OI интертайнментийн найруулагч, жүжигчин Р.Эрхэмбүрэнгийн төрсөн өдөр өнөөдөр тохиож байна. Тэрбээр “Хөтөч”, “Хүсэл”, “Гайхамшигт ертөнц”, “Галзуу дурла”, “No Rules”, “Солонго үүл” зэрэг киног найруулсан юм.

     Бидний дэргэд үргэлж байдаг ч огт анзаардаггүй, заримдаа бүр ор тас мартагддаг нөхөрлөл, хайр, амьдралын үнэ цэнийн тухай хөнддөгөөрөө тэр бусад найруулагчаас онцлог. Мөнхүү үе тэнгийн найзуудтайгаа хамтран, тэдний авьяасыг өрдөж, өөрийнхөөрөө түлхүүрдэж яваа найруулагч. Тэдэн дундаасаа өөрийн мэдрэмж, хурц хараа, оновчтой дүр сонголт, бүтээлийнхээ голыг олдог зан чанараараа ургасан уран бүтээлч. Дээрх уран бүтээлээс тэргүүнд тэр “Манан зүсэгч” гэх адалт явдалт мөртлөө анхаарал татсан киногоор найруулагч хэмээх хаалгыг татан орж ирсэн. Тэндээс өнгө төрх, мэдрэмжээрээ ялгарч, түүнийгээ найзуудтайгаа дагуулан яваа. Р.Эрдэнэбүрэн найруулагч анхнаасаа жүжигчин болно гэж бодоогүй юм билээ. Есдүгээр ангиасаа хойш л урлагийн хүн болох замаа эргэлт буцалтгүй шийдсэн байна. Ингэж сургуульдаа орж жүжигчнээр төгсөөд, найзуудтайгаа хамтран кино найруулж, “Хөтөч” гэх олон ангит киног үзэгчдэд хүргэсэн. Гэхдээ тэр зөвхөн жүжигчин, эсвэл найруулагчаар ажиллаад зогсоогүй. Киноны зохиол бичиж, өөрийн сонгосон замаар юу хийж, бүтээж болох бүхнийг нь хийж, өөрийнхөөрөө авьяас чадвараа сорьж яваа залуу уран бүтээлч. Анхлан “Миний ах атаман” киноны зохиолыг найруулагч Б.Тамиртай хамтран бичсэнээр зохиол бичих хүсэлд хөтлөгджээ. Өөрийн хийсэн, оролцсон зүйлийнхээ амтанд орж, дараа нь түүнийгээ бие даан хэрэгжүүлж, суралцдаг. Одоо ч ээлжит бүтээлээ хүргэхээр тэр бодож, суралцаж, өөрийгөө шахаж л суугаа.