байсан бол, ер нь хэн ч байсан өдийд ард түмнээсээ уучлал гуйгаад ажлаа өгчихсөн байгаа. Улс даяар нь шатахууны хомсдолд оруулж, гуравхан сая иргэнийхээ амин чухал ажлуудыг баллаж, цөөнгүй иргэн шатахуунгүйн улмаас эмнэлгийн тусламж авч чадалгүй амиа алдаж, түүнээс дутахааргүй нь ачаа бараа, тээвэр, хүнс, эм, эмнэлгийн бараа, бүтээгдэхүүнээ тээвэрлэж чадахгүй гацаж, цар тахлын үед нийгмийн бухимдлыг дээд цэгт нь тулгаж байгаагаа эрхэм сайд огт мэдэхгүй, тоохгүй байх шиг.

      Хариуцсан яамных нь стратеги төлөвлөгөө, тооцооллын нэн тэргүүнд бичигддэг онцгой бүтээгдэхүүн болох шатахууны нөөц хийгээд худалдааг бодлогын хувьд “жолоодож” чадалгүй хариуцлага, мэргэжлийн алдаа гаргаснаа тэр юман чинээнд тооцохгүй байгаа бололтой. Өөрөөр хэлбэл, монголчуудын шатахуунтай байна уу, хөл дүүжлэх унаагаараа хөдөө гадаа, ойр зуур, өвчтэй зовлонтой хүмүүсээ зөөнө үү, хүнс, тариагаа ойртуулна уу, үгүй юү нь Г.Ёндон сайдад лав падлийгүй бололтой. Учир нь, тэрбээр өчигдөр “Ерөнхий сайд шатахууны хомсдол үүсэхэд алдаа гаргасан, буруутай албан хаагчдад хариуцлага тооцож, арга хэмжээ авах үүрэг өгсөн” хэмээн хээв нэг хэлээд, өөрийнхөө бодлогын алдааг бусдад нялзаахаар ичих ч үгүй мэдээлэл хийлээ. Уг нь тэр “Шатахууны хомсдол үүсэх эрсдлийг би салбарыг нь хариуцсан сайдын хувьд тооцоолж, ард иргэдэд эрт мэдэгдэж, ачаалал, доголдол үүсэхээс сэргийлэх ёстой байсан. Ингэж чадалгүй алдаа гаргаж, өнөөдөр автомашинтай болгон 20 мянган төгрөгийн шатахуун авахын тулд гудамжинд хэдэн цагаар дугаарлаж байна. Иймд цаашид бодлогын алдаа гаргахааргүй, мэргэжлийн хүнийг УУХҮ-ийн сайдаар томилох хэрэгтэй. Ерөнхий сайд буруутай хүмүүст хариуцлага тооцох үүрэг өгсөн. Хамгийн түрүүнд би хариуцлагатай байж чадаагүйнхээ хариуцлагыг өөртөө тооцож, сайдын үүрэгт ажлаасаа чөлөөлөгдөж байна” гэх ёстой байв. Гэвч тэр үүнийг яг эсрэг зүйл ярьсныг, асуудлаас өөрийгөө цэвэрхэн сугалж авч, үлдэхээр улайрч байгааг монголчууд бүгд харсан биз ээ. Тэр улсаар нь шатахууны хомсдолд оруулсан дэндүү хариуцлагагүй байдлынхаа хариуцлагыг өөртөө бус, салбарын хэдэн мэргэжилтэндээ тооцоод өнгөрөх бололтой.

"Хамгийн түрүүнд би хариуцлагатай байж чадаагүйнхээ хариуцлагыг өөртөө тооцож, сайдын үүрэгт ажлаасаа чөлөөлөгдөж байна” гэх ёстой байв

       Ийм ч учраас тэр "Бид ОХУ-аас сар бүр 28 мянган тонн шатахуун авах гэрээтэй. Гэвч тэд 17 мянган тонныг нийлүүлэх боломжтой гэсэн тул БНХАУ-аас 43 мянган тонн шатахуун авах захиалга өгсөн. ОХУ-аас 17 мянган тонн шатахуун ирнэ гэж тооцсон ч энэ сард 7500 тонныг нийлүүлсэн. Үлдэгдлийг ирэх сарын 1 хүртэл нийлүүлэх боломжгүй гэсэн хариу өгсөн. Мөн БНХАУ-ын талаас Хөх хотын боловсруулах үйлдвэрээс манай улсад шатахуун нийлүүлэх боломжгүй гэсэ. Бид найм хоногийн турш шатахууныг хязгаартай худалдах боллоо. Бээжинд суугаа Элчин сайд ноот бичиг өгч, холбогдох хүмүүстэй уулзаж байна. Тус улсад сүүлийн хоёр хоног амралтын өдрүүд байв. Зам тээврийн яам, ГХЯ энэ асуудлыг шийдэхээр ажиллаж байна. Хөх хотоос Жинин боомтод саатаж, Замын-Үүдээр дамжин бензин ачсан галт тэрэг орж ирнэ. Тээврийг аль болох хурдан хийхээр ажиллаж байна. Учир нь, хоёр галт тэрэгнээс нөгөө рүү нь ачна, агуулахад буулгасны дараа аж ахуйн нэгжүүд авах гээд олон шат дамжлага бий” хэмээн тайван гэгч нь ярьж зогсоо биз ээ.

      Ерөнхий сайд, УУХҮ-ийн сайд Г.Ёндон нар хэдхэн хоногийн өмнө “Цахим үндэстэн болно” хэмээн цар тахлын гамшиг, эрсдлийг үл тоон цамнаж зогсохдоо шатахууны хомсдолд улсаараа орно гэдгээ юу юунаас илүү мэдэж байсан гэдэг. Гурван тэрбум гаруй төгрөгөө захын хакерт эвдүүлэх дрон үзүүлбэрт “хийсгэж” байхын оронд шатахууны нөөцөө зүй зохистой борлуулах бодлогын зохицуулалтыг нефть импортлогчидтой хийж байсан бол тэд ард түмнээс өндөр оноо авах байлаа. Гэвч Г.Ёндон сайд ард түмнийг хэрхэн басамжилсан ч, бодлогын ямар ч алдаа гаргасан хариуцлагагүй хүлээхгүй нь улс төрд өрнөж буй үйл явдлууд, өөрийнх нь мэдэгдлүүдээс харагдаж байна. Үүний цаана Ерөнхий сайд Л.Оюун-Эрдэнийн том өмгөөлөл байгааг улс төрийн хүрээнийхэн энэ өдрүүдэд бүр ч чангаар “шивнэлдэж” байна.