Дуучин Д.Отгонжаргал Монгол Улсын Гавьяат жүжигчин цол хүртлээ.

           Тэрбээр "Их хичээсэн. Цаашдаа ч улам хичээхгүй бол болохгүй юм байна. Залуу хүнд том урам зориг өгч байгаа гэж ойлгож байна. Уран бүтээлүүдийг минь үргэлж, сонсож, дэмжиж, урам хайрладаг үзэгч, сонсогчиддоо одоо байгаагаасаа илүү чанартай, илүү хөдөлмөр зүтгэл шингээсэн уран бүтээлээрээ насан туршдаа бэлэг барих нь хамгийн том зорилго юм. Өнгөрсөнд, одоо, ирээдүйд байгаа бүх хүнд баярлалаа гэж хэлье.

         2006 онд СУИС-ийг дуурийн гоцлол дуучин мэргэжлээр төгсөөд, “Ижийдээ бичсэн захидал” хэмээх дууг өөрийнхөө ээждээ зориулж хийсэн хамгийн анхны уран бүтээл минь байсан. “Ижийдээ бичсэн захидал” дууг минь Монгол Улсын Хөдөлмөрийн баатар, Чингис хаан одонт Б.Шарав багш минь аялгууг нь зохиож өгсөн. МУСГЗ, дууны яруу найргийн нэрт мастер З.Түмэнжаргал үгийг нь зохиосон. Миний хамгийн анхны уран бүтээл ийм гайхалтай хүмүүсийн бүтээлээр гараагаа эхэлж байсан. Хоёр дахь уран бүтээл мөн л  Монгол Улсын Хөдөлмөрийн баатар, Чингис хаан одонт Б. Шарав багшийн минь хөгжим, яруу найрагч Л.Өлзийтөгс эгч минь зөвхөн надад зориулж бичиж өгсөн “Өнө мөнх орон” гэх эх орны тухай дуу байдаг.  Миний уран бүтээлүүдийн ихэнх хувь нь эх орны болон ээж аавын тухай дуунууд эзэлдэг. Хамгийн сүүлд хийсэн эх орны тухай дуу Монгол Улсын Хөдөлмөрийн баатар Л.Түдэв гуайн шүлэг, МУСТА хөгжмийн зохиолч Жанцанлхамба ахын минь хөгжим “Эх орон танаа” гэсэн сайхан дууг өнгөрсөн жил өлгийдөн аваад, симфони оркестр тоглоод, клипний зураг авалтыг маш гайхалтай хийсэн. Энэ дууг минь та бүхэн сонсвол монгол хүн болж төрсөн баяр бахдал, цэнгэл жаргалыг энэ дуунаас олж авна гэж хэлэхэд баяртай байна" гэв.