“Playtime festival” 21 дэх жилдээ зохион байгуулагдах гэж байна. Уг  наадам нь 2002 онд үүсгэн байгуулагдсан  бөгөөд орчин үеийн хөгжмийн урлагаар дамжуулан Улаанбаатар хотыг дэлхийн бусад жишиг хөгжилтэй, хүн төвтэй хотуудтай нэг түвшинд хүргэх, нийслэл хотыг Азийн тэргүүлэх хөгжмийн аялал жуулчлалын хот болгох болон хөгжмийн наадам төвтэй, бүтээлч үйлдвэрлэлийн салбарыг хөгжүүлэх замаар Монгол Улсын тогтвортой хөгжилд хувь нэмэр оруулах зорилготой наадам билээ.

     Монголын хамгийн олон жил тасралтгүй зохион байгуулагдаж буй уг олон улсын хөгжмийн наадам зөвхөн хөгжмийн салбар төдийгүй наадам төвтэй бусад урлаг соёлын арга хэмжээ, үзвэр үйлчилгээ, залуусын амьдралын хэв маягт эерэгээр нөлөөлж, цаашлаад хамтрагчид болох бизнесийн болоод бусад салбарын түншүүдэд хөгжмийг даган бий болох соёлын хөгжмийн боломжийг нээн таниулан хөгжимд хандах хандлагыг шат шатаар ахиулж байгаа билээ.

        “Плэйтайм 2023” хөгжмийн наадам ирэх долдугаар сарын 6, 7, 8-ны өдрүүдэд уламжлал ёсоор Монгол Шилтгээнд зохион байгуулагдах гэж байна. Энэ удаагийн “Плэйтайм” хөгжмийн наадмын өөрийн 10 тайз,  стратегийн түнш байгууллагуудын дөрвөн тайз нийлсэн  нийт 14 тайзнаас гадаад болон дотоодын 170 хамтлаг, уран бүтээлчид уран бүтээлээ хүргэх юм. Наадмын өөрийн 10 тайзны зургаан тайзнаа олон улсын уран бүтээлчид оролцох ба олон улсын уран бүтээлчдийн тоог жил бүр нэмж, чанаржуулсаар ирсэн. “Плэйтайм 2023” наадмын  Headliner буюу голлох уран бүтээлчид болох indie rock, shoegaze, dream pop урсгалаар тоглодог Америкийн Cigarettes After Sex, орчин цагийн техно хөгжмийн нөлөө бүхий артист Kobosil, Marcel Dettmann тэргүүнтэй олон улсын 21 хамтлаг, DJ уран бүтээлчдийн 74 хүний бүрэлдэхүүнтэй наадамд хүрэлцэн ирнэ.

        Төв тайз буюу “Playtime” тайзнаа дотоодын уран бүтээлчдийн олон сонирхолтой тоглолтууд багтсан. Тухайлбал, энэ жил 45 жилийн ойгоо тэмдэглэж буй “Инээмсэглэл” хамтлагийн хүндэтгэлийн тоглолт, дуучин Э.Минжинсор анх удаа тайзнаа амьд хөгжмийн хамтлагтай тоглох бол 17 жилийн дараа “Шөнийн галт тэрэг” хамтлаг эргэн тоглох юм. Мөн адил найман жилийн дараа тус тайзнаа “Дэлхий” хамтлаг дахин тоглоно. “Плэйтайм” хөгжмийн наадам нь олон улсын хөгжмийн наадмын стандартыг хангах үүднээс продакшн багтаа олон улсын мэргэжилтнүүдтэй хамтран ажилладаг. 2013 оноос хойш “Playtime” тайзны дуугаралт дээр хамтарч буй “ITC solution” компани энэ жил БНСУ-аас есөн инженер урьж ажиллуулах бол “Нааглихац” тайзны visual болон гэрлийн мэргэжилтнээр Нидерландын уран бүтээлчид хоёр дахь жилдээ ажиллах юм. Хамгийн отгон тайзуудын нэг буюу хоёр дахь жилдээ үзэгчдэд хүрч буй “Streetz stage” нь Монголд хип хоп урлаг үүсэж хөгжсөний 50 жилийн ойтой холбогдуулан хөгжмийн хөтөлбөрөөс гадна гудамжны урлагийн бусад төрлийг багтаасан олон сонирхолтой хөтөлбөрүүд бэлтгэж байна. Эдгээрээс онцлон дурдвал, Jazzy Sport-ийн үүсгэн байгуулагч DJ Masaya Fantasista, гурван өдрийн турш Heesco тэргүүтэй олон улсын долоон графитти уран бүтээлчид бүтээлээ амилуулах юм. Энэ жил бид 80 мянган үзэгч хүлээн авахаар нарийн зохион байгуулалтын дор бэлтгэл ажлаа хангаж ажиллаж байна.

            2027 он гэхэд Азийн тэргүүлэх топ таван  хөгжмийн фестивалийн нэг болох зорилготой “Плэйтайм” хөгжмийн наадам нь энэ жил 3000 гаруй ажлын байр бий болгож Соёлын бүтээлч үйлдвэрлэлийн салбарт эдийн засгийн бодит хувь нэмэр оруулж байна. Мөн наадмын бас нэгэн чухал хэсэг хөгжмийн бус “PT+ хөтөлбөр” нь хувь хүний хөгжил, эрүүл амьдралын хэв маяг, сэтгэл зүйн эрүүл мэнд, гар урлал зэрэг олон хөтөлбөрүүдээ 200 гаруй уран бүтээлчид, оролцогчдын хамтраар наадмын гурван өдрийн турш зохиох юм.  Мөн энэ жил Kids zone-нд тусгайлан хүүхдэд зориулсан сонирхолтой хөтөлбөрүүд байх ба хүүхдийн ариун цэврийн өрөө, хүүхдийн хоолны асрууд ажиллана. “Плэйтайм” хөгжмийн наадам нь Улаанбаатар хотыг хөгжмийн хот болгох, хөгжмийн салбарын уран бүтээлчдийг чадавхжуулах, уран бүтээлээ олон нийтэд хүргэх боломжийг нээх зорилгын хүрээнд Showcase, Pre-Event зэрэг хөтөлбөрөө энэ онд мөн амжилттай хэрэгжүүлээд байгаа аж.