• Өнөөдөр 2026-06-30

ДУУ БҮРИЙГ ЧИНЬ ЖАРГАЖ СОНСДОГ ШҮҮ, Д.ОТГОНЖАРГАЛ АА

2023-12-25,   3400

           "Хун юу цагаан галуу шувуу нь ээ хө

           Хулстай нуурандаа шумбан сууна даа хө

                Холын ахан дүүс минь хүрээд ирэв үү дээ

           Хонуудаар өнжүүдээр найрлан сууя даа хө..." гэж тэр аргадан санагалзан дуулна. Аль ч газар  Д.Отгонжаргалын дуулснаар “Хун галуу” дуу эгшиглэхэд саатан сонсохгүй байхын аргагүй. Өнөөдөр л гэхэд гурван удаа сонслоо. Араас нь “Өнө мөнх эх орон”-г залгуулж үймрэв. Дуундаа тухлуулж, хоргодуулж, уячихаад тавьдаггүй ямар яруу хоолой түүнийх юм бэ. 

“Захгүй говийн үзэсгэлэн
Загийн шугуйд дулаахан
Дулаан говийн хаваржаандаа
Дуучин ээж минь суугаа даа…” гэх “Миний ээж тэмээчин” дууг хэчнээн дотно, дулаан, ойр, сэтгээлээсээ мэтгэн дуулсныг сонсогчид андахгүй. Сонссон хэн бүхний нүдний аяга дүүрч, аньсага чийгтэйхэн ээжийгээ бодон суудаг.
Сэтгэлээс сэтгэл рүү аялгуугаар тийн хүчтэй нэвтэрч, норгож, зөөллөж, хайр энэрлийн халуун эгшнийг тэр бүрдүүлж чаддагаараа онцгой дуучин.
Үүгээр зогсохгүй хайр сэтгэлийг ч бүр санах, үгүйлэх, хайрлахын жаргалаар нь мэдрэн дуулж, үг аялгуугаа нэг бүрчлэн мэдэрч, дуулан хүргэхийг нь яана. Ийм болохоор л сонссон хэнийг ч жаргааж, хайрладаг гэмээр.
      Түүний дуу хуурт хөглөгдөн, хөтлөгдсөн үүтгэл нь “Титаник” киноны дуу гэнэ. Эл бүтээлийг сонсоод, “Хүнээс ийм гайхалтай хоолой гардаг байх нь” гэж боддог байж. Харин дуучин болох мөрөөдөл нь “Celine dion”-ний “My Heart will go on” дуунаас эхэлсэн гэдэг. Эмч, зураач гээд дуу хуураас огт өөр мэргэжилтэй болохыг мөрөөддөг байсан хүүхэд дууны сайханд, сайхан дуу сонсоод хүн жаргаж, баярлаж, гунихыг сайхныг олж, сонсогчдын зүрх сэтгэлийг жаргаах замыг сонгосон нь алдаагүй сонголт гэдгийг олон хүн хэлнэ байх. Ийм яруу тансаг, үг, аялгуу бүрдээ сэтгэлээ шингээн дуугарах дуучин байхгүйгээр төсөөлөхийн аргагүй. Тэгвэл түүний амьдралд олон сайхан зүйл авчирсан, өгөөжөө өгсөн бүтээлийн нэг “Хун галуу” аж.
 
       Энэ тухай “Англид сурч байхдаа гэрээ, ээж, охин хоёроо их санадаг байлаа. Яг тэр үед youtube сувгаас хичээлийнхээ судалгааг хайж байгаад Өвөрмонголын Баян нуур гэх хун галуу цугладаг сайхан нуураас сэдэвлэж хийсэн ая байсан. Тэр ардын хөгжмийн бүтээлийг сонсохоор л тайвшраад, гэр орноо санахгүй, хичээл номдоо шамдаад байсан. Сонсохгүй болохоор л зүрх сэтгэл үүлэн дээр суугаад Монгол руу нисдэг. Тэгээд Монголдоо очоод энэ дууг заавал дуулна гэж зорилго тавьсан. Ирээд дуулсан. Ээж минь миний хамгийн анхны сонсогч байдаг.
 
Мэдээж “Хун галуу” дуунаас өмнө дуунуудыг минь сонсож л байсан. Харин эл дууг сонсоод их уйлсан. Би энэ дуундаа их хайртай” гэжээ.
     Ингэж нутгаа санасан сэтгэлээр энэ гайхалтай дууг сонсогчдод хүргэж, сонссон хэн бүхэн хайлан уярч, хайрлан үгүйлдэг. Тэрбээр Улсын Филирмонид олон жил дуулж байгаад бие даан дуулах болсон. Мөн “Voice” хамтлагийг ч түүнээс салгаж ойлгох аргагүй. Яах аргагүй олон сайхан бүтээлийг ард түмний сэтгэлд хүргэсэн хамтлаг. Харин түүнийг хамтлаг, дуулж байсан хамт олноос нь гадна тодотгох нэг зүйл бол домогт Ану хатны дүр. Ухаалаг, үзэсгэлэнтэй, зоригт дайчин хатны дүрийг сайхан ч бүтээсэн. Тэгэхээр сайхан дуу хоолой, олон сайхан дуугаар эгшиглэхээс гадна Ану хатны дүрээр үзэгчдийн зүрх сэтгэлд залуу насаа тамгалан үлдээсэн уран бүтээлч. Ингэж дууг ч, дүрийг ч сонин бөгөөд энгийн даруугаар бүтээж, амьдруулж чаддаг элдэв өнгө,араншин үгүй тун даруу уран бүтээлчийн тухай дэлгэлээ. Үүний шалтгаан нь тэрбээр шинэ он айлчлахтай зэрэгцэн Монгол Улсын Гавьяат дуучин болж буй юм байна. Цоо шинэ гавьяат, ганган тансаг хоолойтой, даруу уран бүтээлчийн даацтай бүтээлүүдийг бид ирэх он жилүүдэд сонсоно гэдэгт итгэж байна.
 
Дууг сэтгэлийн гүн рүү хүргэж дуулдаг, сонсогчдоо бүтээл бүхэндээ жаргаадаг түүнд том баяр хүргэж, амжилт хүсье.
 
 


ДУУ БҮРИЙГ ЧИНЬ ЖАРГАЖ СОНСДОГ ШҮҮ, Д.ОТГОНЖАРГАЛ АА
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3
  • Сэтгэгдэл үлдээсэн: 2023-12-28 16:33:00
    Балжинням Дашням: Маш сайн дуучин.
  • Сэтгэгдэл үлдээсэн: 2023-12-26 12:14:08
    Би.: Монгол үнэхээр Монгол сайхан авьяасаар дүүрэн юмдаа. Отгонжаргал, Ариунбаатар, Уянгаа гээд л мөн ч олон сайхан дуучин авьяасууд байнадаа. Эд нар бол бөгс бөөрөө далбагануулахаас өөр “ид шид”-гүй зарим дуучин гэх тайчигч нарын хажууд жинхэнэ урлагийн одууд юм шүү!!!
  • Сэтгэгдэл үлдээсэн: 2023-12-25 18:31:11
    Иргэн: Өөрийн хүч, хөдөлмөр, чадалаараа авч байгаа гавьяат, мундаг байлаа, аль нэг сонгуулийг, аль нэг сонгогчийг дагаж далдагнаагүй , Гавьяат, ард тумэндээ үнэлэгдэж авах болсон шүү гэж авсан Гавьяат, шагнал зөв хүндээ очжээ. Баяр хүргэе.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.