Батлан хамгаалахын сайд С.Бямбацогт тэргүүтэй таван хүний төрсөн өдрийг тэмдэглэж, мөнгөн аяга бэлэглэсэн гэх мэдээлэл цахим сүлжээнд цацагдаад байна. Тодруулбал, Батлан хамгаалах яамны Төрийн нарийн бичгийн дарга Д.Ганхуягийн тушаалаар сайд С.Бямбацогт, Төрийн захиргаа удирдлагын газрын дарга Ц.Одхүү, Бодлого хэрэгжилтийг зохицуулах газрын дарга М.Мөнхбаяр, Хяналт-шинжилгээ, үнэлгээ, дотоод аудитын газрын дарга Б.Энхбаяр, Хяналт шалгалтын хэлтсийн санхүүгийн хяналт шалгалтын шинжээч, улсын ахлах байцаагч Ж.Амаржаргал нарын 50 насны ойд хүндэтгэл үзүүлж, долоон сая төгрөгийн төсөв гаргажээ.

Энэ талаар Батлан хамгаалах яамны Төрийн нарийн бичгийн дарга Д.Ганхуягаас тодрууллаа.

       Тэрбээр “Манай дотоод журам өөрчлөгдөж, тэгш ой нь тохиож байгаа хүмүүст хүндэтгэл үзүүлдэг болсон. Энэ журмын дагуу дээрх таван хүний 50 насны ой тохиож байгаа учраас хүндэтгэл үзүүлж, мөнгөн аяга дурсгахаар болсон. Гэхдээ нэгдсэн арга хэмжээ болоогүй учраас хүмүүст хараахан гардуулж өгөөгүй байгаа. Гэтэл цахим сүлжээнд энэ тухай мэдээлэл цацагджээ. Иймд бид журмаа өөрчлөх шаардлагатай гэж ярилцаж байна. Мөн дээрх таван хүнтэй холбогдож, “Та бүхний тэгш ойд зориулж, яамны зүгээс мөнгөн аяга бэлэглэхээр зэхсэн байсан. Нэгдсэн арга хэмжээ болоогүй учраас гардуулж өгөөгүй. Одоо яах вэ” гэлээ. Гэтэл хүмүүс маань “Бид нэрээ бичүүлсэн мөнгөн аягаа өөрсдөө авъя. Мөнгийг нь холбогдох газрынх нь данс руу шилжүүлье” гэж хэлсэн. Нэг хүний 1.4 сая төгрөг болж байгаа. Энэ мөнгийг яамны данс руу эхнээсээ шилжүүлж байгаа байх. Бүх хүнийг шилжүүлээд дууссаны дараа албан ёсоор мэдээлэл өгнө” гэлээ.