Найруулагч П.Дэлгэрбаярын онцлох ТАВАН КИНО

2023-11-01, 2797

Найруулагч П.Дэлгэрбаярын зохиолыг нь бичиж, найруулсан ээлжит бүтээл "95 зүүдний хүн" киноны нээлтийг өчигдөр хийлээ. Энэ сарын 3-наас эхлэн кино театрын дэлгэцнээ гарч эхлэх юм. Түүний өмнө нь найруулсан таван киног онцолж байна.

-ТӨРИЙН ДАЙСАН-

Тус бүтээлийг 2019 онд хийсэн бөгөөд тэрбээр зохиолыг нь бичиж, найруулсан юм. Кинонд цагдаагийн ахмад Мөнхтөрийг гэртээ ирэхэд эхнэр нь алуулчихсан охин нь алга болсон байдаг. Мөнхтөрийг Түвшин сайдыг алахыг үл мэдэгдэх хэн нэгэн утсаар шаардана. Эс бөгөөс барьцаанд авсан охиныг нь ална гэж сүрдүүлнэ. Мөнхтөр гарцаагүй байдалд орон сайдыг буудна. Хэдхэн цагийн өмнө цагдаа байсан хүн одоо төрийн сайдыг буудсан гэмт хэрэгтэн 'Төрийн дайсан' болно. Түүний эсрэг Монголын бүх хүчний байгууллага, тэр дундаа Тагнуулын байгууллага босох байдлаар үйл явдал өрнөнө.

-АМЬДРАЛ ТӨСӨЛ-

“Амьдрал төсөл” драмын төрлийн киноны гол дүрд “Guys” хамтлагийн экс дуучин, жүжигчин Д.Лхагва, топ модель, жүжигчин Д.Пүрэвсүрэн, Драмын эрдмийн театрын жүжигчин Г.Амгаланбаатар, “Тусгай салаа” киноны Номингийн дүрээр олны танил болсон загвар өмсөгч, жүжигчин Б.Гэрэлчулуун болон гавьяат жүжигчин А.Дашпэлжээ, Б.Тунгалаг нар тогложээ. Эл киноны найруулагчаар П.Дэлгэрбаяр ажиллаж, “Guys” хамтлагийн экс дуучин, жүжигчин Д.Лхагва киноны зохиолыг бичжээ.

ДУРЛАЛЫН ГЭМТ ХЭРЭГ

Монголын кино урлагт нэгэн шинэ өнгө төрх, жанрыг бий болгосон "LVA entertainment"-ийн анхны бүтээл "Дурлалын гэмт хэрэг" киноны нээлтийг 2013 онд хийсэн билээ. Энэхүү киног “LVA entertainment”, “Absolute pictures”, “Logic film”-ийн уран бүтээлчид хамтран бүтээсэн бөгөөд киноны гол дүрд жүжигчин, дуучин, продюсер Д.Лхагва, ХБНГУ-ын жүжигчин Г.Ариунболор, жүжигчин Н.Ялалт, О.Долгор, А.Баттүшиг нар тоглосон юм.

ИЛД ЦЭЦЭГ

"Илд цэцэг" уран сайхны кино нь жирийн эх хүний үрийнхээ төлөө гэх сэтгэл нь юуны ч өмнө сөхөрдөггүй гэдгийг өгүүлэх бөгөөд гол дүрд Ц.Төмөрхуяг, Т.Өөдөө болон олон залуу уран бүтээлчид оролцон тоглосон юм. Найруулагч П.Дэлгэрбаяр “Бид кинондоо олны танил гэхээсээ илүү мэргэжлийн жүжигчдийг тоглуулсан. Учир нь хэт арилжаа хөөцөлдөх биш урлаг талаас нь бүтээлээ хийхийг хүссэн” хэмээн онцолсон.

БУУНЫ СУМЫГ БУЦААЖ БОЛДОГГҮЙ

"Бууны сумыг буцааж болдоггүй" кино зохиолыг Төрийн шагналт, Ардын уран зохиолч Б.Догмид бичиж, Урлагийн гавьяат зүтгэлтэн Т.Солонго, Г.Төрбат нар продюсерээр ажилласан бол найруулагчаар П.Дэлгэрбаяр ажилласан юм.

Домогт баатар Л.Дандарын тухай мэдэхгүй хүн Монголд байхгүй биз. Тэрээр 1914 оны тавдугаар сарын 28-нд Булган аймгийн Бүрэгхангай сумын Рашаант гэдэг газар төржээ. 19 насандаа эх орон, газар нутгаа хамгаалахаар Ардын цэрэгт татагдаж, 1935 онд ЗХУ-ын Тамбов хотын нэгдүгээр морин армийн нэрэмжит цэргийн дунд сургуульд хуваарилагдан очиж суралцсан байдаг. Тамбовын морин цэргийн дунд сургуулийн сонсогч эх орондоо ирэхэд Монгол Улсын зүүн хязгаарын түгшүүр улам нэмэгдэж, эх орон нь дайны өндөржүүлсэн бэлэн байдалд угтжээ. Л.Дандар баатар нь Тамсагийн зургадугаар дивизийн 17 дугаар морьт хороог удирдаж гарамгай гавьяа байгуулсан түүхтэй.

Найруулагч П.Дэлгэрбаярын онцлох ТАВАН КИНО

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.