“Орфей” театрын уран бүтээлчид найруулагч М.Батболдын найруулгаар “Шөнө дундын бүжиг” жүжгийг ирэх сарын 2-ноос тоглохоор зэхэж байгаа билээ. Тэгвэл тус жүжгийн Цэнгэлийн дүрд загвар өмсөгч С.Төгс тоглохоор болжээ. Тэрбээр Монгол Улсаас азидаа төдийгүй дэлхий дахинд алдартай Asia's next top model" тэмцээнд оролцсон загвар өмсөгч. 2010 оноос загварын салбарт ажиллаж эхэлсэн бөгөөд “Торго” монгол модель агентлаг, Берлиний “Izaio model management”, Сингапурын “Looque”, “NU”, “Now model management”, Лондонд “Jem model management” зэрэг агентлагт харьяалагдан ажиллажээ. Улаанбаатар хотод төрсөн тэрбээр гурван настайдаа ээжтэйгээ хамт Герман Улс руу явснаар бага насаа Германд өнгөрүүлжээ. Харин Монголд 11 настайдаа ирж суралцсанаар арван жилээ төгсөж, МУИС-ийн франц хэлний ангид хоёр жил сурч байгаад Германы Берлин хотын Урлагийн их сургуульд орж “Make up artist, stylist” мэргэжлийг эзэмшсэн байна. Моделийн гараагаа харин анхлан “Торго” агентлагаас эхэлсэн гэдэг. Түүнээс багаасаа модель болно гэж боддоггүй байж. Гэсэн ч аливаад сониуч, сонирхсон зүйлдээ амжилттай ажиллаж чаддаг охин байж. Энэ зан чанар нь түүнийг өдий хүртэл хөтөлж, өөртэй итгэлтэйгээр загварын тайзнаа алхах суурь болсон болов уу.

Тэрбээр “Эмэгтэй хүн жаргалтай байх зүйлдээ л цагаа зарцуулах хэрэгтэй” гэж эмэгтэй хүний оршихуй, гоё сайхан байхын тухайд өөрийн үзэл бодлоо илэрхийлдэг нэгэн. Тэгвэл түүнийг бид одоо жүжгийн дүрээр харах нь.