“МӨРӨӨДЛИЙН ТЕАТР” ТАЙЗНАА ЭРГЭН ИРЛЭЭ

         "Мөрөөдлийн театр" дахиад л ээлжит бүтээлээрээ тэсрэлт хийх нь. Угаас тайзнаа тэсрэлт хийж л байсан тэд даацтай бүтээлийг зоригтойхон барьж аваад, дэлгэх нь. Нэрт сэтгүүлч, СГЗ, зохиолч Ц.Балдоржийн “Шөнө буусан аадар” зохиол тэртээ 2004 онд Төрийн шагналт, УГЗ, найруулагч Н.Наранбаатарын найруулгаар тайзнаа "амилж" байлаа. Тэгвэл эл зохиол Э.Ёндоншаравын найруулгаар тайзнаа орчин цагийн өнгө аясаар “эвдэгдэн” тоглогдох гэж байна.

     Үзэгчдийн сонирхлыг ихэд татаж, хүлээлт үүсгэж буй  “Шөнө буусан аадар” хэмээх гайхалтай уран бүтээлийг үзэгчдийг хүртээл болохоос урьтаж, бэлтгэл дээрээс нь үзэж, тайзны арын амьдралтай танилцах таатай байлаа. Мөн тайзны хувьд уламжлалт театрын хэв загвараас ангид ногоон зүлэгт аадар бууж буй мэт шийдэж, яг л гэр мэт орчин бүрдүүлж, хар, цагааныг хослуулсан нь ихэд онцгой харагдаж, дүрийн сонголт, найруулгын хувьд шинэлэг, сонирхолтой юм. 

"Мөрөөдлийн театр" ногоон зүлэгт, аадар буулгана

    Эл жүжгийн гол дүр болох Энхээгийн дүрийг МУГЖ Д.Ганцэцэг бүтээж байгаа билээ. Тэр урлагт орсон цагаасаа тайз, дэлгэцийн урлагт тод гялалзсаар яваа чансаатай уран бүтээлч. Монголчуудын зүрх сэтгэлд тодхон үлдсэн “Жинжиймаа” уран сайхны киноны Хонгорзул охины дүрийг нь хүн бүр мэдэх биз ээ. Тэр өнгөрсөн жил “Гэм зэм” жүжгийн яллагчийн дүрээр мөн л гайхшируулж, “Гэгээн муза”-гаас Драмын жүжгийн төрөлд шилдэг эмэгтэй гол дүрийг хүртэж байв.  Харин  өнөөдөр “Шөнө буусан аадар” жүжгээр бас нэгэн тэсрэлтийг хийх гэж байна.  Тэртээ 2004 онд тэр уг жүжгийн охины дүрийг бүтээж байсан бол одоо ээжийнхээ дүрд тоглож байна. Цаг хугацаа эргэхийн хэрээр түүний авьяас чадвар өсөн дэвжиж, залууст үлгэр дуурайлал болох цаг нэгэнт болсон нь тайзны бэлтгэлийн үеэр залуу жүжигчдэд зааж, зөвлөж, найруулагчтай гар нийлэн ажиллаж байгаа нь илтгэнэ.

   Харин түүний аав Халзангийн дүрийг Ардын жүжигчин Г.Мягмарнаран бүтээж байгаа аж. Намуухан дөлгөөн дуугаар жүжиглэх түүний үг, үйлдэл, хөдөлгөөн бүрийг залуу жүжигчид тун няхуур ажиглаж зогсоно. Мөн тус жүжигт СТА Г.Алтаншагай, Ч.Баярмаа, Ц.Алдармаа болон залуу жүжигчин Б. Хэрлэн, Б.Сосорбурам, Х.Намуун, Б.Гэрэлтуяа нар тоглож байна. 

   Ийнхүү “Мөрөөдлийн театр”-ын уран бүтээлчид гурван жилийн дараа тайзнаа эргэн ирэхдээ хатуу үг хэллэгтэй, даацтай уран бүтээл “барьж” авсан нь "Шөнө буусан аадар" жүжиг. Ингээд тайзны ард дүрдээ орж, үзэгчдэд цоо шинэ Эрхэмээ, Сөрөлтийг үзүүлэхээр бэлтгэлээ хийж байсан хоёртой ярилцсныг хүргэж байна.

ЖҮЖИГЧИН Г.ЭРХЭМБАЯР: Жүжгээ нээнэ гэхээр нойр хүрэхгүй, гэгэлзэж байна

      “Анх театраа байгуулж, “Мөрөөдлийн театр” гэх айлын өрхийг татаж байсан үе шигээ догдолж байна. Бид анх байгуулагдахдаа  театр гэж нэрээ өгсөн нь учиртай. Миний бие  сүүлийн жилүүдэд “Бүтэн амьдрал” “Эрвээхэйн сүүдэр” зэрэг дэлгэцийн уран бүтээлд тоглолоо. Тайзаа, үзэгчдээ маш их санаж, жүжгээ нээнэ гэхээр нойр хүрэхгүй, гэгэлзээд л байна.  Манай хамтлаг энэ удаагийн тайзны бүтээлээрээ УДЭТ-д 2004 онд тавигдаж, тухайн цаг үеийн оргил болсон жүжигчид тоглож, 45 хоног тасралтгүй тоглогдож, үзэгчдийг хуйлруулж байсан бүтээлийг сонголоо. Бид уг жүжгийг албан ёсны эрхтэйгээр, Ц.Балдорж агсны эх зохиолын нэр болох “Шөнө буусан аадар” нэрээр нь орчин цагт тохируулан, шинэчлэн найруулж, үзэгчдэдээ хүргэхээр зэхэж байна.  Гайхалтай жүжигт дүр бүтээхээс гадна АЖ Г. Мягмарнаран, МУГЖ Д. Ганцэцэг нартаа хамтран тоглож, тэднээс суралцах завшаан олдсонд уран бүтээлч хүний хувьд ихэд бэлгэшээж, баярлаж байгаа. Б.Жаргалсайхан ахынхаа бүтээж байсан дүрийг бүтээж, өөрөөр харуулна гэдэг надаас их уран чадвар, ухаан шаардсан. Хэдий би олон эсрэг дүр бүтээсэн ч дүр бүр өөр, өөрийн өнгө төрх, “сүнстэй” байдаг. Жүжигчний ажлын хамгийн том багаж, эрдэнэс бол зохиол байдаг. Би энэ зохиолыг “амьтай” гэж боддог. Энэ агуу зохиол эргэн тоглогдох, ахин чангаар “дуугарах” цаг нь нэгэнт иржээ гэх мэдрэмж төрсөн. Тийм учраас нийгмийн захиалгаар “Шөнө буусан аадар” жүжиг тайзнаа тоглогдох цаг нэгэн болсон байна.

ХҮН ҮНЭНИЙГ ХАЙЖ, ХУДАЛТАЙГАА ЭВЛЭРЧ АМЬДАРДАГ

    Манай жүжгийн гол дүрийн гэр бүлийн хүүхдүүд гар утсанд донтогч, хүйсээ солиулагч, аав нь УИХ-ын гишүүн, найз нь түүнийг ивээн тэтгэж, эхнэртэй нь явалддаг.  Эхнэр нь шунал тачаал, улаан дарсанд донтсон нэгэн. Энэ гэр бүл бүх худал хуурмагаа нууж амьдардаг ч мөн чанартаа ийм хүмүүс гэдгийг харуулахыг л бид хүссэн. Өнөөдөр, маргааш, нөгөөдөр гэж өдөр солигддог шиг “Мөрөөдлийн театр”-ын  өнгө төрх өөрчлөгдөж, тиймдээ ч үзэгчид энэ цаг үед ямар бүтээл үзэхийг хүсэж, нийгэмд юу нэхэгдэж байгааг мэдэрч, илүү чанартай уран бүтээлийг хийхийг л зорьж явна.

ЖҮЖИГЧИН Л.СӨРӨЛТ: Энэ цагийн “Шөнө амталсан нулимс” жүжгийг энэ цагийн хэв маягаар шинэчлэн тавихдаа манай хамт олон дутуудуулчихгүй юм сан гэж хичээж байна

“Хэдий өнгөрсөн хугацаанд дууны уран бүтээлээр тайзнаа гарч байсан ч театрын тайзаа санасан байна. Энэ цагийн мундаг найруулагчид болох Төрийн шагналт, УГЗ, найруулагч Н.Наранбаатар, ГИТИС-ийг төгссөн Э.Ёндоншарав нартай хамтран ажиллах, тэдний зааж зөвлөсөн зүйл дээр сэтгэлийн мухарт эмзэглэж явдаг, үг, үйлдлээ нэмэх завшаан тохиосонд баяртай байна. Мөн 2005 онд маш чадварлаг, чансаатай уран бүтээлчдийн бүтээсэн “Шөнө амталсан нулимс” гэх гайхалтай жүжгийг бид энэ цагийн хэв маягаар шинэчлэн найруулж, дутуудуулчихгүй юм сан гэж хичээж, ажиллаж байна.

      Өнөөдөр бид зохиолыг тэр цаг үеэс нааш татаж, шинэчлэн найруулахад хүндрэлтэй зүйл олон гарсан. Тухайн үед эмэгтэйчүүд өөрөөсөө 10-20 насаар ах хүнтэй уулзаж, гэр бүл болно гэдэг байж болохгүй мэт эмзэг сэдэв байлаа. Үүнийг яг тэр хэвээр нь одоо цагт тайзнаа амилуулчихвал байдаг л нэг үзэгдэл болно. Тиймээс бид зохиолд нэлээд засвар хийж, үзэл бодлоо солилцож, зарим үйл явдлыг бүтэн эргүүлсэн. Энэ жүжиг өнөөгийн нийгмийг өнгөтөөр харуулна гэдэгт итгэлтэй байна.

        Үзэгчид намайг хошин урлагийн жүжигчин эсвэл дуучин гэж хардаг байх. Угтаа би жүжигчин мэргэжлийг эзэмшсэн учир бүхий л дүр бүтээнэ шүү дээ. Энэ төрлийн дүрд тоглож байсан удаатай. Гэхдээ “Шөнө  буусан аадар” жүжгийн Чингүний дүр  их онцлогтой. Нэг л их гомдож туньсан, өөрийгөө ихэд бодсон, цагаа тулахаар аймхай, бусдыг өөрийнхөө өмнөөс ялалдаг зэрэг сэтгэл зүйн маш олон шилжилтүүдийг харуулдаг. Үүнийг би хэрхэн тодотгож, гаргаж ирэх үү гэж бодож, найруулагчтайгаа зөвлөлдөж байгаа. Бид өнгөрсөн есдүгээр сард тоглохоор бэлтгэлээ хийж байсан ч тоглож хараахан чадаагүй. Өнгөрсөн нэгдүгээр сараас эхлэн дахин бэлтгэлдээ орсон. Ингээд харахад багагүй хугацаанд бэлтгэлээ хангаж, дахин дахин засварласан учир тайзнаа тоглоход асуудал гарахгүй гэдэгт итгэлтэй байгаа. Гэхдээ миний голлож тоглосон хэсэг хэтэрхий хурц үг хэллэгтэй учир үзэгчдэд хүндээр тусах вий гэсэн бага зэргийн айдастай байна. Миний дүр дээр эмэгтэй хүн тоглож байсан учир үйл явдал яаж эргэх үү гээд үзэгчдэд ихээхэн сонирхолтой байх болов уу. Цаг хугацаа гэрлийн хурдаар өнгөрч, цаг үе эргэнэ гэдэг их сонин шүү. Өмнө энэ жүжгийн охины дүрд тоглож байсан МУГЖ Д.Ганцэцэг эгч өнөөдөр ээжийнх нь дүрд тоглож байх жишээтэй”

            Бид “Шөнө буусан аадар” жүжгийг тайзны араас үзэж, уран бүтээлчидтэй цөөн хором ийн ярилцлаа. “Мөрөөдлийн театр” ээлжит тэсрэлтээ хийнэ гэдэгт итгэлтэй байна. Тиймээс уншигч та бүхэн тэртээх он жилүүдийг өртөөлөн энэ цагт эргэн “амилж” буй уг жүжгийг үзэж, өөрийн оюун бодол, тархиа баясгаж, өнөөгийн нийгмийн үнэн өнгө төрхийг талаар эргэцүүлээд нэг үзээрэй.