Яруу найрагч, зохиолч Л.Өлзийтөгсийн “Сарны толь бичиг” хэмээх ном өнөөдрөөс уншигчдын хүртээл боллоо. Тэрбээр 1995 оноос “Тэргүүн бүлэг”, “Тэнгэрт ургадаг модод”, “Эрх чөлөөтэй байхын урлаг”, “Ганцаардлын дасгал”, “Нүдний шилэнд үлдсэн зургууд”, “Миний гунигийн түүх”, “Төсөөллийн өрөөнд”, “Үзэхийн хязгаар”, “Хотын үлгэрүүд”, “Толинд туссан Будда”, “Хараацай зогсолт” /2 боть/, “Салхины нэр Ө” хэмээх ном хэвлүүлжээ.

    Мөн тэрбээр “Монголын сонгомол яруу найраг”, “Монголын сонгомол өгүүллэг”, “Монголын сонгомол тууж” антологуудыг яруу найрагч Г.Аюурзанын хамтаар эрхлэн гаргасан байдаг. Үүнээс гадна утга зохиол, урлаг, танин мэдэхүйн 150 номын редактораар ажилласан хөдөлмөрч уран бүтээлчдийн нэг билээ.  Мөн 2007 оноос шүлэг, эсээ, өгүүллэгийнхээ номыг солонгос, франц, хятад хэлээр хэвлүүлж байжээ. Түүний зарим шүлэг, зохиол англи, орос, хятад, япон, солонгос, мажаар, серб, румын, польш хэлнээ орчуулагдан нийтлэгджээ. Яруу найрагч Л.Өлзийтөгсийн уран бүтээлүүдийг шимтэн уншиж, оюун санаа, зүрх сэтгэлийнхээ боловсролд үнэтэй хувь нэмэр оруулдаг уншигчид жилээс жилд нэмэгдсээр байна.