Монголын Зохиолчдын эвлэлээс оны шилдэг бүтээл шалгаруулдаг “Алтан өд” шагналын хүүхдийн зохиолын төрөлд Монсудар хэвлэлийн газрын хүүхдийн номын “Жангар” редакцийн “Монгол хүн” цуврал бүтээл шилдгээр шалгарчээ.

     Тодруулбал, тус редакциас эрхлэн гаргасан “Норовбанзад” намтарчилсан танин мэдэхүйн зурагт номд Алтан өд шагнал хүртээж, “Д.Нацагдорж” зурагт ном хоёрт жагсжээ. “Жангар” редакцийн хамт олон Монгол хүн зурагт номын цувралаас өмнө “Монгол үлгэр”, “Эртний уран зохиол” зэрэг төслийн хүрээнд “Монголын нууц товчоо”, “Гэсэр” “Жангар”, “Мянга нэгэн шөнийн үлгэр” зэрэг эртний уран зохиолын цуврал зурагт номыг гаргасан билээ. Эртний уран зохиол болон түүх соёлыг хүүхэд, багачуудын нас, сэтгэхүйд тохирсон байдлаар эрхлэн гаргаж байгаагаараа онцлог юм. 

        "Монгол хүн" цуврал бүтээлийн талаар "Жангар" редакцийн эрхлэгч Б.Чанагнянгар манай сайтад өгсөн ярилцлагадаа "Монгол хүн" төслийн мөн нэг онцлог бол эх оронч байдлыг хүүхдүүдэд илүү мэдрүүлэх болов уу. Учир нь, эх орныхоо төлөө салбар салбартаа өөрийнхөө хийж , бүтээж байгаа байдлыг хамгийн энгийнээр хүүхдүүд ойлгоосой гэсэн санааг гаргахыг зорьсон. Нөгөө талаар ганцхан Д.Сүхбаатар, Д.Нацагдорж биш, тухайн цаг үед өөр өөрсдийн хийж байгаа зүйлээрээ манлайлан, түүчээлж явсан олон эрхмүүд энд багтана гэдгийг бид цувралаараа дамжуулан гаргахыг зорьсон" гэж байсан юм.