ЗӨӨЛӨН ЗӨӨЛӨН ЗАМБУУЛИН БОЛ АРГАДЛЫН ШҮЛЭГ 

Ард түмний сэтгэлд хоногшсон “Зөөлөн зөөлөн замбуулин” дуу хэрхэн бүтсэн талаарх сонирхолтой дурсамжийг уншигч та бүхэнд хүргэж байна. 

“Агь үнэртсэн цэнхэр талын

Адуу нь дандаа соргог байдаг

Уужуу тайван ухаантай аавын минь

Үг нь дандаа эрдэнэ байдаг

Нар үдэлсэн буурал говийн

Салхи нь дандаа бүлээн байдаг аа

Насан өндөр сайхан ээжийн минь

Санаа нь дандаа сүү байдаг” хэмээх дууг 2000 онд СГЗ Л.Мөнхтөр гуай Бээжинд олон улсын радиод мэргэжилтнээр сурч байхдаа "Зөөлөн аялгуу" хэмээх шүлэг бичсэн гэдэг. Түүний шүлэг олон түмэнд таалагдаж, 2003 оноос дуу болсон нь энэ билээ. Тэрбээр “Би өнгөрсөн хугацаанд 100 гаруй дуу хийсэн байна. Тэр дундаас ганцхан энэхүү дууг "Тухайн үеийн гавьяат жүжигчин одоогийн Ардын жүжигчин С.Батсүх дуулна" гэж бодож хийгээрэй гэж би ая зохиогч Н.Баасандоржид захиалга өгч байсан юм. Яагаад гэвэл, тухайн дууны шүлгийг нутгаа санаж бичсэн.  Хүний амьдрал нийгмийн аясыг дагаж байдаг. 2000-аад онд монголчууд бухимдангуй, уцаартай болчхсон юм шиг санагддаг байсан болохоор яруу найрагчид нийгмийг тайвшруулж, гэгээтэй талыг нь олж харахгүй бол болохгүй юм байна гэж бодоод нутгаа санасан шүлэг бичиж байлаа. 

“Болжмор үүрээ зассан харгана

Ижий минь алгаа дэлгэсэн юм шиг байдаг

Ботгондоо яарсан ингэний буйлаан 

Ээрэм талынх нь уянга байдаг” хэмээх дөрвөн мөртийг нь хасаад гурван бадаг дуу болгочихсон юм. Ардын жүжигчин С.Батсүх дуулснаар монголчууд дуулдаг, мэддэг болчихсон гэж боддог. С.Батсүхийг л би аргадаж дуулах байх гэж бодсон. Тэр нь ч оносон. Энэ бол аргадлын шүлэг шүү дээ. Шүлэг тархинд олон хонож, цаасан дээр нэг л өдөр буудаг. Цаасан дээр буусных нь дараа засвар хийлгүй яах вэ. Энэ дууны дахилтыг нь сүүлд нь бичсэн юм. Хүн зүүдэндээ хүртэл жаргаж сэрж байгаасай гэдэг санаагаар 

“Зүүд хүртэл жаргаж сэрдэг

Зөв явбал зөөлөн зөөлөн замбуулин” гэж дахилтыг нь бичиж байлаа. С.Батсүх “Л.Мөнхтөр надад энэ дууг зориулаад хийчихсэн юм шиг санагддаг” гэж хошигнодог юм. “Зөөлөн замбуулин” гэдэг үгийг хүн бүхний хэрэглээ болгосон хүн нь би байхгүй юу. Түүнээс биш бүгд энэ үгийг мэднэ, хэлнэ шүү дээ.

      Н.Баасандорж Замын-Үүдэд томилолтоор ажиллаж байхдаа аяыг нь зохиож, гэрийн утсаар надад аялж өгч байсан юм. Тухайн үед нь би сайн, муу болж гэдгийг ч мэдэхгүй ямартай ч аялгуу хийжээ гэж бодож байсан. Монгол орон бол тал, хангай, говь хосолсон өргөн уудам нутагтай. Тэр дундаа миний нутаг зүүн талаа Их монголын элсээр мануулсан, баруун талаа Хүйсийн алдарт говиор тэлсэн.Хойгуураа Дөргөн нуураар хашсан, урдуураа Бэрх бичигтийн уулсаар хүрээлсэн ийм нэгэн авшиг шингэсэн нутаг байдаг. Манай нутагт уул, ус, ургамал, цэцэг, говь, цөл, элс манхан, хүний хүссэн бүхэн бий гэж боддог. Хангайн хүн ирээд халаглаж мэднэ. Гэхдээ төрсөн нутагт муухай юм гэж байхгүй. Миний нутаг наддаа хангай, наддаа говь шүү дээ. 

"Зөөлөн зөөлөн замбуулин"

Үг: Л.Мөнхтөр

Ая: Н.Баасандорж

Агь үнэртсэн цэнхэр талын

Адуу нь дандаа соргог байдаг аа

Уужуу тайван ухаантай аавын минь

Үг нь дандаа эрдэнэ байдаг аа

Зүүд хүртэл жаргаж сэрдэг

       Зөв явбал зөөлөн зөөлөн замбуулин

       Нар үдэлсэн буурал говийн

Салхи нь дандаа бүлээн байдаг аа

Насан өндөр сайхан ээжийн минь

Санаа нь дандаа сүү байдаг аа

       Зүүд хүртэл жаргааж сэрдэг

        Зөв явбал зөөлөн зөөлөн замбуулин

Бүжин туулай хярсан бутыг

Харахад нэг л нөмөртэй байдаг аа

Бүүвэй аялсан бүсгүй хүний

Харц нь дандаа зөөлөн байдаг аа

       Зүүд хүртэл жаргааж сэрдэг

       Зөв явбал зөөлөн зөөлөн замбуулин