Хичээлийн шинэ жилийн баяр өнөөдөр тохиож байна. Энэ баяр хүүхдийн төлөө нойр, хоолоо хугаслаж, сайхны төлөө, ирээдүйг бүтээдэг багш нарын баяр ч гэж болно. Багш мэргэжил хүний сэтгэлийн эмзэг нандин ертөнцөд гэгээнээр нэвтэрдэг хүн судлалын мэргэжил. Хүний шинэ сайхан чанарыг олж нээн хүн болох, хүмүүжих үйлийг тэтгэдэг эх булаг ч гэх нь бий. Тэгвэл хичээлийн шинэ жилийн баярыг тохиолдуулан дэлхийг өөрчилж, олон сая хүүхдийн ирээдүйг бүтээсэн таван шилдэг багшийн түүхийг хүргэж байна.

ӨНГӨТ АРЬСТ БООЛООС ЕРӨНХИЙЛӨГЧИЙН ЗӨВЛӨХ БОЛСОН БУКЕР ВАШИНГТОН БАГШ

Америкийн нэрт сурган хүмүүжүүлэгч нарын нэгт зүй ёсоор тооцогддог Букер Вашингтон бага ахуй насандаа гэр бүлийн хамт чинээлэг гэр бүлийн боол байжээ. 1856 онд төрсөн тэрээр ахлах сургууль төгстөлөө цагаан арьст айлын боол байсан бөгөөд сургуулиа төгсмөгцөө Хэмптоний их сургуульд багшаар элсэх хүсэлт гаргасан нь зөвшөөрөгдөж, Букер Вашингтон тухайн үеийн цөөн өнгөт арьст багш нарын нэг болсон байна. Тэрээр их сургуулиа төгссөний дараа Баруун Виржиниу мужид ажиллаж, хүүхэд, насанд хүрэгч, боловсрол эзэмшихийг хүссэн хэн бүхэнд зааж, буцаж нутагтаа ирээд Хэмптоний их сургуульдаа багшилжээ. Букер Вашингтон Алабама мужид Тускегийн сургууль гэх нэртэй сургууль нээсэн нь өдгөө Тускегийн их сургууль болон өргөжин хөгжиж, цэцэглэсэн түүхтэй. Букер амьдралынхаа дийлэнх хугацааг өнгөт арьст, нийгмээс тусгаарлагдсан хүмүүст боловсрол олгоход зарцуулсан бөгөөд АНУ-ын хэд хэдэн Ерөнхийлөгчийн зөвлөхөөр сонгогдон ажиллаж байжээ.

ҮНДЭСТНИЙ БОЛОВСРОЛЫН ТӨЛӨӨ АМЬДРАЛАА ЗОРИУЛСАН ЛЮСИЛА ГОДОЙ АЛКАЯГА

Латин Америкийн анхны Нобелийн шагналтан, нэрт багш Люсила Годой Алкаяга эх орондоо төдийгүй дэлхийд Габриэла Мистраль нэрээрээ танигдсан нэгэн байжээ. Габриэла Чили Улсад төрж, өссөн бөгөөд их сургуулиа багшийн мэргэжлээр дүүргэж, охидын сургуулиас эхлэн багшлах болсон байна. Улмаар сургуулийнхаа захирлаар томилогдсоныхоо дараа Чили  Улсад эмэгтэйчүүдийн боловсрол эзэмшилт өндөр байгаа ч эрэгтэйчүүд, нийгмийн зарим давхаргын хүмүүс боловсрол эзэмшиж чадахгүй байгааг хөндөж эхэлжээ. Тэрээр үндэстэн даяараа хөдөлгөөн өрнүүлж, нийгмийн бүх давхарга, эрэгтэй, эмэгтэй бүгдэд нь боловсрол олгох эрхтэй болгосон бөгөөд амьд ахуй цагтаа яруу найргийн бүтээл бичдэг байсан бөгөөд шүлэг, яруу найргаараа Латин Америкаас төрсөн анхны Нобелийн шагналтан болсон аж.

“ХҮЧИРХИЙЛЛИЙН ЭСРЭГ” УРИАТАЙ ДЭЛХИЙН ШИЛДЭГ БАГШ АЛЬ-ХРОУБ

Багш нарын Нобелийн шагнал гэгддэг “Дэлхийн шилдэг багш” тэмцээний ялагчдаас хамгийн их хүндэтгэл хүлээсэн нь Палестины багш Ханан Аль-Хроуб. Тэрбээр 2016 оны “Дэлхийн шилдэг багш” тэмцээнд “Хүчирхийллийн эсрэг” уриатай орж, хүчирхийлэлд өртсөн хүүхдүүдэд боловсрол олгож яваа амьдралынхаа түүхээр тэргүүлж байжээ. Ханан Аль-Хроуб бага насаа Палестины дүрвэгсдийн хуарандаа өнгөрүүлжээ. Их сургуулийн оюутан байхдаа англи хэлний орчуулагч болохыг хүсдэг байсан ч гэр бүл зохиосныхоо дараа Израилийн нутгаар зорчиж яваад армийн цэргүүдийн суманд оногдож хоёр хүүхдээ алдсан аж. Үүнээс хойш Аль-Хроуб өөртөө багш болж, хүчирхийлэлд өртөж, нийгмээс тусгаарлагдаж байгаа хүүхдүүдэд боловсрол олгох зорилго тавьж, ажлаа дүрвэгсдийн хуарангийн хүүхдүүдэд хичээл заахаас эхэлжээ. Түүний ажиллахыг нь харсан шүүмжлэгч, судлаачид “Аль-Хроубын хичээл заасан хүүхэд ямар ч муухай дурсамж, муу хүмүүжилтэй байсан ч өөрчлөгдөж чаддаг” гэсэн байна.

ХАТУУ АРГАТАЙ ЖОЕ КЛАРК БАГШ

Сурагчдада хатуу, ширүүн ханддаг ч амьдралыг нь өөрчилж, ирээдүйг нь бүтээж өгсөн гэдгээрээ Жое Кларк багш алдартай. Жое Кларк 1938 онд АНУ-ын Жоржиниа Рошель хотод төрсөн бөгөөд багаасаа багш болох мөрөөдөлтэй хүү байсан гэнэ. Тэрээр Уильям Патерсоны их сургуульд бакалавр, Сетон Холл их сургуульд магистрын зэрэг хамгаалж, АНУ-ын Спортын академийн хүндэт доктор бөгөөд АНУ-ын армид алба хашиж, сургуулилалт хариуцсан түрүүч цолтой байжээ. Жое Кларк багшаар олон жил ажилласныхаа дараа сургуулийн захирал болоод байхдаа хичээлээ байнга тасалдаг, согтууруулах ундаа, тамхи хэрэглэдэг 300 гаруй сурагчийг сургуулиас нь хөөсөн байдаг. Харин сургуулиасаа хөөгдсөн сурагчдад хоёр дахь боломж олгож байсан нь түүний “хатуу арга”-ыг бага ч болов зөөлрүүлж байсан гэнэ. Тэрээр нэгэн ярилцлагадаа “Магадгүй сурагчдын биеийг өвтгөж болох байх л даа. Гэхдээ амьдралыг нь, ирээдүйг нь өвтгөж болохгүй” гэж байжээ.

ОНЛАЙН СУРГАЛТЫН ЭХЛЭЛИЙГ ТАВЬСАН САЛМАН ХАН

Дэлхийн хамгийн алдартай багш нарын нэг гэгддэг Салман Ханыг сурагчид нь интернэтийн хүч чадлын тод жишээ гэж тодорхойлох нь бий. Пакистан гаралтай Салман Хан АНУ-д төрж өссөн бөгөөд онлайн сургалтын эхлэлийг тавьсан багш. Салман Хан онлайн сургалтын эхлэлийг “Yahoo”-гаас эхлүүлсэн бөгөөд тус платформ хэрэглэгчдийн хүртээл болоод удаагүй байх үеэс мессенжерийг нь ашиглан цахимаар сурагчдад хичээл зааж эхэлсэн байдаг аж. Өдгөө тэрбээр онлайн сургалтын Хан нэртэй академи байгуулаад байгаа бөгөөд “Youtube” хуудсаараа дамжуулан сурагчдад хичээл ордог юм байна. Түүний Хан академийн “Youtube” хуудас 10 орчим сая дагагчтай гэнэ.