Л.ЭНХ-АМГАЛАН: Ирэх сарын 25-нд пянзны баяраа хийнэ

2023-11-16, 446

Нисванис хамтлаг пянзны баяр болох тоглолтоо хийх гэж байгаа талаараа өнөөдөр мэдээлэл хийлээ.

Нисванис хамтлагийн дуучин Л.Энх-Амгалан "Пянз Америкт хэвлэгдээд, замдаа явж байна. Хөгжмийн ертөнц буцаад пянз сонирхдог болж эхэлж буй энэ цаг үед манай хамтлаг ч дутахгүй анхныхаа пянзыг өлгийдөн авах гэж байна. Үүнтэй холбоотойгоор сонсогчдодоо зориулж томоохон хэмжээний рок цугларалт, баяраа тэмдэглэхэд бэлэн боллоо. Пянз нэлээд жинтэй, чанарын хувьд өндөр түвшинд гарч байгаа. Дуугаралтын хувьд барууны ямар ч хамтлагийн пянзнаас дутахааргүй болсон. Тоглолтын бэлтгэл бүрэн хангагдсан сонсогчдынхоо сэтгэл ханамжийг өндөр байлгахад бүх хүчээ дайчлахад бэлэн сайхан тоглолт болно гэдэгт эргэлзэхгүй байна. Бид ирэх оны эхэнд шинэ цомгоо гаргахаар бэлтгэл ажлаа эхэлсэн. Хүнд металл чиглэлийн цомог байх болно" гэв.

180 граммын жинтэй, 500 ширхэг хэвлэгдэж буй тус пянзанд "Үүнээс хойш би", "Чөтгөр бид 2", "Аабан бээбэн", "Далд оюун ухаан", "Сэтгэл хөдлөнө", "Цаг хугацаа бүгдийг эмчилнэ", "Masturbation", "Нэргүй дуу" зэрэг уран бүтээл нь багтжээ. Пянз Монголд байгаа бүх пянзны дэлгүүрүүдээр худалдаалагдах юм байна.Тоглолт арваннэгдүгээр сарын 25-нд "Crocus event hall"-д 18:00 цагаас болох юм байна.

Тоглолтод Нисванис хамтлагаас гадна энэ цаг үеийн рок хамтлагуудын төлөөлөл болсон "Madness", "The Lemons", "Булсара", "Growl of clown" "Rec on", "Аравт" зэрэг хамтлагууд болон бусад залуу үеийн төлөөллүүд оролцох байна.

Л.ЭНХ-АМГАЛАН: Ирэх сарын 25-нд пянзны баяраа хийнэ

Шинэ мэдээ

Нийтлэлчид