• Өнөөдөр 2026-03-23

ЦЭРГИЙН ЗАХИДАЛ: Ээжээ хүү нь таныхаа гарын хоолыг идээгүй таван жил болжээ

2023-03-18,   4499

ЭЭЖДЭЭ БИЧСЭН ЗАХИДАЛ

           Сайн байна уу. Ээждээ танд энэ захиа очих өдрийн мэнд хүргэе. Бие тань сайн биз дээ. Ээж таныгаа зүрх сэтгэлдээ тээж явахдаа тэнгэрт одсон аав маань ч бас харан суугаа гээд хичээж явна аа. Хүү нь эр цэргийн албаа хаасаар л байна. Нээрээ ээжээ таныг эдгэрээд хөл дээрээ босчихсон намайг халагдаад очиход тосож авна гэж зүүдэллээ. Хэдийгээр зүүд байсан ч гэлээ магнай хагартал баярласан. Хүүгээ халагдаад очиход хөл дээрээ босчихсон байгаасай гэж оройн тооллого өгөөд жагсаалт зогсож байхдаа тэнгэрлүү ширтэн од харвах тоолонд шивнэж хүслээ шивнэж, залбирдаг. Таныгаа гомдоож байсан үеүдээ бодохоор хамар шархиран нулимс цийлэгнэх юм. Ээжээ хүү нь танд бараг л хэлж байгаагүй. Тэр л үгсээ одоо ингээд ч  болтугай хэлэхийг хүссэндээ захиа бичиж сууна.

Аз жаргалтайгаар хүүгийнхээ хажууд удаан байна шүү, ээжээ
 
          Ээжээ тэнэг хүүгээ уучлаарай. Хайртай шүү. Ээжээ та санаж байна уу. Би жаахан байхдаа таны төрсөн өдрөөр бас “Мартын 8”-ны өдрөөр захиа бичиж, цаасаар цэцэг урлаж, зураг зурж бэлэг болгон өгдөг байсан. Хүү нь энэ бүгдийг том болохын хэрээр мартчихсан байжээ. Харин одоо тандаа дахин захиа бичихээр шийдэн сууж байгаа минь энэ л дээ. Таныгаа баярлана гэж найдан бичиж байна. Нээрээ ээжээ хүү нь таныхаа гарын хоолыг идээгүй таван жил болжээ. Таныхаа хийж өгдөг байсан амттай хоолнуудыг ямар их санаж байна гээч. Тиймээс та хүүгээ халагдаад очиход эдгэрчихээд гарынхаа амттай хоолыг хийж өгөөрэй.
 
Армийн тэмцээнд заавал түрүүлээд алдар цуутайгаар цэргийн албаа хаагаад тань дээрээ очих болно оо. Та хүүгээ хүлээж байгаарай
 
          Ээжээ хүү нь армийн марш тактикийн тэмцээнд оролцохоор болсон. Тиймээс амжилт үзүүлэхийн тулд маш их хичээж байгаа. Та минь ч гэсэн хичээж байгаад хөл дээрээ босон хүүгээ тосон аваарай. Аз жаргалтайгаар хүүгийнхээ хажууд удаан байна шүү ээжээ. Армийн тэмцээнд заавал түрүүлээд алдар цуутайгаар цэргийн албаа хаагаад тань дээрээ очих болно оо. Та хүүгээ хүлээж байгаарай. Мартсанаас дүү нараа болон ах нараа санаж байна. Гэрийнхэнд минь мэнд хүргээрэй. Хүү нь эр цэргийн албаа сайн хааж байгаа шүү. Долгорсүрэн гэдэг таныхаа сайхан нэрээр овоглосон болохоор нэрийг тань өндөрт өргөж явахыг хичээх болно. Биеэ бодож байгаарай. 1000 сарнай тандаа авч өгч чадахгүй ч гэлээ 1000 удаа хайртай гэж чин сэтгэлээсээ хэлж байна. Таны хайрт хүү Чингисээс нь.
 

 1000 сарнай тандаа авч өгч чадахгүй ч гэлээ 1000 удаа хайртай гэж чин сэтгэлээсээ хэлж байна

 
Зэвсэгт хүчний 326 дугаар ангийн байлдагч Д.Чингис

ЦЭРГИЙН ЗАХИДАЛ: Ээжээ хүү нь таныхаа гарын хоолыг идээгүй таван жил болжээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2022-03-12 18:15:19
    Сайхаан сайхан: Яасан гоё юм бэ ээ. Хөвгүүд минь цэргийн албанд очоод ухаарч, хэрсүүжиж, эр хүн болж байгаад баяртай байна аа. Ээжтэйгээ эрүүл саруул, насан туршдаа амьдраасай. Сайн ханьтай учирч, сайхан амьдрахыг хүсье. Бас ээж нь энэ захиаг олж уншаасай, сонсоосой. Ийм сайхан зүйл хийсэн эргэлт.мн-ийн сэтгүүлчдэд баярлалаа
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.