Өнгөрсөн амралтын өдрүүд хүнд өнгөрлөө, монголчуудын хувьд. Байгалийн давагдашгүй хүчин зүйл, цаг агаарын хүнд нөхцөл байдал, цасан шуурганы улмаас хэд хэдэн хүн төөрч, нэг хүн амиа алдаж, зам тээврийн ноцтой ослууд гарлаа. Холбогдох албаныхан хэрэндээ сэрэмжлүүлж, байгалийн онц аюултай үзэгдлээс урьдчилан сэргийлэхийг анхааруулсан ч хохирол их амслаа.  

Шинийн найман буюу хоёрдугаар сарын 17-нд Онцгой байдлын байгууллагад Ховд аймгийн Алтай, Үенч, Булган, Мөст Сүхбаатар аймгийн Эрдэнэцагаан, Түмэнцогт, Сүхбаатар, Дундговь аймгийн Дэлгэрцогт,  Өлзийт, Цагаандэлгэр, Сайнцагаан, Адаацаг, Баян-Өлгий аймгийн Булган, Хэнтий аймгийн Бор-Өндөр, Дорнод аймгийн Чойбалсан,  Өмнөговь аймгийн Ханхонгор, Говьсүмбэр аймгийн Сүмбэр, Төв аймгийн Сэргэлэн зэрэг есөн аймгийн 18 суманд  42 иргэн цасан шуурганд төөрсөн, сураггүй болсон дуудлага бүртгэгджээ. Дуудлагын дагуу төв, орон нутгийн Онцгой байдлын байгууллагын алба хаагчид үүрэг гүйцэтгэн, иргэдийг эсэн мэнд олж, аврах ажиллагаа тасралтгүй явуулсан юм. Харамсалтай нь, Ховд аймагт малдаа явсан эмэгтэй осгож нас бараад байна.

Мөн нийслэлийн Багахангай, Багануур, Налайх дүүрэг, Өвөрхангай аймгийн Зүүнбаян-Улаан, Завхан аймгийн Отгон, Архангай аймгийн Ихтамир, Хангай, Булган аймгийн Бүрэгхангай, Говь-Алтай аймгийн Цогт, Есөнбулаг, Дундговь аймгийн Сайнцагаан, Төв аймгийн Баяндэлгэр, Эрдэнэ, Лүн, Мөнгөнморьт, Батсүмбэр, Хэнтий аймгийн Цэнхэрмандал, Сүхбаатар аймгийн Халзан, Говьсүмбэр аймгийн Сүмбэр, Баян-Өлгий аймгийн Цэнгэл, Өмнөговь аймгийн Ханхонгор, Дундговь аймгийн Дэрэн, Сайнцагаан, Гурванзагал, Дорнод аймгийн Хэрлэн суманд нийт 27 удаагийн автомашинтайгаа цасанд суусан дуудлагаар ажиллаж, 230 иргэний аюулгүй байдлыг хангаж, 81 тээврийн хэрэгслийг татан гаргасан байдаг.

Харин шинийн 8-ны билэгт сайн өдөр онцгойгийн аврагчид болон бусад холбогдох албаныхан 300 орчим хүний амийг аварч, цасан шуурганаар тасралтгүй ажиллаж, малчид малаа хайсаар хүнд өдрийг үдэж байхад 1500 орчим эрэгтэй Хэнтий аймгийн Өмнөдэлгэр сумын нутагт байрлах Бурхан Халдун ууланд гарч, хийморио сэргээсэн нь олны шүүмжлэлд өртөөд байна.

Бурхан Халдун ууланд 300-400 автомашин, 1500 орчим хүн байгааг Үндэсний хөгжлийн газрын дэд дарга Б.Дөлгөөн жиргэсэн нь шүүмжлэлд өртөөд байна. Тэрбээр цахим хуудастаа “Бурхан Халдун ууланд өглөөний 06:00 цагт “Нарантуул” зах шиг  байлаа” хэмээн зураг, бичлэг оруулсан байсан юм.

Тэгвэл иргэд “Засгийн газраас ч, УОК-оос ч, Онцгой байдлын газраас ч тасралтгүй сэрэмжлүүлэг хүргэж, байгалийн онц аюултай үзэгдэл болно, онцын шаардлагагүй тохиолдол холын замд гарахгүй байхыг анхааруулж байхад бодлого хэрэгжүүлэгч агентлагийн удирдлага нь Бурхан Халдунд оччихоод иргэдийг даапаалаад сууж байх ч гэж дээ” хэмээн бухимдаж байсан юм.

Мөн цасан шуурганаар улсын арслан М.Бадарч тэргүүтэй бөхчүүд ч Бурхан Халдун ууланд гарч, хийморио сэргээжээ.

Б.ХАШМАРГАД: ШИНИЙН 8-НД БУРХАН ХАЛДУН УУЛАНД 1500-ГААС Ч ОЛОН ХҮН ГАРСАН

          Бид Бурхан Халдун ууланд шинийн 8-нд хэчнээн хүн зорчсон талаар Хан Хэнтийн Улсын тусгай хамгаалалттай газрын Хамгаалалтын захиргааны дарга Б.Хашмаргадаас тодрууллаа.

Тэрбээр “Одоогийн байдлаар нэгдсэн тоо мэдээлэл гараагүй байна. Шинийн 15 гэхэд Бурхан Халдун ууланд зорчсон иргэдийн тоо мэдээлэл нэгдсэн байдлаар гарна. Шинийн 4-нөөс хойш хүмүүс зорчиж, ууланд гарч байгаа. Шинийн 8-нд 1500 хүн хайрханд гарсан гэдэг нь үнэн. Үүнээс ч олон хүн гарсан байж болзошгүй. Манай хамгаалалтын захиргааны ажилтнууд одоо ч ууландаа ажиллаж, иргэдэд шаардлагатай мэдээлэл, зөвлөмж өгсөөр байна” гэлээ.