Зэвүүн юм аа, Цэрэн. Жийрхэм ч юм. Аажуухнаар эсгэх хүйтэн харц, дургүй хүрэм ёжтой инээмсэглэл, гэнэтийн дайралт гээд эсрэг дүрийн ёстой магнат юм байна аа, тэр. Аргагүй дүрэмгүй хотын дүрэмгүй, дур зоргоороо, юунаас үл айх, юуг ч хийж мэдэх аюултай хүний ийм дүрийг жүжигчин М.Наранмөнх л бүрэн гаргана гэдгийг "OI" энтертайнментийн Р.Эрхэмбүрэн найруулагч зөв харжээ.

          Угаас түүний бүтээлдээ өрөөд байгаа дүрүүд байгаа онож, эзнээ олж буугаад байгааг үзэгчид анзаарч байгаа байх. Түүнийг Бүрнээ найруулагч "Хүсэл" киноноос эхлээд алгуурхан ажиглаж, нэг тийм часхийсэн амттай, гэхдээ хэн бүрийн аазгайг хөдөлгөж, зэвүүг хатгасан эсрэг дүрийг бодон боловсруулсан болов уу. Арай Цэрэнд хүрэхгүй ч түүнээс өмнө найруулагчдаа  "Яг л болох юм байна" гэсэн бат итгэл өгсөн дүр нь "Галзуу дурла" киноны дүр. Тэгвэл үнэхээр олж чаджээ, эрхэм найруулагч аа. М.Наранмөнхийг ингэж л тэсрүүлж, дотоод их бөмбөгийг нь дэлбэлж, хамаг бүхнийг нь түрэн гаргах байсан юм. Гэхдээ зүгээр л нэг салбаганасан эсрэг дүр биш тогтвортой, томоотой, буурьтай суурьтайгаар инээж байгаад хоолойг нь хэрчих, эвийлж байгаад нуруунаас нь хутгалж мэдэх алуурчин, яргачны дүрийг үнэхээр үзүүлж чадлаа.

   Эндээс л түүний кино урлагт өөрийгөө харуулах цаг хугацаа жинхнээсээ эхэлж байна. Нөгөө талаар Эрхэмбүрэн найруулагч түүнийг байгаа өгөгдөл, нөөц бололцоо дээр нь эсгэж чадаж байгаа шиг тэр "OI" энтертайнментийн багийнхаа уран бүтээлд өнгө, амт нэмж, тодруулж байгаа. Нэг ёсондоо тэд харилцан нэгнийгээ бүрдүүлж, бүтээж байгааг ч дурдах нь зүйтэй болов уу.