Р.АНХНЯМЫН АСААСАН ГЭРЭЛ

Д. Бямбасүрэн:
Соёл урлаг

2023-04-24, 3988

Р.Анхнямыг үзэгчид мэднэ дээ, намбалаг, тайван, дөлгөөн, үзэсгэлэнтэйгээр дүрээ гаргаж чаддаг даруухан мөртлөө даацтай жүжигчин гэдгийг нь.

"Мөрөөдлийн хөлөг онгоц" киноны даруухан үзэсгэлэнт эмэгтэйгээс, “Чонон сүлд" киноны Галсмаа, "Гаадаа мээрэн", "Секс эрх чөлөө" киноны Энэрэл, "Хайрын эрэлд" киноны Маргад, "Хайр эргэсэн хавар", "Чингисийн хүүхдүүд" зэрэг киноны гол болон туслах дүрд тоглосон. Эдгээрээс онцолбол, "Чонон сүлд" киноны Галсмаагийн дүрээс эхлээд л бид түүнийг мэдэж тийм нэг боддог, боловсруулдаг, туйлбартай, буурьтай дүрийг харах болсон. Хятад, Монголын жүжигчдээс онцгойрон тус кинонд тоглосон нь монгол жүжигчдийн чансааг өргөсөн үйл явдал болсон. Тэгвэл тэрбээр "Чонон сүлд" киноны дүрийнхээ талаар "Би яг л жинхэнэ монгол эмэгтэй байх юм сан гэж бодсон. Яагаад гэвэл Хятад, Өвөрмонголын хэдэн сая жүжигчдээс олон шалгуурыг давж сонгогдсон учраас би ямар нэг алдаа хийх эрхгүй. Тэгээд ч би хятад биш жинхэнэ монгол жүжигчин гэдэг утгаараа яг л монгол эмэгтэйн төрхийг гаргахыг л маш их хичээсэн" гэж ярьсан байдаг.

-Р.АНХНЯМЫН СТИЛЛ БУЮУ СОДОН ДҮР-

Тэр "Хайрын эрэлд" кинонд зээлийн компанид мэргэжилтнээр ажиллаж, хэлтэс хариуцсан дарга болоод гараараа ирүүгээ тулж байгаад л бодоод суучихдаг даа. Яг эл дүр шигээ л тэр Монголын урлагт тулхтай уран бүтээлчдийн нэг байж олон сайхан бүтээлийн ард гарч яваа. Хамгийн сүүлд гэхэд найруулагч Э.Ган-Очирын бүтээл "Дасгалжуулагч" киноны гол дүрд хөлөө алдсан Оргил хүүгийн ээжийн дүрд тоглосон. Мөн л түүнд оносон мэт дүр. Учир нь хайр, энэрлийн дүр түүнд ямагт зохидог. Түүгээрээ ч тэр урлагт тийм нэг өөрийн гэсэн гэрэл асаасан уран бүтээлч. Энэ дүрд ажилласан тухай тэрбээр "Энгийн ээжүүдээс илүү ямар нэгэн байдлаар эрүүл мэндээ алдсан хүүхдийн ээжүүд хүүхдээ асрах, гэр бүлийнхээ асуудлыг шийдэх гээд илүү ачаа үүрдэг. Хүүхдээ амьдралд хөл тавих ухааныг олгох гэж их ухаан зарцуулдаг нь харагдсан. Жишээлбэл, миний хүүхэд гээд эрхлүүлээд байх биш, аль болох өөрийг нь бие даалгаж, хөгжиж боловсрох нөхцлийг нь бүрдүүлэх гээд олон асуудалтай тулгардаг юм байна лээ" гэжээ. Магад тэр найруулагчаас авсан дүрдээ өөрөө ийн оносон мэт орж, өөрийн мэт тоглодог нэгэн байх. Тийм болохоор л дүр бүхэн нь төгс сайхан наалдаж, тухайн уран бүтээлийг үзэхэд "Энэ яг л Р.Анхням жүжигчинд тохирсон дүр юм" гэмээр л байдаг. Мөн мөн чанар, уг шинжийг нь өөртөө бүрэн шингээж, дамжуулахыг хичээдэг нь олон бүтээлээс нь илэрхий харагддаг.

-ДОТРООСОО ГЭРЭЛТЭГЧ-

Түрүү жил ч тэр шуугиулсан. Яг л өнөө "Чонон сүлд" кинонд тоглохоор сонгогдож байсан үе шиг ээ. Монгол жүжигчид анх удаа АНУ-ын тайзан дээр англи хэлээр бүрэн хэмжээний "73 цаг" гэх үндэсний жүжиг тоглоход тэр мөн гол дүрд нь сонгогдож, амжилттай сайхан оролцоод ирсэн. Нэгэнт түүний гадны кинонд тоглосон дүрийг ярьж байгаагийнх "Song of love” киноны Дүгиймаа гэх Өвөрмонгол бүсгүйн дүрийг онцлохгүй өнгөрч боломгүй. Эх хүний дүрийг их сайхан бүтээсэн. Одоо ч үсээ хоёр хуваан сүлжиж, толгойгоо алчуураар боосон бор хүрэн дээлтэй Дүгиймаа харж байх шиг санагддаг. Тэгж дүрдээ итгүүлж чадсан.

Ингэж л урлагт тэр Р.Анхням гэсэн орон зай, үзэсгэлэн гоо, үнэн чанарын бат бөх хөрсийг суулгаж, түүндээ өөрөө эзэн нь байж усалж, тордсоор нэг мэдэх нь чамгүй олон бүтээлийн ард гарчээ. "Би шинэ зүйлд өөрийгөө сорих дуртай. Яг юу нь хэцүү юм бэ. Яагаад би чадахгүй байна гэдгээ тодорхойлохыг хүсдэг. Чадахгүй бол өөрийгөө хүлээн зөвшөөрөх хэрэгтэй. Тэгэхгүй чадах, чадахгүйн дунд өөрийгөө хүлэх хэрэггүй. Аливаа зүйлийг тодорхой болгох нь чухал" гэсэн түүний үзэл ч уран бүтээлд нь нягт тусдаг бололтой. Үзэгчидтэй аль нэг уран бүтээлээр уулзах бүрдээ тэр өөр нэгэн байж, илүү өөрийгөө чамбай болгож, чадвараа өсгөн үзүүлдэг.

-ЧИМЭЭГҮЙ ШИЙДВЭРЛЭГЧ-

Тэр бусад уран бүтээлчийн адил жүжигчин болох онцгой содон шийдвэр, хүсэл мөрөөдлөө гаднаа илэрхийлж байгаагүй юм билээ. Гэсэн ч сэтгэлдээ бол хэдийнэ уран бүтээлч болох тухай бодчихсон л байж. Тэгээд л дунд сургуулиа төгсөх жил багш нь "Ямар мэргэжилтэй болох вэ" гэхэд нь “Жүжигчин болно” гээд хүмүүсийг гайхшруулж байсан гэдэг. Даруу төлөв, тэр бүр юмаа дэлгэж яриад байдаггүй охины шийдвэр болохоор хүмүүс ч ихэд гайхаж. Ингэж л эрс шийдэж, шийдвэртээ эзэн байсаар өнөөдрийг хүртэл алхжээ, тэр. Ажаад байхад тэр ганц киноны дүрд тоглоод зогсохгүй тухайн уран бүтээлийнхээ тухай ярьж байгаа, утга санааг нь илэрхийлж байгаа нь цаанаа нэг ухаалаг, хэрсүү, ихэд нухацтай. Тэгэхээр боддог, мэддэг, түүнийгээ хурц, тодорхой илэрхийлдэг нэгэн. Энэ нь хувь зан чанартай нь холбоотой байна. Тэгэхээр өөрийн характер, үзэл бодол, ертөнцийг харах өнцөг, мэдрэмжээрээ тэр дүрээ өрж, жинхэнэ монгол эмэгтэй дүрийг олноо гайхуулж, төлөөлж, цэх байж ирсэн жүжигчин.

-ТҮҮНИЙ АСААСАН ГЭРЭЛ-

Түүний асаасан гэрлийг тодруулж хэлэх юм бол тэр жинхэнэ монгол эмэгтэйн илч гэрэл, мөн чанарыг өөрөөсөө асаасан эмэгтэй. Тэгээд монгол эмэгтэйн цэвэр сайхан зан чанар, ариун гэгээн ухааныг тээн өвлүүлж, дамжуулан нутагшуулж яваа жүжигчин. Энэ нь ганц төрх байдлаараа ч бус зан чанар, үйл байдал, ёс зүй, ёс уламжлал гээд цөм багтана. Тийм болохоор гадны хоёр, гурван том уран бүтээлд монгол эмэгтэйн дүрийг гарган ажилласан болов уу. Энэ зам жим нь залуу ирээдүйтэй, хүсэл мөрөөдөл дүүрэн уран бүтээлчдийг хүслийг бадрааж, хөтөлж байгаа нь гарцаагүй ээ. Тиймээ, тэр бол гэрэл асаагч.

Р.АНХНЯМЫН АСААСАН ГЭРЭЛ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 5

Сэтгэгдэл үлдээсэн: 2023-04-26 14:59:05

Зочин: Анхням даруухан бөгөөд чадварлаг жүжигчин Сайхан бүсгүй.
Сэтгэгдэл үлдээсэн: 2023-04-26 14:59:03

Зочин: Анхням даруухан бөгөөд чадварлаг жүжигчин Сайхан бүсгүй.
Сэтгэгдэл үлдээсэн: 2023-04-25 03:55:09

irgen: Anhnym bol tur .soeliin said nudtei bol uon Undarmaa.hoshin shogiinhon ali hezeenii Gaviyat tsol.odoo bol Ardiin avah bsan daa.Daanch denduu chimeegui Gereltegch .saihan busguichuuded bol deeguur oroh jujugchin shuu.Hurdan Gaviyat tsol olgoosoi.Ard tumen emnees n ih nehdeg shuu
Сэтгэгдэл үлдээсэн: 2023-04-24 11:57:08

zochin: Egel daruuxan engiin murtluu chadvarlag mundag jujigchin shuu
Сэтгэгдэл үлдээсэн: 2023-04-24 10:03:12

irgen: Setguulchiin sanaa ni ug ni zuv, gehdee utga nairuulga, zuv bichgiin durmiin boon aldaa. bas het ih hoosorson, neg ug, utga sanaagaa olon davtsan magtaal, Bichuulj baigaa hun ni baitugai unchigch ni sanaa zovmoor. Ene buhnees uudeed duree, sedvee zavaaruulaad haychih yumaa. Tsaashid anhaaruulah uudnees uuniig bichlee, sorry.