Монгол Улсын Хөдөлмөрийн баатар Мөнхбатын Уранцэцэгийн төрсөн өдөр өнөөдөр тохиож байна. Баянхонгор аймгийн Баян-Овоо сумын уугуул тэрбээр жүдо бөхийн барилдааны 48 килограммын жингийн Дэлхийн аварга, ДАШТ-ийн мөнгө, хошой хүрэл медаль, Ази тивийн аварга, ААШТ-ний хошой хүрэл медальт, Токиогийн олимпын хүрэл медальт тамирчин. Бөхийн удамтай, багаасаа бөхөд сонирхолтой байсан тэрбээр 2016 онд “Женко” клубын тамирчин болсноос хойш уралдаан, тэмцээнд хүч үзэх болсон билээ. Түүний нэг онцлог бол хэвтээ барилдаандаа түлхүү сайн бөгөөд гартаа ер бусын гэмээр хүчтэй гэдгийг хамт тэмцээнд явдаг тамирчид болон багш нь онцлон ярьдаг.

   Тамирчин хүний хамгийн дээд оргил бол олимп. Эмэгтэй хүний хувьд гэр бүл зохиох, хувийн амьдралдаа төдийлөн цаг гаргаж чадахгүйгээр бэлтгэлдээ хамаг цагаа зориулсан М.Уранцэцэг “Токиогийн олимпод түрүүлчихвэл л болоо” гэсэн найдвар тавьж байсан. Гэхдээ тэр хоосонгүй, хүрэл медалийн болзол хангасан ч өөрийнхөө хувьд жаахан чамлалттай байгаагаа хэвлэлд ярьж байв. Гэсэн ч тэр олимпоос медаль хүртэнэ гэсэн зорилгодоо хүрсэн болохоор өнгөрсөн нэгдүгээр сарын 15-нд албан ёсоор жүдо бөхийн спортоос зодог тайлж, жүдо хэмээх их айлд 16 жил хөдөлмөрлөж, жаахан байхаасаа мөрөөддөг байсан мөрөөдөлдөө хүрч яваа эмэгтэй. Гэхдээ тэр зодог тайллаа гээд спортын хүн болж байгаа хэрэг биш бөгөөд холимог тулааны UFC холбоонд тулалдахаар болсноо мөн дуулгасан. Тэр одоо шинэ сорилтынхоо эхлэлд дээр зогсож байгаа. Одоо Монголчууд түүнийг холимог тулааны индэр дээрээс харах л үлдэж байна...