ЗАМЫН ТЕНДЕР-II: САНГИЙН САЙД Б.ЖАВХЛАН, УИХ-ЫН ГИШҮҮН Н.ГАНИБАЛ НАРЫН ХОЛБООТОЙ “МОНГОЛЗАМ ГРУПП” ХХК 66.7 ТЭРБУМ ТӨГРӨГИЙН ТЕНДЕРТ ШАЛГАРЧЭЭ

Ц. АМУНДРА:
Эрэн сурвалжлах

2022-05-10, 2431

Эргэлт.мн мэдээллийн сайтын “Эрэн сурвалжлах нэгдэл”-ээс “ЗАМЫН ТЕНДЕР” цуврал эхлүүлсэн. Эхний дугаартаа бид УИХ-ын хамгийн ахмад гишүүн Х.Баделхан төрсөн хүүтэйгээ хамтран эзэмшдэг “Жол” ХХК-аараа Баян-Өлгий аймгийн авто замын аль санхүүжилт өндөртэй тендер болгонд шалгарч, төсвийн мөнгөөр “туйлж”, хөлжиж, хөрөнгөжиж, халаасаа түнтийлгэж байгааг илчилсэн. Өмнөх нийтлэлийг ЭНД дарж уншина уу.

Тэгвэл энэ удаад Зам, тээврийн хөгжлийн яамнаас энэ хавар зарласан хамгийн өндөр санхүүжилттэй тендер болох Хэнтий аймгийн Норовлин сумаас Дорнод аймгийн Баян-Уул сум хүртэлх 71 км хатуу хучилттай авто замын 66.7 тэрбум төгрөгийн тендерт шалгараад буй “Монголзам групп” ХХК-ийг танилцуулж байна. Сонирхолтой нь, 66.7 тэрбум төгрөгийн тендер аваад буй “Монголзам групп” ХХК-ийн эзэд нь Сангийн сайд Б.Жавхлан болон УИХ-ын гишүүн Н.Ганибал нар дээр хөтөлж очих ажээ.

“МОНГОЛЗАМ ГРУПП” ХХК СҮҮЛИЙН ДӨРВӨН САРЫН ДОТОР 77.9 ТЭРБУМ ТӨГРӨГИЙН ТАВАН ТЕНДЕРТ ШАЛГАРСНЫ ДОТОР ЭНЭ ХАВРЫН ХАМГИЙН ӨНДӨР САНХҮҮЖИЛТТЭЙ ТЕНДЕР БУЮУ НОРОВЛИН-БАЯН-УУЛ СУМЫГ ХОЛБОХ 66.7 ТЭРБУМ ТӨГРӨГИЙН ТЕНДЕР БАГТАЖ БАЙНА

“Монголзам групп” ХХК-ийг Б.Цогтсэргэлэн, Г.Эрдэнэцогт, Ү.Баянмөнх нар эзэмшдэг. Тэд Сүхбаатар аймагт төрж өссөн, ураг төрлийн холбоотой хүмүүс. Тиймдээ ч өдгөө Сүхбаатар аймгийн авто замын аль санхүүжилттэй өндөртэй тендерт болгонд шалгардаг ажээ. Тухайлбал, 2022 он гарсаар 77.9 тэрбум төгрөгийн таван тендерт шалгараад байна.

Тухайлбал,

Нэгдүгээр сарын 18-нд Сүхбаатар аймгийн Баруун-Урт сум дахь Зэвсэгт хүчний 338 дугаар анги хүртэлх хатуу хучилттай авто замын 347 сая төгрөгийн тендер,
Нэгдүгээр сарын 28-нд Хэнтий аймгийн Норовлин сумаас Дорнод аймгийн Баян-Уул сум хүртэл 71 км хатуу хучилттай авто зам тавих 66.7 тэрбум төгрөгийн тендер,
Хоёрдугаар сарын 15-нд дээрх замын нэмэлт буюу 404 сая төгрөгийн тендер,
Хоёрдугаар сарын 23-нд Сүхбаатар аймгийн Баруун-Урт суманд Соёл амралтын хүрээлэн байгуулах 9.3 тэрбум төгрөгийн тендер,
Гуравдугаар сарын 24-нд Сүхбаатар аймгийн Баруун-урт сумын төвийн хатуу хучилттай автозамын 1.2 тэрбум төгрөгийн тендерт тус тус шалгараад байна.

“Монголзам групп” ХХК-ийн шалгарсан дээрх тендерүүдээс 66.7 тэрбум төгрөгийн санхүүжилттэй Хэнтий аймгийн Норовлин сумаас Дорнод аймгийн Баян-Уул сум хүртэлх 71 км хатуу хучилттай авто замын тендерт нь Зам, тээврийн хөгжлийн яамнаас зарласан хамгийн өндөр санхүүжилттэй тендер юм.

Түүнчлэн, “Монголзам групп” ХХК нь өнгөрөгч 2021 онд 6.7 тэрбум төгрөгийн хоёр тендерт шалгарчээ.

Тухайлбал,

Сүхбаатар аймгийн Баруун-урт сумын V тойргийн 5.6 км автозамын ажлын 3.9 тэрбум төгрөгийн тендер,
Сүхбаатар аймгийн Баруун-Урт сумын I баг, цэргийн анги, ахмадын амралт, сувилал орчмын хэсэгчилсэн 3.03 км автозамын 2.8 тэрбум төгрөгийн тендер зэрэгт ялалт байгуулжээ.

Тэгвэл ингэж Сүхбаатар аймгийн авто замын бүх тендерүүдийг “түүдэг", түүгээр зогсохгүй энэ хаврын хамгийн өндөр санхүүжилттэй тендерт шалгарсан “Монголзам групп” ХХК нь Сангийн сайд Б.Жавхлан, УИХ-ын гишүүн Н.Ганибал нартай тун ойр холбоотой ажээ.

“МОНГОЛЗАМ ГРУПП” ХХК-ИЙН ЭЗЭН Г.ЭРДЭНЭЦОГТ НЬ САНГИЙН САЙД Б.ЖАВХЛАНТАЙ НЭГ СУРГУУЛЬ ТӨГССӨН, НЭГ ТӨРИЙН БУС БАЙГУУЛЛАГА ХАМТРАН ЭЗЭМШИЖ БАЙСАН БОЛ УИХ-ЫН ГИШҮҮН Н.ГАНИЛБАЛТАЙ НЭГ КОМПАНИ ХАМТРАН ЭЗЭМШДЭГ

Дээр дурдсанчлан, “Монголзам групп” ХХК-ийг Батмөнхийн Цогтсэргэлэн, Гөлгөөгийн Эрдэнэцогт, Үржингийн Баянмөнх нар эзэмшдэг. Тэднээс Гөлгөөгийн Эрдэнэцогт нь Сангийн сайд Б.Жавхлан, УИХ-ын гишүүн Н.Ганибал нартай ойр нэгэн бол хүргэн ах Батмөнхийн Цогтсэргэлэн нь Ерөнхийлөгч асан Х.Баттулгатай тун ойр нэгэн.

“Монгол зам групп” ХХК-ийн эзэн Гөлгөөгийн Эрдэнэцогт ба Сангийн сайд Б.Жавхлан нарын холбоо хамаарал

1. Гөлгөөгийн Эрдэнэцогт болон Сангийн сайд Б.Жавхлан нарын “нөхөрлөл” 2018 онд ЖДҮ-гийн хэргээр олон ил болж байлаа. Тодруудбал, тухайн үед Сангийн сайд Б.Жавхлан “Пример инвестмент групп”-д 900 сая, “Жетте майнинг” ХХК-д мах махан бүтээгдэхүүний үйлдвэрлэлийн төслөөр 800 сая төгрөг өгүүлсэн хэрэгт нэр холбогдсон. Ингэхдээ Б.Жавхлан ЖДҮХС-ийн захирал С.Төгсбилэг рүү тусгайлан утасдаж, “Жетте майнинг” ХХК-д зээл олгох “тушаал” өгсөн гэдэг нь баримтаар нотлогдсон гэгдэж байв. Түүгээр зогсохгүй, “Жетте майнинг” ХХК-ийн захирал Гөлгөөгийн Эрдэнэцогт нь Сангийн сайд Б.Жавхлангийн багийн найз, мөн туслахаар нь ажиллаж байсан гэгдэж байлаа. Гэвч Б.Жавхлан Г.Эрдэнэцогт болон “Жетте майнинг” ХХК-тай холбоогүй хэмээн гүрийж, хэргээс цэвэрхэн мултарсан байдаг. Тэгвэл ЖДҮ-гийн хэрэгт холбогдоод мартагдсан “Жетте майнинг” ХХК-ийн эзэн Гөлгөөгийн Эрдэнэцогт өдгөө “Монгол зам групп” ХХК-ийн эзэн Гөлгөөгийн Эрдэнэцогт болон гарч иржээ.

2. Сангийн сайд Б.Жавхлан Дархан-Уул аймагт төрсөн ч Сүхбаатар аймагт өсөж, тэндээ ахлах сургуулиа дүүргэсэн. Тиймдээ ч “Монголзам групп” ХХК-ийн эзэн Г.Эрдэнэцогт, Сангийн сайд Б.Жавхлан нар 2015 оноос хойш “Сүхбаатар аймгийн нэгдүгээр арван жилийн сургуулийн төгсөгчдийн холбоо”-г хамтран удирдаж ирсэн. Өөрөөр хэлбэл, тэд нэг сургуулийн найзууд гэсэн үг. Гэхдээ тус холбооны тэргүүн, Удирдах зөвлөлийн даргаар өдий хүртэл ажиллаж ирсэн Сангийн сайд Б.Жавхлан хэдхэн хоногийн өмнө буюу өнгөрөгч дөрөвдүгээр сарын 28-нд Төмөрхуягийн Баярхүүд холбоогоо шилжүүлсэн байна.

3. “Монгол зам групп” ХХК-ийн эзэн Г.Эрдэнэцогтын аав Халтарын Гөлгөө нь Сүхбаатар аймгийн Мөнххаан сумын уугуул бөгөөд Сүхбаатар аймгийнхаа ардын хурлын гүйцэтгэх захиргааны I орлогч даргаар 10 гаруй жил, аймгийнхаа намын хорооны намын байгуулалтын хэлтсийн орлогч эрхлэгчээр олон жил ажилласан хүн. Тэгвэл Сангийн сайд Б.Жавхлангийн аав нь ч мөн Сүхбаатар аймгийн Мөнххаан сумын уугуул буюу тэд нэг нутгийн хүмүүс ажээ. Түүгээр зогсохгүй, Сангийн сайд Б.Жавхлангийн аав Л.Болд Сүхбаатар аймгийн Ардын хурлын гүйцэтгэх захиргааны даргаар ажиллаж байсан бол “Монгол зам групп” ХХК-ийн захирал Г.Эрдэнэцогтын аав Х.Гөлгөө нь мөн адил Сүхбаатар аймгийн ардын хурлын гүйцэтгэх захиргааны I орлогч даргаар ажиллаж байжээ.

Товчхондоо, “Монгол зам групп” ХХК-ийн эзэн Г.Эрдэнэцогт, Сангийн сайд Б.Жавхлан нар нэг сургууль төгссөн найзууд, ЖДҮ-гийн хэрэгт хамт холбогдсон, нэр төрийн бус хамтран эзэмшиж ирсэн, тэдний аавууд нэг газар дарга, орлогчоор хамт ажилладаг байсан гээд тун олон сэжмээр холбогддог ажээ.

“Монгол зам групп” ХХК-ийн эзэн Гөлгөөгийн Эрдэнэцогт болон УИХ-ын гишүүн Н.Ганибал нарын холбоо хамаарал

УИХ-ын гишүүн Н.Ганибал, Сангийн сайд Б.Жавхлан нар өдгөө хоёр өөр нам боловч Сүхбаатар аймгийн ахлах сургуульд сурцгаадаг байхдаа дотно найзалдаг, нэг багт хамт сагс тоглож, хэд хэдэн тэмцээн уралдаанд оролцож байсан тухай нутгийнхан нь 2020 оны сонгуулийн үеэр бахархалтайгаар дурсаж байв. Тэгвэл тэдний тухайн үеийн нөхдийнх нь нэг “Монгол зам групп” ХХК-ийн эзэн Г.Эрдэнэцогт ажээ.

Тухайлбал, “Монгол зам групп” ХХК-ийн эзэн Г.Эрдэнэцогт болон УИХ-ын гишүүн Н.Ганибал нар 2006 оноос хойш “МОСМЕП” ХХК-ийг хамтран эзэмшиж иржээ. Энэ компанийг УИХ-ын гишүүн Н.Ганибал ХОМ-тээ дурдсан байдаг.

Түүнчлэн, “Монголзам групп” ХХК 2021 оны арваннэгдүгээр сарын 19-нд Сүхбаатар аймгийн Баруун-Урт хотын тавдугаар тойргийн автозамыг барьж, ашиглалтад хүлээлгэн өгч байхад нээлтэд УИХ-ын гишүүн Н.Ганибал оролцож байлаа. Тухайн үед УИХ-ын гишүүн Н.Ганибал “Бүхэл бүтэн Засгийн газар Дарханы замыг барьж чадахгүй байна. Харин бид төсвийн мөнгөөр ямар зам барьж чаддагийг харууллаа” хэмээж байжээ.

ҮРГЭЛЖЛЭЛ БИЙ...

ЗАМЫН ТЕНДЕР-II: САНГИЙН САЙД Б.ЖАВХЛАН, УИХ-ЫН ГИШҮҮН Н.ГАНИБАЛ НАРЫН ХОЛБООТОЙ “МОНГОЛЗАМ ГРУПП” ХХК 66.7 ТЭРБУМ ТӨГРӨГИЙН ТЕНДЕРТ ШАЛГАРЧЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4

Сэтгэгдэл үлдээсэн: 2023-01-09 16:04:49

Сугар: Ү.Батмөнх гэж замын Будын туслах залуу мөн үү, олон жил туслах энэ тэр гээд арыг нь дааж явдаг залуу даа.
Сэтгэгдэл үлдээсэн: 2022-05-11 09:53:08

Галбадрах: Энэ зам эдр чинь Халтар сайдтайгаа холбоотой байдаггүй юм уу ?.Ийм балай юмаар холбоотой болдог юм бол.Тэр Халтар сайд Яаж яваад Дарханы замыг нийтэд нь шахуу хуулах ажлыг гүйцэтгэх байгууллагат нөлөөлсөн гэх яриаг шалгаж үзэх хэрэгтэй.
Сэтгэгдэл үлдээсэн: 2022-05-10 21:12:43

Сүх: Өлөн бөөснүүд ингэж л төрөөс хулгай шааж өчүүхэн амьдралаа дээшлүүлэх гэж ядах юм даа. Архичин гамибалын гуйлгачин амьдралаа дээшлүүлэх сүүлчийн боломж нь энэ байлаа
Сэтгэгдэл үлдээсэн: 2022-05-10 21:10:02

Өө: Шалгаад үнэн бол шоронд нь илгээж дээ

Шинэ мэдээ

Нийтлэлчид