Монгол Улсын Ерөнхийлөгчийн ивээл дор дэлхийн 30 орны 570 гаруй монголч эрдэмтэн, судлаач Монголч эрдэмтний XIII Их хуралд чуулж байна. Монголын хэл, түүх, археологи, соёл, урлаг, утга зохиол, угсаатны зүй, уламжлалт мэдлэгээс эхлээд орчин үеийн нийгэм, гадаад харилцаа зэрэг олон чиглэлээр судалгаа, шинжилгээний бүтээлээ хэлэлцэж буй нь энэ юм.

     Монголын тухай судалгаа нь өнгөрсөн түүхээ танин мэдэхийн зэрэгцээ хэл, соёл, өв уламжлалын талаарх мэдлэгийг олон улсын эрдэм шинжилгээний орчинд улам баяжуулж, эх сурвалж, судалгааны үр дүнг дэлхийд хүргэхэд чухал үүрэгтэй. Тиймээс монгол судлал нь шинжлэх ухааны салбарын хүрээнээс давж, улс орнуудын эрдэм шинжилгээ, соёлын харилцааг өргөжүүлэн, харилцан ойлголцлыг бэхжүүлэх чухал талбар болжээ. Өнгөрсөн 12 удаагийн их хуралд 60 гаруй орны 4000 орчим эрдэмтэн, судлаач оролцож, монгол хэл шинжлэл, түүх, археологи, антропологи, угсаатны зүй, шашин, соёл, олон улсын харилцаа зэрэг 20 гаруй чиглэлээр 3000 гаруй илтгэл хэлэлцсэн нь монгол судлалын хамтын ажиллагаа, судалгааны цар хүрээ хэрхэн тэлж ирснийг илтгэнэ.

    Гадаад харилцааны салбарын хувьд монгол судлаачдын олон улсын хамтын ажиллагааг өргөжүүлэх, Монголын түүх, хэл, соёлын талаарх судалгаа, мэдлэгийг олон улсад түгээн дэлгэрүүлэх, залуу судлаачдын оролцоо, хамтын ажиллагааг нэмэгдүүлэхэд анхаарч ажиллах нь чухал байгаа билээ. Мөн Монголын түүхэн эх сурвалж, соёлын өвийг олон улсын судалгааны эргэлтэд оруулж, гадаадын эрдэм шинжилгээний байгууллага, судлаачидтай хамтын ажиллагааг улам бэхжүүлэх нь Монголыг дэлхийтэй холбох чухал гүүр юм.