Хүйтний эрч чангарч, хүмүүсийн хөл хөдөлгөөн, нэмэгдэх тусам амьсгалын замын халдварт өвчин тархах нөхцөл бүрддэг. Амьсгалын замын цочмог халдварт өвчин нь халуурах, толгой өвдөх, ханиалгах, хамраас нус гоожих, үе мөч болон булчингаар өвдөх буюу ерөнхий хордлогын шинж тэмдгээр илэрснээр өвчлөл, хүндрэл үүсгэдэг. Иймд уг өвчнөөс хэрхэн сэргийлэх талаар зөвлөмжийг хүргэж байна.

Хувцсаа халуун усанд угаах

      Заримдаа бид цахилгаанаа хэмнэх гэж угаалгын машинаа бага температур дээр тааруулж, хувцсаа хүйтэн уусанд угаадаг. Харин ханиадны улиралд хувцсаа доод тал нь 40 хэмийн халуун усанд угаахыг мэргэжилтнүүд зөвлөж байна. Чухамхүү ийм температурд олон нийтийн газар ханиад томуу туссан хүмүүсийн дунд байсан хувцсанд наалдсан нян үхдэг гэнэ. 

Амттан бага идэх

     Намрын сэрүүнд хоолойгоо өвтгөж, хамрын ханиад тусахгүйн тулд сэтгэл санаагаа бялуу, чихэр идэж өргөх биш харин амин дэмээр баялаг алим, усан үзэм, цитрусын төрлийн жимснүүд идэхийг зөвлөж байна.

Д аминдэмээ нөхөх

         Колорадогийн их сургуулийн судлаачид биемахбодод Д амин дэм хангалттай түвшинд байхгүй бол дархлааны системийг дэмждэг бодисын боловсруулалт буурдаг болохыг тогтоожээ. Д аминдэм дутагдаж байгаа нь үе мөч өвдөх, их ядрах зэрэг шинж тэмдгээр илэрдэг юм байна. Энэ аминдэмийг элэг, загас, өндөг, сүүн бүтээгдэхүүнээс авах боломжтой. 

Гарын ариун цэвэр сахих

       Гараа цэвэр байлгах нь ханиад хүрэхгүй байхад чухал нөлөөтэй гэдгийг хүмүүс тэр бүр анзаардаггүй. Гарын ариун цэвэр өвчин үүсгэгч нянг үржүүлэх явцыг бууруулдаг.  Тиймээс хаалганы бариул, компьютерийн гар болон  хүмүүстэй гар барилцсаныхаа дараа гараа тогтмол угааж заншаарай. 

Зөв хооллох

   Шим тэжээл ихтэй хоол, хүнс хэрэглэх нь дархлаа сайжруулж, элдэв өвчний нянг тэсвэрлэх чадвартай болгодог.  Ханиад томуу тусахгүйн тулд амин дэмээр баялаг төрөл бүрийн жимс жимсгэнэ, хүнсний ногоо, үр тариа хэрэглээрэй.  

Ханиаж найтаах үедээ гараараа хаалт хийхгүй байх

    Ханиаж, найтаах нь аливаа өвчний вирусыг түгээх хамгийн дөт зам гэдгийг хүн бүр мэднэ.  Тийм ч учраас ханиаж, найтаахдаа гараараа хаалт хийдэг.  Гэвч энэ нь хамгийн буруу зүйл болохыг иргэд тэр бүр мэддэггүй. Гараараа хаалт хийхийн оронд амны алчуур, сальфетка ашиглах, эсвэл гарынхаа тохойн хэсэг рүү найтаах хэрэгтэй.