ТӨМӨР ӨРГӨХ НЬ ТӨРД ОРОХ ШАЛГУУР БОЛОВ УУ

Ц. АМУНДРА:
Эрэн сурвалжлах

2024-06-21, 918

Хурга ишиг тэвэрч үнсэх, ханьдаа хоол хийж өгөх зэрэг эгэл, энгийн харагдах заль “моод”-ноос гарч, хуучирчээ. Оронд нь булчин шөрмөсөө гайхуулсан, бөмбөг тоглосон, бөх барилдсан, буудлага, байт харвааны талбайд өнжсөн зураг, бичлэгээ л нийтэлдэг болж, нэр дэвшигчид. Ямар нэг спортоор хичээллэдэг л бол саарал ордонд заларч ямба эдэлж болно гэж ойлгосон нэр дэвшигчид олон байна. Ялангуяа төмөр өргөх нь төрд орох шалгуур аятай болчихжээ. Хан-Уулын Т.Мөнхсайхан, Ховдын О.Батнайрамдал нарын “шинэков”-уудаас эхлээд Увсын Б.Чойжилсүрэн хүртэлх “хөгшид” хүртэл өөрсдийгөө “бакь” хэмээн рекламдах ажээ.

Спортыг сонгуулийн сурталчилгаандаа ашиглагсдыг “жийм”-чид тэргүүлж байна.

Хан-Уулд МАН-аас нэр дэвшигч, Эрүүл мэндийн сайд асан Т.Мөнхсайхан фитнессийн зааланд өнждөг бололтой юм. Өглөө үүрээр шахуу фитнесдээ явж, төмрөө өргөчихөөд, толинд өөрийгөө харж хэсэг зогсож байгаад, тэндээ шууд сурталчилгааныхаа уулзалтад явдаг юм байна. Гурав хоногийн өмнө сошиалд нийтэлсэн фитнессийн бэлтгэлийнх нь видеог бүтэн үзлээ, мань эр гарын гурван толгойт булчингаа тун ч чамарлангуй байдаг ажээ. Хэрвээ сонгогдчихвол эрүүл мэндийн салбарыг, энэ улсыг яаж хөгжүүлэх гээд байгаадаа фокуслахгүй, фитнессийн бэлтгэлээ л харуулаад, булчингаа чангалж, цээжээ төвхийлгөөд байх аж.

Дараагийн фитнессчин нь Баянзүрхэд АН-аас нэр дэвшигч Ц.Жадамбаа. Өдөр алгасангүй фитнессдэх юм. Тэгээд төмөр өргөж буй, толины өмнө булчингаа чангалан пооз барьж буй зураг, бичлэгээ сүртэй ая, сүржин тайлбартайгаар сошиалд нийтлэх юм. Өчигдөр хөл хийсэн л гэнэ, өнөөдөр цээж хийж байна л гэнэ. Тэгснээ араас нь дөрвөн таваг цуйван нэг суултаар идчих юм. Турах гэж лав фитнессддэггүй бололтой.

Фитнессчин нэр дэвшигчдийг Эрчим хүчний сайд Б.Чойжилсүрэн удаалав. Тэр 30 кг-ын гантель өргөж, шууныхаа шөрмөсийг гайхуулсан зургаа сошиалд нийтэлжээ. Насаараа шахуу “сампин”-тэй нөхөрлөсөн, Сангийн сайдаар ч сууж үзсэн “тооны хүн” гэх пи-артай явж ирсэн Б.Чойжилсүрэнгийн хувьд өөрийгөө эвдсэн, тун шинэлэг сурталчилгаа байв. Гэхдээ Б.Чойжилсүрэн урьд нь төмөр өргөж буй зургаа сошиалд нийтэлж, сонгуулийнхаа сурталчилгаанд ашиглаж байгаагүй л болохоос улстөрчдийнхөө дунд зартай гэнэ. Тухайлбал, тэртээ 2014 онд улстөрчдийн дунд хүндийг өргөлтийн тэмцээн зохиогдож, тус тэмцээнд Ч.Сайханбилэг, Х.Баттулга, Б.Чойжилсүрэн гурав хочуучилж байжээ. Тэр үед Ч.Сайханбилэг 175 кг, Х.Баттулга 160 кг, Б.Чойжилсүрэн 100 кг-ыг тус тус өргөснөөр тэргүүлж байсан аж. Хэдий 10 жил өнгөрч, Б.Чойжилсүрэн хөгширсөн ч 30 кг-ын гантелийг ганц гараараа хөнгөхөн өргөхтэйгөө байгаа ажээ.

Удаах фитнессчинээр Сүхбаатар, Чингэлтэйд нэр дэвшигч, Уул уурхайн дэд сайд асан О.Батнайрамдал тодров. Тэрбээр фитнессээр хичээллэх, ууланд алхах хоёр хоббитой гэж танилцуулгадаа бичжээ. Тэгээд түүнийгээ батлах гэж ядахдаа хөлсөө урсган төмөр өргөж буй бичлэгээ ч сошиалд нийтлэв. Хоржоонтой нь, нэр дэвшигч О.Батнайрамдал фитнессээр хичээллэхдээ ч өнөөх “Харвард” гэсэн бичиглэлтэй фудволкоо өмсдөг ажээ.

Араас нь хөлбөмбөгчин ба сагсанбөмбөгчин нэр дэвшигчид орж ирж байна.

Баруун бүсэд нэр дэвшигч Эдийн засгийн хөгжлийн сайд Ч.Хүрэлбаатар, Эрүүл мэндийн дэд сайд С.Энхболд хоёр хүүхэд насаа дурсаж байна гэж хөдөө голын эрэг дээр хөлбөмбөг өшиглөв. Ядахад торгон дээл өмсчихсөн, хормойгоо хагас шууж байгаад хөлбөмбөгдсөн нь төрийн сайдуудын хувьд тун ч саваагүй сурталчилгаа харагдсан.

Сонгинохайрханд МАН-аас нэр дэвшигч П.Сайнзориг хөлбөмбөгийн улаан хорхойтон гэдгээ зарлав. Тэр өдөр нь сонгуулийн сурталчилгаагаа хийж, шөнө нь хөлбөмбөгийн Европын аварга шалгаруулах “Евро-2024” тэмцээний багуудын тамирчдын танилцуулга, аль нь хожим прогнозыг гаргах ажилтай, түмэн завгүй суугаа гэнэ.

Сүхбаатар, Чингэлтэйд МАН-аас нэр дэвшигч Г.Дашням хөлбөмбөгийн “Улаанбаатар сити” багийн эзэн. Тиймдээ ч хөлбөмбөгийн бөмбөг барьж гарч ирээд “Улс төр, хөлбөмбөг хоёр адилхан багийн спорт. Би аль аль багаа сонгосон” гэхчилэн Яриагаар нь бол улс төрд ёслохгүй нь бололтой. Өдөр нь сурталчилгаагаа явуулж, шөнө нь Европын аваргын тоглолтуудыг үзээд тун ч завгүй байгаа гэнэ.

Ер нь хөлбөмбөгийн Европын аварга шалгаруулах “Евро-2024” тэмцээний эхэлсэн нь манай нэр дэвшигчдэд завшаан болж байх шиг. Сүхбаатар, Чингэлтэйд АН-аас нэр дэвшигч Ц.Баатархүү хөлбөмбөгийн Германы багийн үнэнч фанат гэдгээ зарлаж, хөлбөмбөгт дуртай, тэр тусмаа Германы багийг дэмждэг бол өөрийг нь ч гэсэн дэмжихийг битүүхэн уриалав. Мөн Ц.Баатархүү “Хүүхэд бүрд бөмбөг” хөтөлбөрийг жил бүр хэрэгжүүлж, хувиасаа хөлбөмбөгийн бөмбөг тараадаг гэнэ.

Сонгинохайрханд МАН-аас нэр дэвшигч Н.Хүрэлбаатар сурталчилгаагаа эхэлснээс хойш өдөр бүр шахуу сонгогчидтойгоо сагс тоглож байна. АШУҮИС-ийн захирал гэдгээ харуулсан “АШУҮИС” гэх бичиглэлтэй, МАН-ынх гэдгээ илэрхийлсэн улаан өмсгөлтэй, улаан пүүзтэй л залуучуудтай сагс тоглоод, үзэж тарж байна. Эрүүл мэндийн сайд байхдаа авлигын хэрэгт нэр холбогдож,“Сейф” гэх хусавч арилахгүй хочтой болж байлаа. Харин одоо “Сагсчин” хочтой болох нь бололтой, Сонгинохайрханд.

Баруун бүсэд МАН-аас нэр дэвшигч, УИХ-ын гишүүн Ц.Цэрэнпунцаг зодог, шуудагтаа сонгуулиар л салхи оруулдаг “дом”-той болсон. Энэ удаад ч зодог, шуудгаа дэлгэсэн зургаа сошиалд нийтэлж, бөхөд хайртай сонгогчдоосоо санал “царайчиллаа”. Нэмээд, Ц.Цэрэнпунцаг сурталчилгааны нэг өдрийг сагсанбөмбөгийн талбайд өнгөрүүлж, энэ спортод багаасаа хайртай байсан гэж санаашрав. Гэхдээ сагсанбөмбөгийн талбайд өнжсөн нэвтрүүлгээ үеэр бөмбөг тэврээд зогсоод байснаас шидэж лав харагдсангүй.

Баруун бүсэд АН-аас нэр дэвшигч, УИХ-ын гишүүн Б.Пүрэвдорж сагсанбөмбөгийн спортод шимтэн дурлаад удаж байгаа гэнэ. Ямар сайндаа л баруун бүсийн аймгуудаар сурталчилгаагаа хийн тойрох замдаа Ховдод саатаж, “Ховдын шонхорууд” багийнхантай бэлтгэл хийж, ур чадвараа гайхуулсан.

Баруун бүсэд МАН-аас нэр дэвшигч, Зам тээврийн хөгжлийн сайд С.Бямбацогт воллейболын спортод ухаангүй дуртай, бас уулын спортод хайртайгаа зарлав. Ховдынхоо воллейболын аварга болсон зургаа нийтэлж, басхүү энэ зун монголынхоо 4000 метрээс дээш өндөртэй аль нэг уулын оргилд заавал авирна гэж сонгогчдодоо сошиалаар ам гарсан.

Араас нь ганцаарсан спортын “хобби”-тнууд гарч ирцгээлээ.

Ар, Өвөрхангай ба Баянхонгорт АН-аас нэр дэвшигч П.Мөнхтулга Тод манлай уяач Ө.Пүрэвбаатарын хүү. Өөрөө ч аавынхаа адуунаас сонгон сойж ирсэн. Тиймдээ ч П.Мөнхтулга өнгөрсөн зуны наадмын түрүү үрээний эзэн, Дундговийн Э.Улаанхүүг улс төрдөө хутгаж, хаа байсан Өвөрхангайд аваачиж, өөрийнхөө 20 минутын хөрөг нэвтрүүлэгт зочноор оролцуулсан. Монголыг яаж хөгжүүлэх гээд байгаагаа биш морь ярьсаар л дуусна лээ.

Хөвсгөл, Булган, Орхоны тойрогт АН-аас нэр дэвшигч Д.Өсөхбаяр өмнөх 2020 оны сонгуулийн сурталчилгааныхаа үеэр Х.Баттулгатай хамт төмөр өргөж фитнессдээд, өөрийгөө бөх, бакь гэж рекламдаад унасан. Харин энэ удаад оюунлаг спорт сонгож, хүүтэйгээ шатар тоглож, түүгээрээ хөрөг нэвтрүүлэг хийж цацсан. Хоржоонтой нь, хэн нь хожсон нь доторхойгүйгээр хөрөг нэвтрүүлгээ дуусгана лээ.

Төвийн бүсэд МАН-аас нэр дэвшигч Ж.Энхбаяр хэзээнээс л “цэрэг, дайн”-ы имижтэй. Тэртээ 2012 онд нэг жил Батлан хамгаалахын сайд байсан имижээ өдий хүртэл 12 жил хадгалж яваа. Тиймдээ ч Ж.Энхбаяр сонгуулийн сурталчилгааныхаа нэг өдрийг буудлагын талбайд өнгөрүүлж, түүгээ тун ч сүртэй ая дантай нэвтрүүлэг болгож цацсан. Гэхдээ “хүн бүр зэвсэг эзэмшиж сурах тухай, улс орон гадаадын халдан довлогчдын дайралтад бэлэн байх ёстой” гэх маягийн агуулга илэрхийлсэн тийм ч таатай байгаагүйг дурдах нь зүйтэй.

Төвийн бүсэд АН-аас нэр дэвшигч С.Эрдэнэболд спортлог сурталчилгаа бусдаасаа сондгой байв. Өөрөөр бол, С.Эрдэнэболд сурталчилгааныхаа нэг өдрийг сур харвахад зориулж, сонгогчдод цэц мэргэнээ сонирхуулав. Гэхдээ харваж буйгаа их л сүртэй, удаашралтай харуулчихаад, харвасан сум нь байндаа туссан эсэхийг харуулаагүй. Оноогүй ч оносон мэт харагдаж хуурах хүсэл байгаагүй бололтой юм.

Эцэст нь, Сүхбаатар, Чингэлтэйд МАН-аас нэр дэвшигч УИХ-ын гишүүн Д.Цогтбаатар жүдогийн секцэд 40 жил явж байгаа тухайгаа сайрхаж, сонгуулийн сурталчилгаа эхэлснээс хойш жүдогийн цагаан өмсгөлтэй үе үе үзэгдэв. Жүдогийн хар бүстэй, халз тулсан үед хэнийг ч хавираад унагах ур чадвартай л гэнэ, секцийн найзууд нь түүнийг чухам л сайлж, сайшааж байна. Энэ сонгуульд Х.Баттулга, Н.Алтаншагай, Б.Ариун-Эрдэнэ, Д.Өсөхбаяраас эхлээд бөхчүүд олон дэвшиж буй ч Д.Цогтбаатар шиг өмсгөлтэй сурталчилгаа арай ч хийгээгүй байна.